କୃଷ୍ଣପ୍ରସାଦରୁ ବିଜେପି ନେତାଙ୍କୁ ଟାର୍ଗେଟ କଲେ ପାଣ୍ଡିଆନ । କହିଲେ ଏ ଅଞ୍ଚଳର ବିକାଶ ପାଇଁ ଥରୁଟିଏ ମଧ୍ୟ ସିଏମଓକୁ ଯାଇନାହାନ୍ତି ବିଜେପି ବିଧାୟକ ।
କନକ ବ୍ୟୁରୋ : କୃଷ୍ଣପ୍ରସାଦରେ ବିଜେଡି ନେତାଙ୍କ ପ୍ରଚାର କରିଛନ୍ତି ଭିକେ ପାଣ୍ଡିଆନ । ବିରୋଧୀ ବିଜେପିକୁ ଟାର୍ଗେଟ କରି ପାଣ୍ଡିଆନ କହିଛନ୍ତି, କିଛି ନେତା ଏବେ ଆସି କହୁଛନ୍ତି ଚିଲିକାରେ ସେତୁ କରିବେ । ୨୦୧୪ରେ କେନ୍ଦ୍ରମନ୍ତ୍ରୀ ନୀତିନ ଗଡକରୀ ଚିଲିକା ଉପରେ ସେତୁ କରିବାକୁ କହିଥିଲେ । କିନ୍ତୁ ଏଯାଏଁ ଚିଲିକା ଉପରେ ସେତୁଟିଏ ହୋଇପାରିଲାନି । ସେହିଭଳି ୨୦୨୩ରେ କେନ୍ଦ୍ରମନ୍ତ୍ରୀ ଭୂପେନ୍ଦ୍ର ଯାଦବ ସ୍ପଷ୍ଟ କରିଛନ୍ତି, ଚିଲିକା ଉପରେ ସେତୁ ହୋଇପାରିବନି । କିନ୍ତୁ ଏବେ ବିଜେପି ନେତା କହୁଛନ୍ତି ଚିଲିକା ଉପରେ ସେତୁ ହେବ । ବ୍ରହ୍ମଗିରିବାସୀଙ୍କୁ ଭୁଆଁ ବୁଲାଉଛନ୍ତି ବିଜେପି ନେତା । ଚିଲିକା ଉପରେ କେବଳ ନବୀନ ହିଁ ସେତୁ ନିର୍ମାଣ କରିପାରିବେ । ମହାନଦୀ ଉପରେ ୭ଟି ସେତୁ ନିର୍ମାଣ ହୋଇଛି । ବୈତରଣୀ ଉପରେ ୫ଟି, ବ୍ରାହ୍ମଣୀ ଉପରେ ସେତୁ ନିର୍ମାଣ ହୋଇଛି । ନକ୍ସଲ ପ୍ରଭାବିତ ମାଲକାନଗିରିରେ ମଧ୍ୟ ସେତୁ ନିର୍ମାଣ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ତେଣୁ ଚିଲିକା ଉପରେ ମଧ୍ୟ ନବୀନ ପଟ୍ଟନାୟକ ସେତୁ ନିର୍ମାଣ କରିବେ । କିନ୍ତୁ ଏହି ସେତୁ ନିର୍ମାଣ ପାଇଁ କେନ୍ଦ୍ର ସରକାରର ପରିବେଶ ବିଭାଗର ଅନୁମତି ଆବଶ୍ୟକ । କେନ୍ଦ୍ରରେ ବିଜେପି ସରକାର ଥିଲେ ମଧ୍ୟ ପରିବେଶ ମଞ୍ଜୁରୀ ମିଳୁନି ।
Kanak News is now on WhatsApp
Join and get latest news updates delivered to you via WhatsApp
