କନକ ବ୍ୟୁରୋ: ପକ୍କା ଘର ମିଳିନି କିନ୍ତୁ ଘର ମରାମତି କରିବା ପାଇଁ ଟଙ୍କା ଆସିଛି । ପକ୍କା ଘର କରିନଥିବା ଲୋକଙ୍କୁ ଆସିଛି ଘର ମରାମତି ଟଙ୍କା । ଏଥିରୁ ଅନୁମାନ କରାଯାଉଛି, ଲୋକଙ୍କୁ ପକ୍କା ଘର ମିଳି ନଥିବା ବେଳେ ସରକାରୀ କାଗଜ ପତ୍ରରେ ଘର ଯୋଗାଇ ଦିଆଯାଇଥିବା ଦର୍ଶା ଯାଇଛି । ଘର ମରାମତି ସହାୟତ ପୋଷ୍ଟର ଘର କାନ୍ଥରେ ମରାଯିବା ପରେ ପଦାକୁ ଆସିଲା ଆବାସ ଦୁର୍ନିତିର ସତ ।
Kanak News is now on WhatsApp
Join and get latest news updates delivered to you via WhatsApp
ଗଞ୍ଜାମ ବେଗୁନିଆପଡା ବ୍ଲକ ପି.ନୂଆ ଗାଁର ରାମ ଦାସଙ୍କ ଘର କାନ୍ଥରେ ଲାଗିଛି ମୁଖ୍ୟମନ୍ତ୍ରୀଙ୍କ ଫଟୋ ଥିବା ଏହି ପୋଷ୍ଟର । ଘର ମରାମତି ପାଇଁ ୩ ହଜାର ଟଙ୍କା ସହାୟତା ଯୋଗାଇ ଦିଆଯାଇଥିବା ଏଥିରେ ଉଲ୍ଲେଖ ରହିଛି । ହେଲେ ଆପଣମାନେ ଜାଣି ଆଶ୍ଚର୍ଯ୍ୟ ହେବେ, ରାମଙ୍କୁ ପକ୍କାଘର ମିଳିନାହିଁ । କିନ୍ତୁ ପକ୍କା ଘର ତାଲିକାରେ ରାମ ଦାସଙ୍କୁ ୨୦୦୭-୦୮ରେ ପକ୍କା ଘର କାର୍ଯ୍ୟାଦେଶ ଦିଆଯାଇଥିବା ଦର୍ଶା ଯାଇଛି । ସେହିଭଳି ପି.ନୂଆ ଗାଁର ଜୟନ୍ତି ଦାସ, ସ୍ୱାମୀ ରମେଶ ଦାସଙ୍କୁ ୨୦୧୨-୧୩ରେ ପକ୍କା ଘର ଦିଆଯାଇଥିବା ଦର୍ଶାଇ, ତାଙ୍କୁ ବି ଘର ମରାମତି ସହାୟତା ମିଳିଛି । ଦାଦନ ଶ୍ରମିକ ଭାବେ କାମ କରୁଥିବା ରମେଶଙ୍କ ପରିବାର ଟିଣ ଛପର ଘରେ ରହୁଥିବା ବେଳେ ତାଙ୍କ କାନ୍ଥରେ ବି ପୋଷ୍ଟର ଲାଗିଛି ।
ବୁରୁଝରୀ ପଂଚାୟତର ଅନ୍ୟ ଗାଁରେ ମଧ୍ୟ ଏଭଳି ଘଟଣା ସାମ୍ନାକୁ ଆସିଛି । ପ୍ରକୃତରେ ଲୋକଙ୍କୁ ପକ୍କା ଘର ମିଳିନଥିବା ବେଳେ ସରକାରୀ କାଗଜ ପତ୍ରରେ ଘର ଯୋଗାଇ ଦିଆଯାଇଥିବା ଦର୍ଶାଯାଇଛି । ତେଣୁ ଏହାର ନିରପେକ୍ଷ ତଦନ୍ତ ହେଲେ ଆବସ ଟଙ୍କା ହଡପ’ର ସତ ସାମ୍ନାକୁ ଆସିବ ବୋଲି ସ୍ଥାନୀୟ ବାସିନ୍ଦା କହିଛନ୍ତି । ମୁଖ୍ୟମନ୍ତ୍ରୀଙ୍କ ପକ୍କା ଘର ମରାମତି ସହାୟତା ପ୍ରଦାନ ପରେ ପଦାରେ ପଡିଛି ଆବାସ ଯୋଜନର ଦୁର୍ନିତିର ଗୁମର ।