ପାକିସ୍ତାନରେ ରାଜନୀତିର ହାଇଡ୍ରାମା : ଅନାସ୍ଥା ଭୋଟ ଆଗରୁ ଇସ୍ତଫା ଦେଲେ ବାଚସ୍ପତି; ଭୋଟିଂରେ ସାମିଲ ହେଲେନି ପିଟିଆଇ ସାଂସଦ
ସେପଟେ ଇସଲାମାବାଦ ହାଇକୋର୍ଟରେ ଇମ୍ରାନ ଖାନ ବିରଧରେ ମାମଲା ରୁଜୁ; ବିନା ଅନୁମତିରେ ନେତା ଓ ଉଚ୍ଚ ଅଧିକାରୀ ଦେଶ ଛାଡିବା ମନା
କନକ ବ୍ୟୁରୋ : ସୁପ୍ରିମକୋର୍ଟଙ୍କ ଅନାସ୍ଥା ପ୍ରସ୍ତାବ ଉପରେ ଭୋଟ କରିବା ପାଇଁ ଦେଇଥିବା ନିର୍ଦ୍ଦେଶକୁ ଟାଳିବା ପାଇଁ ଦିନ ତମାମ କସରତ ଚାଲିଥିଲା । ଶେଷରେ ସ୍ଥିତି ଏମିତି ହୋଇଥିଲା ଯେ ରାତି ସାଢେ ୧୨ଟା ସୁଦ୍ଧା ଅନାସ୍ଥା ଭୋଟ ନକଲେ ଇମ୍ରାନ ଖାନଙ୍କୁ କୋର୍ଟ ଅବମାନନା ମାମଲାରେ ଗିରଫ କରାଯିବ ବୋଲି ଚର୍ଚ୍ଚା ହୋଇଥିଲା । କିଛି ସମୟ ପରେ ସଂସଦକୁ ବାଚସ୍ପତି ଅସଦ କୈସର ଆସି ଇମ୍ରାନ ଦେଇଥିବା ଗୁପ୍ତ ଚିଠି ବାବଦରେ ସଂସଦକୁ ଜଣାଇ ଇସ୍ତଫା ଦେଇଥିଲେ । ଏହାପରେ ସମସ୍ତ ଇମ୍ରାନଙ୍କ ପାର୍ଟି ପିଟିଆଇର ସମସ୍ତ ସାଂସଦ ନେସନାଲ ଆସେମ୍ବ୍ଲିରୁ ବାହାରକୁ ଚାଲିଯାଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ସୁପ୍ରିମକୋର୍ଟଙ୍କ ନିର୍ଦ୍ଦେଶ ମୁତାବକ ଅନାସ୍ଥା ଉପରେ ଭୋଟ ପାଇଁ ପ୍ୟାନେଲ ଅଫ ଚେୟାର ମ୍ୟାନ ପିଏମଏଲଏନ ସାଂସଦ ଅୟାଜ ସଦିକଙ୍କୁ ବାଚସ୍ପତି ଦାୟିତ୍ୱ ଦେଇଥିଲେ । ଅନାସ୍ଥା ପ୍ରସ୍ତାବ ଉପରେ ଭୋଟ ଗ୍ରହଣ ସମୟରେ ନେସନାଲ ଆସେମ୍ବ୍ଲି ବାହାରେ ବିକ୍ଷୋଭ କରିଥିଲେ ପିଟିଆଇ କର୍ମକର୍ତା । ସେପଟେ ଇସଲାମାବାଦ ହାଇକୋର୍ଟରେ ଇମ୍ରାନ ଖାନ, ଶାହା ମହମ୍ମଦ କ୍ୟୁରେସୀ ଓ ଫବାଦ ଚୌଧୁରୀଙ୍କ ନାଁରେ ମାମଲା ରୁଜୁ ହୋଇଛି । ତାଙ୍କ ବିଦେଶ ଗସ୍ତ ଉପରେ ରୋକ ଲଗାଇବାକୁ କୋର୍ଟରେ ମାମଲା ରୁଜୁ ହୋଇଥିବା ସୂଚନା ମିଳିଛି । ଆସନ୍ତାକାଲି ଇସଲାମାବାଦ ହାଇକୋର୍ଟ ଏହି ମାମଲାର ଶୁଣାଣି କରିବେ ବୋଲି ସୂଚନା ମିଳିଛି ।