ସୁସ୍ଥ ହେବେ ଜ୍ୱରରେ କମ୍ପୁଥିବା ମହାପ୍ରଭୁ । ଆଜିଠାରୁ ଠାକୁରଙ୍କୁ ଓଷଲାଗି
କନକ ବ୍ୟୁରୋ : ଦେବସ୍ନାନ ପୂର୍ଣ୍ଣିମାରେ ୧୦୮ ଗଡୁ ସୁବାସିତ ଜଳରେ ଅତ୍ୟଧିକ ସ୍ନାନ ପରେ ଜ୍ୱରରେ ପଡିଛନ୍ତି ମହାପ୍ରଭୁ । ଅଣସର ଘରେ ଦାରୁବିଗ୍ରଙ୍କ ଉପଚାର ପାଇଁ ଚାଲିଛି ଗୁପ୍ତ ଉପଚାର । ଶ୍ରୀଅଙ୍ଗଲାଗି ସେବକ ଦଇତାପତିମାନେ ଏହି ସେବା କରୁଛନ୍ତି । ଆଜି ଠାକୁରଙ୍କୁ ଓଷୁଅ ଲାଗି କରାଯିବ । ତେବେ ମହାପ୍ରଭୁଙ୍କ ଗୁପ୍ତ ନୀତି ମଧ୍ୟରେ ଫୁଲୁରୀ ତେଲ ଲାଗି ଏକ ଗୁରୁତ୍ୱପୂର୍ଣ୍ଣ ଅଂଶ । ବଡ ଓଡିଆ ମଠ ପକ୍ଷରୁ ଚତୁର୍ଦ୍ଧାବିଗ୍ରହଙ୍କ ଲାଗି ପୁଲୁରୀ ତେଲ ଯୋଗାଇ ଦିଆଯାଇଛି । ପ୍ରତିବର୍ଷ ଅଣସରରେ ମଠ ୬ ସେର ଏବଂ ନବକଳେବର ବର୍ଷରେ ୯ସେର ଫୁଲୁରୀ ତେଲ ଯୋଗାଇଦେଇଥାଏ ।
Kanak News is now on WhatsApp
Join and get latest news updates delivered to you via WhatsApp
ମଠର ମହନ୍ତ ଅଧିକାରୀ ବଂଶୀଧର ଦାସ ଗୋସ୍ବାମୀଙ୍କ କହିବା ମୁତାବକ, ଫୁଲୁରି ତେଲ ଗୋଟିଏ ବର୍ଷ ପୂର୍ବରୁ ପ୍ରସ୍ତୁତି ଆରମ୍ଭ ହୁଏ । ପୂର୍ବବର୍ଷ ହେରାପଞ୍ଚମୀ ତିଥି ସନ୍ଧ୍ୟା ସମୟରେ ମହାପ୍ରଭୁଙ୍କ ପାଇଁ ଉତ୍ସର୍ଗୀକୃତ ହୋଇ ରହିଥିବା ଦୁଇଟି ଘଡ଼ିରେ କିଛି ଘଣା ପେଡ଼ା ରାଶି ତେଲ, ଔଷଧୀୟ ଚେରମୂଳି ଓ ସୁବାସିତ ତୈଳ ମିଶ୍ରିତ କରି ଏହାକୁ ମଠ ପରିସରରେ ଗାତ ଖୋଳି ପୋତି ଦିଆଯାଏ । ଫୁଲୁରି ତେଲ ପ୍ରସ୍ତୁତି ଗୁପ୍ତ ନୀତି ହୋଇଥିବାରୁ ମଠର ମଠାଧୀଶ ଓ ମଠର ପୁରୋଧାଙ୍କ ବ୍ୟତିରେକ ଅନ୍ୟ କେହି ଦେଖନ୍ତି ନାହିଁ ବୋଲି ସେ କହିଛନ୍ତି ।
ମଠାଧୀଶ ବଂଶୀଧର ଗୋସ୍ବାମୀଙ୍କ କହିବା ମୁତାବକ, ବର୍ଷକ ତଳୁ ଏହି ଘଣା ପେଡ଼ା ରାଶି ତେଲ ଓ ସୁବାସିତ ଫୁଲ ମିଶ୍ରିତ କରି ଘଡ଼ିରେ ମୁଦ ଦିଆଯାଇ ଏହାକୁ ପୋତାଯାଉଥିଲେ ହେଁ ଋତୁ ଅନୁଯାୟୀ ଯେଉଁ ଫୁଲ ଫୁଟେ ତାହା ମଧ୍ୟ ସେଇ ତେଲରେ ମିଶାଯାଏ । ସ୍ନାନ ପୂର୍ଣ୍ଣିମା ପୂର୍ବଦିନ ଏହାକୁ ମାଟି ତଳୁ ବାହାର କରାଯାଇ ଗୋଟିଏ ଘରେ ସାଇତି ରଖାଯାଏ । ଅନବସରର ୫ମ ଦିନ ହିଁ ଏହାକୁ ମହାପ୍ରଭୁଙ୍କୁ ଲାଗି ନିମନ୍ତେ ମଠ ପକ୍ଷରୁ ଶ୍ରୀମନ୍ଦିରକୁ ପଠାଇ ଦିଆଯାଏ । ସେଠାରେ ପୁନର୍ବାର ଅମୁଣିଆ ପ୍ରସ୍ତୁତ କରି ମହାପ୍ରଭୁଙ୍କୁ ଲାଗି କରାଯାଏ ।