ଭାରତ ସହିତ କୂଟନୈତିକ ସମ୍ପର୍କ ଛିନ୍ନ କରିବ କି ପାକିସ୍ତାନ ?
କାଶ୍ମୀର ବିଛିନ୍ନତାବାଦୀ ନେତା ୟାସୀନ ମଲିକର ସ୍ତ୍ରୀ ମୁଶାଲକୁ ପ୍ରଧାନମନ୍ତ୍ରୀଙ୍କ ପରାମର୍ଶଦାତା ରୂପେ ନିଯୁକ୍ତି ।
ପାକିସ୍ତାନର ମଧ୍ୟବର୍ତୀକାଳୀନ (କେୟାର ଟେକର) ସରକାରର ପ୍ରଧାନମନ୍ତ୍ରୀ ଅନବର-ଉଲ-ହକ୍ ଗତକାଲି ତାଙ୍କର ମନ୍ତ୍ରିମଣ୍ଡଳ ଘୋଷଣା କରିଛନ୍ତି । ଏଥିରେ ସେ ୧୬ ଜଣ ମନ୍ତ୍ରୀ ଓ ୩ ଜଣ ପରମର୍ଶଦାତାଙ୍କୁ ନିଯୁକ୍ତି ଦେଇଛନ୍ତି । ପାକିସ୍ତାନର ବରିଷ୍ଟ ପତ୍ରକାର ମୂର୍ତଜା ସୋଲଙ୍ଗୀ ମଧ୍ୟ ସାମିଲ ଅଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହି ମନ୍ତ୍ରିମଣ୍ଡଳରେ ଭାରତୀୟ ଜେଲରେ ବନ୍ଦ ଥିବା କାଶ୍ମୀର ବିଛିନ୍ନତାବାଦୀ ନେତା ନେତା ୟାସୀନ ମଲିକର ସ୍ତ୍ରୀ ମୁଶାଲକୁ ପ୍ରଧାନମନ୍ତ୍ରୀଙ୍କ ବିଶେଷ ପରାମର୍ଶଦାତା ରୂପେ ନିଯୁକ୍ତି ମିଳିଛି ।
ପାକିସ୍ତାନ ସମ୍ବିଧାନ ଅନୁସାରେ ଦୈତ ନାଗରିକତା ଥିବା ବ୍ୟକ୍ତିଙ୍କୁ ପରାମର୍ଶଦାତା ରୂପେ ନିଯୁକ୍ତି ମିଳିପାରିବ କିନ୍ତୁ ସେମାନ ପୂର୍ଣକାଳୀନ ମନ୍ତ୍ରୀ ହେଇପାରିବେ ନାହିଁ । ମୁଶାଲଙ୍କ ପାଖରେ ପାକିସ୍ତାନ ସହ ବ୍ରିଟେନର ନାଗରିକତା ମଧ୍ୟ ରହିଛି ।
କଟ୍ଟର ଭାରତ ବିରୋଧୀ ରୂପେ ମୁଶାଲ ଜଣାଶୁଣା । କିଛିବର୍ଷ ତଳେ ସେ ଭାରତ ସହ ସମସ୍ତ କୂଟନୈତିକ ସମ୍ପର୍କ ଛିନ୍ନ କରିବା ସହ ଶିମଳା ରାଜିନାମା ରଦ୍ଦ କରିବାକୁ ବୟାନ ଦେଇଥିଲେ । ଏବେ କିଛିଦିନ ତଳେ ‘କାଶ୍ମୀର ଫାଇଲ୍ସ’ ଚଳଚ୍ଚିତ୍ର ଉପରେ ମନ୍ତବ୍ୟ ଦେଇ କହିଥିଲେ କି ‘କାଶ୍ମୀର ହେଉଛି ପାକିସ୍ତାନର ଅବିଚ୍ଛେଦ୍ୟ ଅଙ୍ଗ ଆମେ ଏହାକୁ ଯେମିତି ହେଲେ ଅକ୍ତିଆର କରିବୁ’ । ପାକିସ୍ତାନରୁ ସେ ନିଜ ଆତଙ୍କବାଦୀ ସ୍ୱାମୀ ୟାସୀନ ମଲିକକୁ ଜେଲରୁ ମୁକ୍ତ କରିବା ପାଇଁ ଆନ୍ଦୋଳନ ଚଳାଇଛନ୍ତି । ଏଥିରେ ତାଙ୍କର ନାବାଳିକା ଝିଅ ମଧ୍ୟ ସାମିଲ ଅଛି ।
