ଓଡ଼ିଆ ହକି ଖେଳାଳି ନିଜ ମାଟିରେ ପାଦ ଦେବା ପରେ ଦେଖିବାକୁ ମିଳିଲା ଭାବପ୍ରବଣତାର ଦୃଶ୍ୟ । ଶିକ୍ଷକଙ୍କୁ ଦେଖି କାନ୍ଦି ପକାଇଲେ ଅମିତ ରୋହିଦାସ । ଏପଟେ ନମିତା ଟପ୍ପୋଙ୍କୁ ସୁରକ୍ଷା ଦେଲେ ପୁଲିସ ଭଉଣୀ ପ୍ରମିତା ଟପ୍ପୋ ।
କନକ ବ୍ୟୁରୋ: ଯେତେବେଳେ ଅଲିମ୍ପିକ୍ସରେ ଜବରଦସ୍ତ ପ୍ରଦର୍ଶନ କରି ହକି ଦଳର ଦୁଇ ଓଡିଆ ଖେଳାଳି ଭୁବନେଶ୍ୱରରେ ପହିଁଚିଥିଲେ, ସେତେେବେଳେ ଯେମିତି ଉତ୍ସବର ମାହୋଲ ସୃଷ୍ଟି ହୋଇଥିଲା । ଖେଳାଳିମାନଙ୍କୁ ସ୍ୱାଗତ କରିବା ସହ ବିମାନବନ୍ଦରରୁ ହୋଟେଲ ପର୍ଯ୍ୟନ୍ତ କଡା ସୁରକ୍ଷା ବ୍ୟବସ୍ଥା କରାଯାଇଥିଲା । ଲଢ଼ୁଆ ପ୍ରଦର୍ଶନ କରି ଦେଶ ପାଇଁ ନୂଆ ଅଧ୍ୟାୟ ସୃଷ୍ଟି କରିଥିବାରୁ ଦୁଇ ଜଣଙ୍କୁ ନିଆରା ଢ଼ଙ୍ଗରେ ସ୍ୱାଗତ କରାଯାଇଥିଲା । ତେବେ ଏହି ସମୟରେ ଦେଖିବାକୁ ମିଳିଥିଲା ଏକ ନିଆରା ଦୃଶ୍ୟ ।
Kanak News is now on WhatsApp
Join and get latest news updates delivered to you via WhatsApp
ଦେଶ ପାଇଁ ଗୌରବ ଆଣି ଫେରିଥିବା ଗୋଟିଏ ଭଉଣୀର ସୁରକ୍ଷା ଦାୟିତ୍ୱ ଆଉ ଜଣେ ଭଉଣୀ ଉପରେ ନ୍ୟସ୍ତ ଥାଏ । ଟୋକିଓ ଅଲିମ୍ପିକ୍ସରେ ଲଢ଼ୁଆ ପ୍ରଦର୍ଶନ କରି ଓଡିଶା ଫେରିବା ପରେ ନମିତା ଟପ୍ପୋଙ୍କ ସୁରକ୍ଷା ଦାୟିତ୍ୱରେ ଥିଲେ ତାଙ୍କ ଭଉଣୀ ପ୍ରମିତା ଟପ୍ପୋ । ଦୁଇ ଭଉଣୀ ହୁଏତ ସ୍ୱପ୍ନରେ କେବେ ବି ଭାବି ନଥିବେ ଏଭଳି ମୁହୂର୍ତ୍ତ ଆସିବ । ଯେତେବେଳେ ଜଣେ ଆଉ ଜଣଙ୍କୁ ସୁରକ୍ଷା ଦେଉଥିବେ । ହେଲେ ସୌଭାଗ୍ୟବଶତଃ ନମିତାଙ୍କ ସୁରକ୍ଷା ଦାୟିତ୍ୱରେ ଥିଲେ ତାଙ୍କ ଭଉଣୀ ପ୍ରମିତା ଟପ୍ପୋ ।
ସେହିପରି ଜଣେ ଗୁରୁ ପାଇଁ ଏହାଠାରୁ ବଳି ବଡ ସଫଳତା ଆଉ କଣ ବା ହୋଇପାରେ । ଯେତେବେଳେ ଜଣେ ଶିଷ୍ୟକୁ ନିଜ ହାତରେ ବିଜୟର ପଦକ ପିନ୍ଧାଉଥିବ ଆଉ ସ୍ୱାଗତ ଜଣାଉଥିବ । ଛଳ ଛଳ ଆଖିରେ ଶୁଭେଛା ଜଣାଉଥିବ ଆଉ ଶିଷ୍ୟ ବି ଭାବବିହ୍ୱଳ ହୋଇପଡୁଥିବ । ଅଲିମ୍ପିକ୍ସରୁ ଫେରିଥିବା ଓଡିଆ ଖେଳାଳି ଅମିତ୍ ରୋହିଦାସଙ୍କୁ କଳିଙ୍ଗଷ୍ଟାଡିୟମରେ ସମ୍ବର୍ଦ୍ଧନା ଦିଆଯିବା ଅବସରରେ ପ୍ରିୟ ଶିଶ୍ୟକୁ ଭେଟିବା ପାଇଁ ଷ୍ଟାଡିୟମରେ ପହଁଚି ଯାଇଥିଲେ ଅମିତଙ୍କ ପୂର୍ବତନ କ୍ରୀଡା ଶିକ୍ଷକ ଅଭୟ ପଟ୍ଟନାୟକ । ଗେଟ୍ ପାଖରେ କିଛି ସମୟ ଅପେକ୍ଷା କରିବା ପରେ ତାଙ୍କ ଭିତରକୁ ନିଆଯାଇଥିଲା । ସାଥିରେ ଆଣିଥିବା ଏକ ଗୋଲାପ ଫୁଲ ଅମିତ୍ଙ୍କୁ ଦେଇ ଶୁଭେଛା ଜଣାଇଥିଲେ । ତେବେ ଆପଣ ଜାଣି ଆଶ୍ଚଯ୍ୟ ହେବେ, ରାଉରକେଲା ପାନପୋଷ ଷ୍ଟାଡିୟମରେ ଅମିତଙ୍କୁ ଟ୍ରେନିଂ ଦେଉଥିଲେ ଅଭୟ ।
ଟୋକିଓରୁ ଫେରିଥିବା ଏହି ଖେଳାଳି ଏବେ ଅନ୍ୟମାନଙ୍କ ପାଇଁ ପ୍ରେରଣାର ଉତ୍ସ ହୋଇଛନ୍ତି ଆଉ ସେପଟେ ସ୍ୱାଗତ କରିବା ପାଇଁ ଅପେକ୍ଷା କରିଛି ସେମାନଙ୍କ ଗାଁ ମାଟି ।