ପାର୍ସଲ ବୋମାର ଖଳନାୟକ ପୁଞ୍ଜିଲାଲର ଫେରାର ପ୍ଲାନ୍ : ୬ ଡକାୟତଙ୍କ ସହ ମିଶି ଜେଲରୁ ଖସିଯିବାକୁ କିଭଳି ରଚିଥିଲା ଷଡଯନ୍ତ୍ର, ପଢନ୍ତୁ ପୂରା କାହାଣୀ
କନକ ବ୍ୟୁରୋ: ମୃତ୍ୟୁର ସୌଦାଗର ଭାବେ ସାରା ଓଡ଼ିଶାରେ ଅପଖ୍ୟାତି ଅର୍ଜନ କରିଥିବା ପାଟଣାଗଡ଼ର ପୁଂଜିଲାଲ୍ ମେହେରର ଜେଲରୁ ଖସିଯିବାର ଉଦ୍ୟମ ପଣ୍ଡ ହୋଇଛି । ୬ଜଣ ଦୁର୍ଦ୍ଦାନ୍ତ ଅପରାଧୀଙ୍କୁ ନେଇ ଜେଲରୁ ଖସିଯିବା ଯିବା ପାଇଁ ପୁଂଜିଲାଲ୍ କରିଥିଲା ମାଷ୍ଟର ପ୍ଲାନ୍ । ଦିନ-କାଳ ସ୍ଥିର ଥିଲା, ଖସିବାକୁ ହୋଇଥିଲା ପୁରା ଯୋଜନା । ହେଲେ ଜେଲରୁ ଫେରାର୍ ମାରିବାକୁ ଉଦ୍ୟମ କରୁଥିବା ବେଳେ ହିଁ ଧରାପଡ଼ିଥିଲା ସବୁ ଚାଲ୍ । ଜେଲରୁ ଚମ୍ପଟ୍ ମାରିବା ପାଇଁ କେମିତି ହୋଇଥିଲା ଯୋଜନା? କେଉଁ ପରିସ୍ଥିତିରେ ଅପରାଧୀଙ୍କୁ କାବୁ କରିଲେ ଜେଲ କର୍ମଚାରୀ? ପଢନ୍ତୁ ପୂରା କାହାଣୀ ..
Kanak News is now on WhatsApp
Join and get latest news updates delivered to you via WhatsApp
ଜେଲରୁ ଖସି ପଳାଇବାକୁ ପାଟଣାଗଡ଼ ପାର୍ସଲ ବୋମାର ଖଳନାୟକ ପୁଂଜିଲାଲ ମେହେର କରିଥିଲା ମାଷ୍ଟର ପ୍ଲାନ୍ । ଏଥିପାଇଁ ଆଜି ଦିନକୁ ବାଛିଥିଲା ପୁଂଜିଲାଲ୍ । କାରଣ –
ଆଜି ଥିଲା ମୁଖ୍ୟମନ୍ତ୍ରୀଙ୍କ ବଲାଙ୍ଗୀର କାର୍ଯ୍ୟକ୍ରମ
ମୁଖ୍ୟମନ୍ତ୍ରୀଙ୍କ କାର୍ଯ୍ୟକ୍ରମ ପାଇଁ ଯାଇଥିଲେ ପାଟଣାଗଡ଼ ଥାନା କର୍ମଚାରୀ
୧୦ ଜେଲ ୱାର୍ଡରଙ୍କ ମଧ୍ୟରୁ ୨ ଜଣ ଥିଲେ ଛୁଟିରେ
ଜେଲ ଭିତରେ ଥିଲେ ୨ ୱାର୍ଡର
ମୁଖ୍ୟ ଫାଟକରେ ଜଗିଥିଲେ ଜଣେ
ଏସବୁକୁ ଦୃଷ୍ଟିରେ ରଖି ଧୁର୍ତ ପୁଂଜିଲାଲ କରିଥିଲା ଫେରାର ପ୍ଲାନ୍
