ଛତ୍ରପୁରରେ ବିରୋଧୀଙ୍କ ଉପରେ ବର୍ଷିଲେ ପାଣ୍ଡିଆନ୍ । କହିଲେ ନବୀନ ଇଞ୍ଜିନ ସ୍ୱଚ୍ଛତାର ଇଞ୍ଜିନ, ସେବାର ଇଞ୍ଜିନ । ଡବଲ୍ ଇଞ୍ଜିନ୍ ଭୋଟ୍ ପାଇଁ କାମ କରିବା ଇଞ୍ଜିନ୍
କନକ ବ୍ୟୁରୋ: ଛତ୍ରପୁରରେ ଭିକେ ପାଣ୍ଡିଆନଙ୍କ ପ୍ରଚାର । ବୁଧବାର ଗଞ୍ଜାମର ଛତ୍ରପୁର ଗସ୍ତ କରି ବିଜେଡି ସାଂସଦ ପ୍ରାର୍ଥୀ ଭୃଗୁ ବକ୍ସିପାତ୍ର ଏବଂ ଛତ୍ରପୁର ବିଜେଡି ବିଧାୟକ ପ୍ରାର୍ଥୀ ସୁବାସ ବେହେରାଙ୍କ ପାଇଁ ପ୍ରଚାର କରିଛନ୍ତି ବିଜେଡି ନେତା ଭିକେ ପାଣ୍ଡିଆନ୍ । ଜୟ ଜଗନ୍ନାଥ ଏବଂ ଜୟ ମା ତାରା ତାରିଣୀ କହି ସେ ନିଜର ଅଭିଭାଷଣ ଆରମ୍ଭ କରିବା ସହିତ ଗଞ୍ଜାମ ଜିଲ୍ଲା ସହିତ ତାଙ୍କର ସମ୍ପର୍କ ବହୁ ପୁରୁଣା ବୋଲି ସେ କହିଥିଲେ । ଏଥିସହ ଜିଲ୍ଲାପାଳ ଥିବା ସମୟରେ କେମିତି ସେ ଗଞ୍ଜାମକୁ ସ୍ୱତନ୍ତ୍ର ପରିଚୟ ଦେବାକୁ ଚେଷ୍ଟା କରିଥିଲେ, ସେ ସମ୍ପର୍କରେ କହିଥିଲେ ଭିକେ ପାଣ୍ଡିଆନ୍ ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ବିରୋଧୀ ଶିବିର ଉପରେ ଟାର୍ଗେଟ କରି ପାଣ୍ଡିଆନ୍ କହିଥିଲେ, କିଛି ଲୋକ କେବଳ ବଡ ବଡ କଥା କହି ପଳେଇବେ । ହେଲେ ମୁଁ ଆସିଲେ ହିସାବ ନେଇକି ଆସେ । ଏଥିସହ ଗଞ୍ଜାମର ବିକାଶ ପାଇଁ ମୁଖ୍ୟମନ୍ତ୍ରୀ ମଞ୍ଜୁର କରିଥିବା ଅନେକ ଯୋଜନା ସମ୍ପର୍କରେ ଖୋଲାମଞ୍ଚରେ ସୂଚନା ଦେଇଥିଲେ ପାଣ୍ଡିଆନ୍ । ସେହିପରି କିଛି ଲୋକ କେବଳ ଡବଲ ଇଞ୍ଜିନ୍ ବୋଲି ପାଟି କରୁଛନ୍ତି । ହେଲେ ନବୀନ ଇଞ୍ଜିନ୍ ହେଉଛି ସ୍ୱଚ୍ଛତାର ଇଞ୍ଜିନ ଏବଂ ଲୋକଙ୍କ ସେବା କରିବାର ଇଞ୍ଜିନ । ଡବଲ ଇଞ୍ଜିନ କେବଳ ନିର୍ବାଚନ ସମୟରେ ଶୁଣିବାକୁ ମିଳେ, ହେଲେ ନବୀନ ଇଞ୍ଜିନ କିନ୍ତୁ ଲୋକଙ୍କ ଦୁଃଖରେ, ସୁଖରେ ରହିଛି ବୋଲି ପାଣ୍ଡିଆନ୍ କହିବା ସହିତ ବିରୋଧୀ ଶିବିରକୁ ତେରେଛା ତୀର ମାରିଥିଲେ ।
ଖାଲି ସେତିକି ନାଁ ନନେଇ ବି ବ୍ରହ୍ମପୁର ବିଜେପି ଲୋକସଭା ପ୍ରାର୍ଥୀ ପ୍ରଦୀପ ପାଣିଗ୍ରାହୀଙ୍କୁ ଟାର୍ଗେଟ କରିଥିଲେ ପାଣ୍ଡିଆନ୍ । ଏଭଳି ଲୋକ ଜେଲରେ ରହିବା ଉଚିତ୍, ସଂସଦକୁ ଯିବା ଉଚିତ୍ ନୁହେଁ ବୋଲି ସେ କହିଥିଲେ । ଗଞ୍ଜାମବାସୀ ପୁଣିଥରେ ନବୀନ ପଟ୍ଟନାୟକଙ୍କୁ ଭରସା କରିବା ସହିତ ଯୋଡି ଶଙ୍ଖକୁ ଭୋଟ୍ ଦେବେ ବୋଲି ତାଙ୍କର ବିଶ୍ୱାସ ଥିବା କହିଥିଲେ ଭିକେ ପାଣ୍ଡିଆନ୍ ।