ଧାରଣାରେ ବସିଲେ ମୋଦିଙ୍କ ଭାଇ । ରାସନ ଡିଲର ମହାସଂଘର ଦାବି ନେଇ ଜନ୍ତରମନ୍ତରରେ ପ୍ରତିବାଦ । ପଶ୍ଚିମବଙ୍ଗ ମଡେଲ ଆପଣାଇବାକୁ ଦାବି ।
କନକ ବ୍ୟୁରୋ: ସାରା ଦେଶରେ ଏବେ ମହଙ୍ଗା ମାଡ ଅସହ୍ୟ ହେଲାଣି । ଏହି ସମୟରେ ମହଙ୍ଗା ମାଡ ବିରୋଧରେ ରାଜରାସ୍ତାକୁ ଓହ୍ଲାଇଛନ୍ତି ଖୋଦ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଭାଇ ପ୍ରହ୍ଲାଦ ମୋଦୀ । ଦିଲ୍ଲୀର ଜନ୍ତରମନ୍ତରଠାରେ ଧାରଣାରେ ସାମିଲ ହୋଇ କେନ୍ଦ୍ର ଉପରେ ବର୍ଷିଛନ୍ତି ପ୍ରହ୍ଲାଦ । ସେ କହିଛନ୍ତି, ଦରଦାମ ଯେଉଁଭଳି ବଢୁଛି, ସେଥିରେ ରାସନ ଦୋକାନୀମାନେ ଚଳିବା କଷ୍ଟକର । ତେଣୁ ପଶ୍ଚିମବଙ୍ଗ ମଡେଲ୍ ଲାଗୁ କରାଯାଉ ଆଉ ଏହା ଏବେ ସାରା ଦେଶରେ ଚର୍ଚ୍ଚାର ବିଷୟ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ସାରାଦେଶରେ ଯେତେବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଯୋଜନାକୁ ବିଜେପି ନେତାମାନେ ଭୁରି ଭୁରି ପ୍ରଶଂସା କରୁଛନ୍ତି, ସେତିକିବେଳେ ତାଙ୍କ ନିଜ ଭାଇ ପ୍ରହ୍ଲାଦ ମୋଦି କେନ୍ଦ୍ର ସରକାରଙ୍କ ନୀତି ବିରୋଧରେ ଆନ୍ଦୋଳନକୁ ଓହ୍ଲାଇଛନ୍ତି । ଯାହା ଏବେ ସାରାଦେଶରେ ଚର୍ଚ୍ଚାର ବିଷୟ ହୋଇଛି ।
- ଦିଲ୍ଲୀରେ ଧାରଣା ଦେଲେ ମୋଦିଙ୍କ ଭାଇ
- ରାସନ ବଣ୍ଟନରେ ପଶ୍ଚିମବଙ୍ଗ ମଡେଲ ଲାଗୁ ଦାବି
ସର୍ବଭାରତୀୟ ଖାଉଟି ସାମଗ୍ରୀ ବଣ୍ଟନ ଡିଲର ମହାସଂଘ ପକ୍ଷରୁ ଜନ୍ତରମନ୍ତରଠାରେ ଆୟୋଜିତ ଧାରଣାରେ ସାମିଲ ହୋଇ କେନ୍ଦ୍ର ଉପରେ ବର୍ଷିଛନ୍ତି ପ୍ରହ୍ଲାଦ । ସେ କହିଛନ୍ତି ରାସନ ଡିଲରଙ୍କୁ ଯେଉଁ କମିସନ ଦିଆଯାଉଛି ତାହା ବହୁତ କମ୍ । କିଲୋଗ୍ରାମ ପ୍ରତି କମିଶନ ମାତ୍ର ୨୦ ପଇସା ବୃଦ୍ଧି କରାଯାଇଛି । ଯାହାକି ପରିହାସ ସଦୃଶ । ଏବେ ଦରଦାମ ଯେଉଁଭଳି ବଢୁଛି, ସେଥିରେ ରାସନ ଦୋକାନୀମାନେ ଚଳିବା କଷ୍ଟକର । ତେଣୁ ପଶ୍ଚିମବଙ୍ଗ ମଡେଲ୍ ଲାଗୁ କରାଯାଉ ।
ନଜର ପକାନ୍ତୁ କଣ ରହିଛି ପଶ୍ଚିମବଙ୍ଗ ରାସନ ମଡେଲ..
– ପଶ୍ଚିମବଙ୍ଗର ରାସନ ମଡେଲରେ ରହିଛି ମାଗଣା ବଣ୍ଟନ ବ୍ୟବସ୍ଥା
– ରାଜ୍ୟର ହିତାଧିକାରୀଙ୍କ ଘରେ ରାସନ ପହଞ୍ଚାଇବାର ବ୍ୟବସ୍ଥା କରିଛନ୍ତି ମମତା ସରକାର
– କିଲୋ ପିଛା ରାସନ ସାମଗ୍ରୀ ବିକ୍ରେତାଙ୍କୁ କମିଶନ ବାବଦକୁ ମିଳୁଛି ୯୦ ପଇସା
-ରାସନ ସାମଗ୍ରୀ ସହ ଡାଲି, ଖାଇବା ତେଲ, ସିଲିଣ୍ଡର ଯୋଗାଉଛନ୍ତି ଡିଲର
– ୨୧ ହଜାର ରାସନ ଡିଲରଙ୍କୁ ୧ ଲକ୍ଷ ଟଙ୍କା ଲେଖାଏଁ ଦେବାକୁ ଘୋଷଣା କରାଯାଇଛି
ଦରଦାମ ବୃଦ୍ଧି, ବେରୋଜଗାରୀ ଭଳି ପ୍ରସଙ୍ଗରେ କଂଗ୍ରେସ ପ୍ରତିବାଦ ଜାରି ରଖିଛି । ଦିଲ୍ଳୀରେ ପ୍ରତିବାଦ ଜାରି ଥିବାବେଳେ ଆଗାମୀ ଦିନରେ ଓଡିଶାରେ ପ୍ରତିବାଦ କରିବାକୁ ଯୋଜନା କରିଛି ରାଜ୍ୟ କଂଗ୍ରେସ । ୫ ତାରିଖରେ ଭୁବନେଶ୍ୱରର ରାଜଭବନ ଓ ପ୍ରତ୍ୟେକ ଜିଲ୍ଲାପାଳଙ୍କ କାର୍ଯ୍ୟାଳୟ ଘେରାଉ କରିବାକୁ ଘୋଷଣା କରିଛି । ଅନ୍ୟପଟେ ବିଜେପି କହିଛି ନାଟକବାଜୀ କରୁଛି କଂଗ୍ରେସ ।
ପ୍ରହ୍ଲାଦ ମୋଦି ସର୍ବଭାରତୀୟ ରାସନ ଡିଲର ମହାସଂଘର ଉପ ସଭାପତି ଅଛନ୍ତି । ଏଥିସହ ସେ ପୂର୍ବରୁ ମଧ୍ୟ କେନ୍ଦ୍ର ସରକାର ବିରୋଧୀ ଆନ୍ଦୋଳନରେ ମଧ୍ୟ ସାମିଲ ହୋଇଥିଲେ ।