ଚିକିିତ୍ସା ପାଇଁ ଦିଲ୍ଲୀ ଗଲେ ପିଣ୍ଟୁ ନନ୍ଦ: ଘରୋଇ ହସ୍ପିଟାଲରେ ହେବ ଲିଭର ଟ୍ରାନ୍ସପ୍ଲାଣ୍ଟ
କନକ ବ୍ୟୁରୋ: ଏକାଧିକ ଓଡିଆ ଫିଲ୍ମରେ, ବିଭିନ୍ନ ଚରିତ୍ରରେ ଦମଦାର ଅଭିନୟ କରି ଲୋକଙ୍କ ମନ ଜିଣୁଥିବା ଅଭିନେତା ପିଂଟୁ ନନ୍ଦ ଗୁରୁତର ହେବା ପରେ ଅଧିକ ଚିକିତ୍ସା ପାଇଁ ତାଙ୍କୁ ଦିଲ୍ଲୀ ନିଆଯାଇଛି । ଏ ହେଉଛି ଦିଲ୍ଲୀ ଯିବା ସମୟରେ ଭୁବନେଶ୍ୱର ବିମାନବନ୍ଦରର ଦୃଶ୍ୟ । ଗୁରୁତର ଯକୃତ ବା ଲିଭର ସିରୋସିସ୍ ରୋଗରେ ପୀଡିତ ପିଂଟୁଙ୍କର ଏବେ ଦିଲ୍ଲୀ ସ୍ଥିତ ଘରୋଇ ହସ୍ପିଟାଲ ଆଇଏଲବିଏସ୍ ବା ଇନଷ୍ଟିଚ୍ୟୁଟ ଅଫ୍ ଲିଭର ଆଣ୍ଡ ବିଲିଆରୀ ସାଇନସେସ ରେ ଚିକିତ୍ସା କରାଯିବ । ସେଠାରେ ତାଙ୍କର ଲିଭର ଟ୍ରାନ୍ସପ୍ଲାଂଟ ବା ଯକୃତ ପ୍ରତିରୋପଣ କରାଯିବ ବୋଲି ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଲିଭର ସିରୋସିସରେ ପୀଡିତ ହେବା ପରେ ଗୁରୁତର ଅବସ୍ଥାର ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ପିଂଟୁ ଚିକିତ୍ସିତ ହେଉଥିଲେ । ତେବେ ଅଧିକ ଚିକିତ୍ସା ପାଇଁ ତାଙ୍କୁ ଦିଲ୍ଲୀ ନେଇଯିବାକୁ ଡାକ୍ତର ପରାମର୍ଶ ଦେଇଥିଲେ । ଲିଭର ଟ୍ରାନ୍ସପ୍ଲାଂଟ କରିବାକୁ କହିଥିଲେ । କିନ୍ତୁ ଏଥିପାଇଁ ୫୦ଲକ୍ଷରୁ ଅଧିକ ଟଙ୍କା ଆବଶ୍ୟକ ଥିବାରୁ ସହାୟତା ଲୋଡିଥିଲେ ପିଂଟୁ । ଆଉ ତା ପରେ, ପିଂଟୁଙ୍କ ସହାୟତା କରିବାକୁ ଆଗେଇ ଆସିଛି ଓଲିଉଡ୍ ସମେତ ତାଙ୍କୁ ଭଲ ପାଉଥିବା ଅନେକ ବ୍ୟକ୍ତି । ଦିଲ୍ଲୀ ଯିବା ବେଳେ ବିମାନବନ୍ଦରରେ ଅଭିନେତ୍ରୀ ରାଣୀ ପ୍ରିୟଦର୍ଶିନୀ ପିଂଟୁଙ୍କ ଚିକିତ୍ସା ପାଇଁ ଭିକ ମାଗିଛନ୍ତି । ବିମାନ ବନ୍ଦରରେ ଯାତ୍ରୀଙ୍କ ଠାରୁ ସହାୟତା ପାଇବା ଆଶାରେ ଭିକ ମାଗିଛନ୍ତି ରାଣୀ ।
ସୂଚନା ଅନୁସାରେ ପିଂଟୁଙ୍କୁ ତାଙ୍କର ଜଣେ ବନ୍ଧୁ ଲିଭର ଦାନ କରିବେ । ସେହି ଲିଭରକୁ ପିଂଟୁଙ୍କ ଦେହରେ ପ୍ରତିରୋପଣ କରାଯିବ । ତାପରେ ତାଙ୍କୁ ପାଖାପାଖି ୩ ମାସ ପର୍ଯ୍ୟନ୍ତ ହସ୍ପିଟାଲରେ ଚିକିତ୍ସାଧୀନ ରହିବାକୁ ପଡିବ ।
୪୫ବର୍ଷୀୟ ପିଣ୍ଟୁ ନନ୍ଦ ଓଲିଉଡର ଜଣେ ଆଗଧାଡିର କଳାକାର । ୩୦ରୁ ଅଧିକ ଫିଲ୍ମରେ ସେ ନିଖୁଣ ଅଭିନୟ କରିଛନ୍ତି । କେତେବେଳେ ଅଭିନେତା ତ କେତେବେଳେ ସହ ଅଭିନେତା ଏବଂ କମେଡିଆନ ଚରିତ୍ରରେ ସେ ଦର୍ଶକଙ୍କୁ ହସାଇଛନ୍ତି, କନ୍ଦାଇଛନ୍ତି ଓ ଅଭିନୟର ଯାଦୁରେ ବାନ୍ଧି ରଖିଛନ୍ତି । କିନ୍ତୁ ଏବେ ସେ ଲିଭର ସିରୋସିସରେ ପୀଡିତ ହୋଇ ବଂଚିବାକୁ ସଂଘର୍ଷ କରୁଛନ୍ତି ।