ଶୁକ୍ରବାର ସକାଳ ପ୍ରାୟ ୮ଟା । ସ୍ଥାନ – ପାଟଣାଗଡ଼ ଉପକାରାଗାର । ହଠାତ୍ ଜେଲ ଗେଟ୍ ନିକଟରେ ପହଁଚି ଯାଇଥିଲା ୬ ଜଣ ଡକାୟତଙ୍କ ସହ ପୁଂଜିଲାଲ୍ । ମାତ୍ର ତିନି ଦିନ ତଳେ ଏହି ଡକାୟତ ଦଳ ବଲାଙ୍ଗୀରରୁ ଆସିଥିଲେ ପାଟଣାଗଡ଼ ଜେଲ । ସେମାନଙ୍କୁ ଗ୍ରୁପ ବନାଇ ଜେଲ ଗେଟ୍ ଜଗିଥିବା ୱାର୍ଡର ଉପରେ ଅତର୍କିତ ଆକ୍ରମଣ କରିଥିଲା ପୁଂଜିଲାଲ । ତେବେ ଜୀବନକୁ ବାଜି ଲଗାଇ ସେମାନଙ୍କୁ ଅଟକାଇବା ପାଇଁ ୱାର୍ଡର କରିଥିଲେ ଉଦ୍ୟମ । ଡକାୟତ ଦଳ ତାଙ୍କୁ କାବୁ କରିବା ପୂର୍ବରୁ ସାଇରନ୍ ବଜାଇ ଦେଇଥିଲେ ୱାର୍ଡର । ଜେଲର ସାଇରନ୍ ଶୁଣି ସମଗ୍ର ଅଂଚଳରେ ହଇଚଇ ସୃଷ୍ଟି ହୋଇଥିଲା । ସାଙ୍ଗେ ସାଙ୍ଗେ ଅନ୍ୟ ୱାର୍ଡର ଓ ଜେଲର୍ ପହଁଚି ଯାଇଥିଲେ । ଆରମ୍ଭ ହୋଇ ଯାଇଥିଲା ଧସ୍ତାଧସ୍ତି । ପଣ୍ଡ ହୋଇଥିଲା ପୁଂଜିଲାଲର ଯୋଜନା ।
ପୋଲିସକୁ ଖବର ଦିଆଯାଇଥିଲା । ହେଲେ ଥାନାରେ କର୍ମଚାରୀ ନଥିଲେ । ୨ ଘଂଟା ଧରି ଚାଲିଥିଲା ଡକାୟତ ଦଳ ଓ ଜେଲ କର୍ମଚାରୀଙ୍କ ମଧ୍ୟରେ ଲଢେଇ । ଏହା ସତ୍ୱେ ଘଟଣାସ୍ଥଳରେ ପହଁଚି ପାରିନଥିଲା ପୋଲିସ । ପଂଜିଲାଲ ଏହି ଜେଲକୁ ଆସିବା ପରେ ଆଶାନ୍ତ ହୋଇ ଉଠିଛି ପାଟଣାଗଡ଼ ସବଜେଲ । ଗ୍ରୁପ ବନାଇ ବାରମ୍ବାର ଜେଲରେ ବିଶୃଙ୍ଖଳା ଘଟାଇବାକୁ ଉଦ୍ୟମ କରୁଛି ପାର୍ସଲ ବୋମାର ଏହି ଖଳନାୟକ । ଏ ନେଇ ଥାନା ଓ ମାଜିଷ୍ଟ୍ରେଟକୁ ଜଣାଇଛନ୍ତି ଜେଲ କର୍ମଚାରୀ । ଗତ ବର୍ଷ ଫ୍ରେବୁଆରୀ ୨୩ ତାରିଖ ଦିନ ପାଟଣାଗଡ଼ରେ ପାର୍ସଲ ବୋମା ବିସ୍ଫୋରଣ ହୋଇଥିଲା । ଏଥିରେ ୨ ଜଣଙ୍କର ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ଆହତ ହୋଇଥିଲେ । ଅଭିଯୁକ୍ତ ପୁଂଜିଲାଲ ମେହେର ଗିରଫ ହୋଇ ଅଛି ପାଟଣାଗଡ଼ ଜେଲରେ ।