ଭିନ୍ନ ଭିନ୍ନ କମ୍ପାନିର ୪ ଡୋଜ ଟିକା ନେଇଥିଲେ ମହିଳା, ବିମାନବନ୍ଦରରେ ଟେଷ୍ଟ ପରେ ଜଣାପଡିଲା ହୋଇଛି କରୋନା ।
କନକ ବ୍ୟୁରୋ : ୪୪ ବର୍ଷୀୟା ଜଣେ ମହିଳା ଇନ୍ଦୋରରୁ ଦୁବାଇ ଏଆର ଇଣ୍ଡିଆର ବିମାନରେ ଯିବାପାଇଁ ପ୍ରସ୍ତୁତ ହେଉଥିଲେ । ବିମାନବନ୍ଦରରେ ମହିଳାଙ୍କ କରୋନା ପରୀକ୍ଷା କରିବା ପରେ ଜଣା ପଡିଲା ଯେ ମହିଳା କରୋନା ଦ୍ଵାରା ଆକ୍ରାନ୍ତ ହୋଇଛନ୍ତି । ତେଣୁ ତାଙ୍କୁ ବିମାନଯାତ୍ରାରୁ ବାରଣ କରାଯାଇଛି ବୋଲି ଜଣେ ଅଧିକାରୀ କହିଛନ୍ତି । ଅଧିକାରୀ ଜଣକ କହିଛନ୍ତି, ଦୁବାଇର ଏହି ଅଧିବାସୀ ଜଣକ ଦୁଇଟି ଭିନ୍ନ କମ୍ପାନିର ୪ ଡୋଜ୍ ଟିକା ନେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଇନ୍ଦୋର ସ୍ଵାସ୍ଥ୍ୟ ବିଭାଗର ଜଣେ ମେଡିକାଲ ଅଫିସର ଡାକ୍ତର ପ୍ରିୟଙ୍କା କୌରଭ କହିଛନ୍ତି, ଆଜି କୋଭିଡ୍ ଗାଇଡଲାଇନ ଅନୁଯାୟୀ ଇନ୍ଦୋର- ଦୁବାଇ ବିମାନରେ ୮୩ ଜଣ ଯାତ୍ରୀଙ୍କ ସାପ୍ତାହିକ ରାପିଡ୍ ଆରଟି-ପିସିଆର୍ ପରୀକ୍ଷା କରାଯାଇଥିଲା, ଏମାନଙ୍କ ମଧ୍ୟରୁ ଜଣେ ମହିଳା କରୋନା ଦ୍ଵାରା ଆକ୍ରାନ୍ତ ବୋଲି ଜଣାପଡିଛି । ବର୍ତ୍ତମାନ ମହିଳାଙ୍କ ଦେହରେ କୌଣସି ଲକ୍ଷଣ ନାହିଁ । ତେବେ ମହିଳା ବିମାନର ସ୍ଵାସ୍ଥ୍ୟ ଅଧିକାରୀଙ୍କୁ ଜଣାଇଛନ୍ତି, ତାଙ୍କୁ ୪ ଦିନ ପୂର୍ବରୁ ଥଣ୍ଡା ଓ କାଶ ହୋଇଥିଲା ।
ଜଣେ ଅଧିକାରୀ କହିଛନ୍ତି,ମହିଳା ଜଣକ ମଧ୍ୟପ୍ରଦେଶ ଭୋପାଳର ମହ ନାମକ ସ୍ଥାନକୁ ୧୨ ଦିନ ପୂର୍ବରୁ ତାଙ୍କ ନିକଟ ସମ୍ପର୍କୀୟଙ୍କ ବିବାହରେ ଯୋଗ ଦେବା ପାଇଁ ଆସିଥିଲେ । ଜାନୁଆରିରୁ ଅଗଷ୍ଟ ମଧ୍ୟରେ ସେ ସିନୋଫାର୍ମ ଓ ଫାଇଜର କମ୍ପାନିର ଦୁଇଟ୍ ଲେଖାଏଁ କୋଭିଡ୍-୧୯ ପ୍ରତିଷେଧକ ଟିକା ନେଇଥିଲେ । ସ୍ଵାସ୍ଥ୍ୟ ବିଭାଗ ଅଧିକାରୀ ତାଙ୍କୁ ଏବେ ଏକ ସରକାରୀ ହସ୍ପିଟାଲରେ ଭର୍ତ୍ତିକରିଛନ୍ତି ।