ୟାସୀନ ମଲିକ କାଶ୍ମୀର ଆତଙ୍କବାଦରେ ଜଡ଼ିତ ଥିବା ଜାମୁ କାଶ୍ମୀର ଲିବରେସନ ଫ୍ରଣ୍ଟର(JKLF) ନେତା । ସ୍ଥାନୀୟ ଯୁବକମାନଙ୍କୁ ଭାରତ ବିରୋଧୀ ଆତଙ୍କବାଦୀ କାର୍ଯ୍ୟକଳାପରେ ଯୋଗଦେବା ପାଇଁ ପ୍ରବର୍ତ୍ତାଇ ଥାନ୍ତି ।
ୟାସୀନ ମଲିକକୁ ୨୦୨୨ରେ NIA କୋର୍ଟ ଟେରର ଫଣ୍ଡିଂ କେସ ଓ UPAA ଏବଂ ଦେଶ ବିରୋଧରେ ଯୁଦ୍ଧ ଘୋଷଣା କରିବା ଅପରାଧରେ ଆଜୀବନ କାରାଦଣ୍ଡ ଶୁଣାଇଛନ୍ତି । ତାଙ୍କୁ ଅନ୍ୟ ଦୁଇଟି ମାମଲାରେ ମଧ୍ୟ ୧୦ ବର୍ଷର କାରାଦଣ୍ଡ ହୋଇଛି । ୟାସୀନ ମଲିକ ବିରୋଧରେ ପାକିସ୍ତାନ ସହଯୋଗରେ କାଶ୍ମୀରରେ ଆତଙ୍କବାଦୀ ଗତିବିଧି ଓ ଆତଙ୍କବାଦୀଙ୍କୁ ଆର୍ଥିକ ସହଯୋଗ, ଅବୈଧ ଅସ୍ତ୍ରଶସ୍ତ୍ର ଯୋଗାଣ ଇତ୍ୟାଦି ପରି ବହୁ ମାମଲା ରୁଜୁ ହେଇଛି ।
ୟାସୀନ ମଲିକ ଉପରେ ୨୫ ଜାନୁଆରୀ ୧୯୯୦ରେ ଶ୍ରୀନଗରରେ ଭାରତୀୟ ବାୟୁସେନା କର୍ମଚାରୀଙ୍କ ଉପରେ ଆକ୍ରମଣ ପରି ସଙ୍ଗିନ ମାମଲା ଅଛି । ଏହି ଆକ୍ରମଣରେ ୪ ଜଣ ଯବାନ ଶହୀଦ ହୋଇଥିଲେ । ୟାସୀନ ମଲିକ ଏକ ସାକ୍ଷାତକାରରେ ଏହି ଘଟଣାର ପୃଷ୍ଟି ମଧ୍ୟ କରିଥିଲା ।
୧୯୯୦ରେ ଜାମୁ କାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ମୁଫତି ମହମ୍ମଦ ସଇଦଙ୍କ ଝିଅ ରୁବିଆ ସଇଦର ଅପହରଣ ପଛରେ ୟାସୀନ ମଲିକର ହାତ ଥିବାର ଅଭିଯୋଗ କରାଯାଏ । ୧୯୯୦ ଦଶକରେ ପଣ୍ଡିତମାନଙ୍କୁ କାଶ୍ମୀରରୁ ତଡିବା ପଛରେ ୟାସୀନ ମଲିକର ମୁଖ୍ୟ ଭୂମିକା ଥିଲା ।