ପବଜିରୁ ପ୍ରେମ, ପାଗଳ କଲା ପ୍ରେମିକ । ୪ପିଲାଙ୍କ ସହ ଭାରତ ଆସିଲା ପ୍ରେମିକା । ପ୍ରେମିକ ପାଖରେ ପହଞ୍ଚିବା ପରେ …
କନକ ବ୍ୟୁରୋ : ପ୍ରେମ । କେତେବେଳେ ଆଉ କାହା ସହ ହୋଇଥାଏ ତାହା ଜଣାପଡ଼ିନଥାଏ । ପ୍ରେମ କେବେ ଦେଖେନାହିଁ ଜାତି କି ଧର୍ମ ଦେଖେନାହିଁ ବୟସର ତାରତମ୍ୟ । ସେଥିପାଇଁ ତ ପ୍ରେମକୁ ଅନ୍ଧ ବୋଲି କୁହାଯାଏ । ମାତ୍ର ଅଢ଼େଇ ଅକ୍ଷରର ଏହି ଶବ୍ଦ ଭିତରେ ଭରି ରହିଛି ଅନେକ ମହତ୍ୱ । ଯିଏ ପ୍ରେମ କରିଛି କେବଳ ସେ ହିଁ ଜାଣିଛି ପ୍ରେମ କ’ଣ । କିନ୍ତୁ ଯେତେବେଳେ ଭାରତ ପାକିସ୍ତାନ କଥା ଉଠେ ସେତେବେଳେ କେବଳ ଶତ୍ରୁତା ମନକୁ ଆସିଥାଏ । କିନ୍ତୁ ପାକିସ୍ତାନ କନିଆକୁ ଭାରତ ବର । ଶୁଣିବାକୁ ଟିକେ ଖଟକା ଲାଗୁଛି ନାଁ । ବାସ୍ତବରେ ଏହି ପ୍ରେମ ପଛରେ ରହିଛି ପବଜି । ଖେଳରୁ ଆରମ୍ଭ ହୋଇଛି ପ୍ରେମ ଆଉ ଏହି ପ୍ରେମକୁ ପାଇବା ପାଇଁ ମହିଳା ଶତ୍ରୁ ଦେଶରୁ ଆସି ଭାରତରେ ପହଞ୍ଚିଛନ୍ତି । ଆପଣ ଯଦି ଏମାନଙ୍କ ପ୍ରେମ କାହାଣୀ ଶୁଣିବେ ତାହେଲେ ନିଶ୍ଚିତ କହିବେ କି, ସତରେ କଣ ପ୍ରେମ ମଣିଷକୁ ଏତେ ପାଗଳ କରିପାରେ ।
Kanak News is now on WhatsApp
Join and get latest news updates delivered to you via WhatsApp
ପାକିସ୍ତାନର ୨୭ ବର୍ଷୀୟା ମହିଳା ସୀମା ହାଇଦର ଏବଂ ଭାରତର ଗ୍ରେଟର ନୋଏଡ଼ା ଅଂଚଳରେ ଗ୍ରୋସରୀ ଦୋକାନରେ କାମ କରୁଥିବା ସଚିନଙ୍କ ପ୍ରେମ କାହାଣୀ ଏବେ ଚର୍ଚ୍ଚାର ବିଷୟ ପାଲଟିଛି । ସୀମା-ସଚିନ, ପାକିସ୍ତାନ-ଭାରତ । ଏହି ଦୁଇ ପ୍ରେମୀଯୁଗଳଙ୍କ ମାଧ୍ୟମ ସାଜିଥିଲା ପବଜି । କରୋନା ମହାମାରୀ ସମୟରେ ଉଭୟ ଅନଲାଇନରେ ପରିଚୟ ହୋଇଥିଲେ । ୨୦୨୦ ମସିହାରେ ପବଜି ଖେଳରୁ ହିଁ ସେମାନଙ୍କ ସମ୍ପର୍କ ବଢ଼ିଥିଲା । ପ୍ରଥମେ ବନ୍ଧୁତା ଆଉ ପରେ ପ୍ରେମର ରୂପ ନେଇଥିଲା । ଶେଷରେ ପାକିସ୍ତାନରୁ ଆସି ଭାରତରେ ପହଞ୍ଚିଥିଲେ ସୀମା । ସୀମାଙ୍କ ସ୍ୱାମୀ ସାଉଦି ଆରବରେ ରୁହନ୍ତି । ପ୍ରଥମେ ପ୍ରଥମେ ସେମାନଙ୍କ ପରିବାର ଠିକସେ ଚଳୁଥିଲା । କିନ୍ତୁ ପରବର୍ତୀ ସମୟରେ ଛୋଟ ଛୋଟ କଥା ମାଡ଼ଧର କରୁଥିଲେ । ସାଉଦି ଆରବ ୪ବର୍ଷ ହେବ ଯାଇଥିବାବେଳେ ଘରକୁ ଆସିନାହାନ୍ତି ସୀମାଙ୍କ ସ୍ୱାମୀ । ଏହାରି ଭିତରେ ପବଜି ଖେଳରୁ ସଚିନଙ୍କ ସହ ପ୍ରେମ ହୋଇଯାଇଥିଲା । ଉଭୟ ବିବାହ କରିବା ପାଇଁ ମଧ୍ୟ ଯୋଜନା କରିଥିଲେ । ସୀମା ନିଜର ୪ ଛୁଆଙ୍କୁ ଧରି ସଚିନଙ୍କ ପାଖକୁ ଆସିବା ପାଇଁ ବାହାରିଥିଲେ । କିନ୍ତୁ ତାଙ୍କ ପାଖରେ ଏତେ ଟଙ୍କା କିମ୍ବା ଭାରତ ଆସିବା ପାଇଁ ଭିସା ନଥିଲା । ଶେଷରେ ସେ ଘରକୁ ୧୨ ଲକ୍ଷ ଟଙ୍କାରେ ବିକ୍ରି କରି ଭାରତ ଆସିବାକୁ ବାହାରିଥିଲେ । କିନ୍ତୁ ପାଖରେ ଭିସା ନଥିଲା ।
ନେପାଳ ଭିସା ନେଇଥିଲେ ସୀମା । କାଠମାଣ୍ଡୁରେ ଓହ୍ଲାଇ ବସ ଯୋଗେ ପୋଖରା ଯାଇଥିଲେ । ଏହାପରେ ସେ ଭାରତରେ ପହଚିଥିଲେ । ୪ ଛୁଆଙ୍କୁ ସାଙ୍ଗରେ ଧରିଥିବାବେଳେ କ୍ରମାଗତଭାବେ ବସ ବଦଳାଉଥିଲେ । ଯାହାଫଳରେ କାହାର ମଧ୍ୟ ସନ୍ଦେହ ହୋଇନଥିଲା । ଶେଷରେ ଯମୁନା ଏକ୍ସପ୍ରେସରେ ଆସି ସଚିନଙ୍କ ପାଖରେ ପହଂଚିଥିଲେ । ବାଟରେ ବହୁ ପୁଲିସ ଅଧିକାରୀ ତାଙ୍କୁ ପଚାରିଥିବାବେଳେ ସେ ତାଙ୍କ ନାମ ସୀମା ବୋଲି କହିଥିଲେ ଆଉ ନିଜକୁ ହିନ୍ଦୁ ବୋଲି ଦର୍ଶାଇଥିଲେ ।
ଉଭୟ ଏକ ଭଡ଼ାଘରେ ଆସି ରହିଥିଲେ । ସଚିନ ଏବଂ ସୀମା ଯେତେବେଳେ ଜଣେ ଓକିଲଙ୍କ ପରାମର୍ଶ ନେଇଥିଲେ ସେତେବେଳେ ସେମାନେ ଜଣାପଡ଼ିଥିଲେ । ଓକିଲ ତାଙ୍କୁ ଭିସା ମାଗିଥିବାବେଳେ ସେ ଦେଇପାରିନଥିଲେ । ପରେ ଆଇନଜୀବୀ ଜଣକ ଅନୁସନ୍ଧାନ କରିବା ସହ ପୁଲିସକୁ ଖବର ଦେଇଥିଲେ । ମୋବାଇନ ଫୋନ ଟ୍ରାକ କରିବା ସହ ସେମାନଙ୍କୁ ଧରିଥିଲେ । ସୀମା ସଚିନଙ୍କୁ ବିବାହ କରିବା ପାଇଁ ଜିଦ ଧରି୍ଥିବାବେଳେ ପୁଲିସ ଯାଂଚ କରୁଛି । ଏପରକି ପାକିସ୍ତାନ ହାଇ କମିଶନଙ୍କୁ ମଧ୍ୟ ଖବର ଦିଆଯାଇଛି । ତେବେ ଏମାନଙ୍କ ପ୍ରେମ କାହାଣୀ ଯିଏ ଶୁଣୁଛି ସେ ତାଜୁବ ହେଉଛି ।