ଦିନିକିଆ ବିଶ୍ୱକପ ଖେଳିବାକୁ ଭାରତ ଆସିବନି କି ପାକିସ୍ତାନ ? ପିସିବି ଅଧ୍ୟକ୍ଷଙ୍କ ବୟାନ ବଢାଇଲା ଦ୍ୱନ୍ଦ୍ୱ ।
କନକ ବ୍ୟୁରୋ : ଏସିଆ କପକୁ ନେଇ ଲାଗି ରହିଥିବା ଦ୍ୱନ୍ଦ୍ୱରେ ପୂର୍ଣ୍ଣଚ୍ଛେଦ ପଡିଛି । ପାକିସ୍ତାନର ହାଇବ୍ରିଡ ମଡେଲକୁ ସମସ୍ତେ ସହମତି ଦେବା ପରେ ଏସିଆ କପ୍ ଆୟୋଜନ ହେବା ନିଶ୍ଚିତ ହୋଇଛି । ତେବେ ଏସିଆ କପ ପାଇଁ ବୋର୍ଡ ସଦସ୍ୟଙ୍କ ମଧ୍ୟରେ ସହମତି ହୋଇଯିବା ପରେ ଏବେ ଦିନିକିଆ ବିଶ୍ୱକପ ପୂର୍ବରୁ କେଁ ପୂରାଇବା ଆରମ୍ଭ କରିଛି ପାକିସ୍ତାନ । ଭାରତରେ ଆୟୋଜିତ ହେବାକୁ ଥିବା ଦିନିକିଆ ବିଶ୍ୱକପକୁ ନେଇ ବଡ ବୟାନ ଦେଇଛନ୍ତି ପିସିବି ଅଧ୍ୟକ୍ଷ ନଜମ ସେଟ୍ଟୀ । ଯାହା କ୍ରିକେଟପ୍ରେମୀଙ୍କୁ କିଛି ମାତ୍ରାରେ ନିରାଶ କରିବ ନିଶ୍ଚୟ ।
Kanak News is now on WhatsApp
Join and get latest news updates delivered to you via WhatsApp
ଏସିଆ କପରେ ହାଇବ୍ରିଡ ମଡେଲକୁ ମଞ୍ଜୁରୀ ମିଳିବା ପରେ ଦିନିକିଆ ବିଶ୍ୱକପକୁ ନେଇ କୌଣସି ଦ୍ୱନ୍ଦ୍ୱ ଦେଖିବାକୁ ମିଳିବନି ବୋଲି କୁହାଯାଉଥିଲା । କିନ୍ତୁ ପିସିବି ଅଧ୍ୟକ୍ଷ ନଜମ ସେଟ୍ଟୀ ଭାରତରେ ହେବାକୁ ଥିବା ବିଶ୍ୱକପରେ ପାକିସ୍ତାନ ଟିମ୍ ଭାଗ ନେଇପାରିବ କି ନାହିଁ ତାହାକୁ ନେଇ ସନ୍ଦେହ ପ୍ରକାଶ କରିଛନ୍ତି । ନଜମ କହିଛନ୍ତି, ଟିମ୍ କେଉଁ ଦେଶକୁ ଖେଳିବାକୁ ଯିବ କି ନାହିଁ ତାହା ସରକାର ମଞ୍ଜୁରୀ ଅଧୀନ । ଆଉ ନଜମଙ୍କ ଏଭଳି ବୟାନ ଏବେ ଆଇସିସି ପାଇଁ ମୁଣ୍ଡବିନ୍ଧାର କାରଣ ପାଲଟିଛି । ନଜମ କହିଛନ୍ତି, ପାକିସ୍ତାନ ଓ ଭାରତ ମ୍ୟାଚକୁ ନେଇ ନା ପିସିବି ନିଷ୍ପତ୍ତି ନେଇପାରିବ ନା ବିସିସିଆଇ । କାରଣ ଉଭୟ ଦେଶ କେଉଁଠାରେ ଖେଳିବେ ତାହାର ନିଷ୍ପତ୍ତି ସରକାର ହିଁ ନେଇପାରିବେ ।
ସାମ୍ବାଦିକ ସମ୍ମିଳନୀରେ ନଜମ କହିଛନ୍ତି, ଏହି ମାମଲାରେ ସରକାର ଶେଷ ନିଷ୍ପତ୍ତି ନେବେ । କାରଣ ଯେତେବେଳେ ପାକିସ୍ତାନରେ ଭାରତ ଖେଳିବା ନେଇ କଥା ଉଠେ ସେତେବେଳେ ଭାରତ ସରକାର ସ୍ଥିର କରନ୍ତି ତାଙ୍କ ଟିମ୍ କେଉଁଠାରେ ଖେଳିବ । ତେଣୁ ଆମକୁ ପଚାରିବାର ଆବଶ୍ୟକତା ନାହିଁ ଯେ, ଆମ ଟିମ୍ ଅହମ୍ମଦାବାଦରେ ଖେଳିବ କି ନାହିଁ । ସମୟ ଆସିଲେ ଏହା ମଧ୍ୟ ସ୍ପଷ୍ଟ ହେବ ଯେ, ଆମ ଟିମ ଭାରତକୁ ଯିବ କି ନାହିଁ କିମ୍ବା ସରକାର ନିଷ୍ପତ୍ତି ନେବେ ଆମେ କେଉଁଠି ଖେଳିବୁ । ଏଭଳି କହି ଦିନିକିଆ ବିଶ୍ୱକପରେ ପାକିସ୍ତାନ ଭାଗ ନେବ କି ନାହିଁ ତାହାକୁ ସସପେନ୍ସରେ ରଖିଛି ।