ଗତ ନିର୍ବାଚନରେ ଏହି ଅଞ୍ଚଳରୁ ବିଜେପି ପ୍ରାର୍ଥୀ ବିଜୟୀ ହୋଇଥିଲେ ମଧ୍ୟ ଚିଲିକା ଉପରେ ସେତୁଟିଏ କରିବାକୁ ପ୍ରୟାସ କଲେ ନାହିଁ । କିନ୍ତୁ ନବୀନ କହିଛନ୍ତି, ଚିଲିକା ଉପରେ ସେତୁ ନିର୍ମାଣ ପାଇଁ ଯାହା ବି ଟଙ୍କା ଆବଶ୍ୟକ ଦିଆଯିବ କିନ୍ତୁ କେନ୍ଦ୍ର ସରକାର ପରିବେଶ ମଞ୍ଜୁରୀ ଦେବା ଆବଶ୍ୟକ ।ପରିବେଶ ମଞ୍ଜୁରୀ ମିଳିବାର ୩ ବର୍ଷ ମଧ୍ୟରେ ସେତୁ ନିର୍ମାଣ ହେବ । ଚିଲିକାର କୃଷ୍ଣପ୍ରସାଦ ଅଞ୍ଚଳବାସୀଙ୍କୁ ବିଜେପି ଠକିଚାଲିଛି । ଫୋନି ବାତ୍ୟାରେ କୃଷ୍ଣପ୍ରସାଦ ସବୁଠୁ ଅଧିକ କ୍ଷତିଗ୍ରସ୍ତ ହୋଇଥିଲା । ସେତେବେଳେ ଲୋକଙ୍କ ସାଥୀରେ ଛିଡା ହୋଇଥିଲେ ମୁଖ୍ୟମନ୍ତ୍ରୀ । ନିଜ ଦଳର ନେତାଙ୍କୁ ପଠାଇ ପଞ୍ଚାୟତ ପଞ୍ଚାୟତରେ ରହିବା ଓ ଖାଇବାର ବ୍ୟବସ୍ଥା କରିଥିଲେ ।
ଏହାସହ ବିଜେପି ବିଧାୟକ ଲଳିତେନ୍ଦୁଙ୍କୁ ଟାର୍ଗେଟ କରି ପାଣ୍ଡିଆନ କହିଛନ୍ତି, ବ୍ରହ୍ମଗିରିର ବିକାଶ ପାଇଁ ଏଠାକାର ବିଧାୟକ ମଧ୍ୟ ଥରୁଟିଏ ମଧ୍ୟ ମୁଖ୍ୟମନ୍ତ୍ରୀଙ୍କ ଅଫିସକୁ ଗଲେ ନାହିଁ । କିନ୍ତୁ ବିଜେଡି ପ୍ରାର୍ଥୀ ଉମା ସାମନ୍ତରାୟ ବାରମ୍ବାର ସିଏମଓକୁ ଆସି ଅଞ୍ଚଳର ବିକାଶ ପାଇଁ ଲଢେଇ କରିବେ । ସେହିଭଳି ଓଡ଼ିଶାର କୌଣସି ରୋଗୀ ମୁମ୍ବାଇକୁ ଗଲେ ଅରୂପ ପଟ୍ଟନାୟକ ସହଯୋଗ କରିଥାନ୍ତି । ସେଥିପାଇଁ ନିଜ ମାଟିର ସେବା କରିବାକୁ ଅରୂପଙ୍କୁ ବାଛିଛନ୍ତି ନବୀନ । ଜୁନ୍ ୯ରେ ମୁଖ୍ୟମନ୍ତ୍ରୀ ଭାବେ ନବୀନ ପଟ୍ଟନାୟକ ଶପଥ ନେବା ପରେ ପ୍ରଥମ ଦସ୍ତଖତରେ ମାଗଣା ବିଜୁଳି, ଦ୍ୱିତୀୟ ଦସ୍ତଖତରେ ସଭିଙ୍କୁ ବିଏସକେୱାଇ ଓ ତୃତୀୟ ଦସ୍ତଖତରେ ମିଶନ ଶକ୍ତି ମା’ଙ୍କୁ ଭତ୍ତା ପାଇଁ ନିଷ୍ପତ୍ତି ନେବେ । ତେଣୁ ବିଜେଡି ପ୍ରାର୍ଥୀଙ୍କ ସପକ୍ଷରେ ଭୋଟ ଦେବାକୁ ଅପିଲ କରିଛନ୍ତି ପାଣ୍ଡିଆନ ।