ସୁନା ଆଣିଲେ ସୁନାପୁଅ । ଜାଭେଲିନ୍ ଥ୍ରୋରେ ସମସ୍ତଙ୍କୁ ପଛରେ ପକାଇ ସ୍ୱର୍ଣ୍ଣ ପଦକ ଜିତିଲେ ନୀରଜ ଚୋପ୍ରା । ୧୦୦ ବର୍ଷର ପ୍ରତୀକ୍ଷାର ହେଲା ଅନ୍ତ
କନକ ବ୍ୟୁରୋ: ଅଲିମ୍ପିକ୍ସରେ ଭାରତକୁ ଏମିତି ଏକ ସଫଳତା ମିଳିଛି, ଯାହା ଇତିହାସରେ ସ୍ୱର୍ଣ୍ଣିମ ଅକ୍ଷରରେ ଲିପିବଦ୍ଧ ହୋଇରହିବ । ଜାଭେଲିନ୍ ଥ୍ରୋରେ ସ୍ୱର୍ଣ୍ଣ ପଦକ ଜିତି ଐତିହାସିକ ସଫଳତା ପାଇଛନ୍ତି ନୀରଜ ଚୋପ୍ରା । ୧୦୦ ବର୍ଷ ଧରି ଭାରତର ଆଶା ଆକାଂକ୍ଷାକୁ ପୂର୍ଣ୍ଣ କରିଛନ୍ତି ହରିୟାଣା ପାନିପଥ ନିକଟ ଖଣ୍ଡ୍ରା ଗାଁର ଜଣେ ଚାଷୀଙ୍କ ପୁଅ । ମାତ୍ର ୨୩ ବର୍ଷରେ ଇତିହାସ ରଚିଛନ୍ତି ଭାରତର ଷ୍ଟାର ଆଥଲେଟ୍ ନୀରଜ ଚୋପ୍ରା ।
Kanak News is now on WhatsApp
Join and get latest news updates delivered to you via WhatsApp
ଜାଭେଲିନ୍ ଥ୍ରୋ ଫାଇନାଲର ଦ୍ୱିତୀୟ ରାଉଣ୍ଡରେ ୮୭.୫୮ ମିଟର ଜେଭେଲିନ୍ ଫିଙ୍ଗି ଏହି ସଫଳତା ହାସଲ କରିଛନ୍ତି ଭାରତର ଏହି ସୁନା ପୁଅ । ସ୍ୱର୍ଣ୍ଣ ପଦକ ହାସଲ କରିବା ପରେ ନୀରଜଙ୍କୁ ୬ କୋଟି ଟଙ୍କା, ପଂଚକୁଲାରେ ବଙ୍ଗଳା ଓ କ୍ଲାସ ୱାନ୍ ଅଫିସର ଚାକିରି ଦେବାକୁ ଘୋଷଣା କରିଛନ୍ତି ହରିୟାଣା ମୁଖ୍ୟମନ୍ତ୍ରୀ । ନୀରଜଙ୍କ ସଫଳତା ପରେ ପରେ ସାରା ଦେଶରୁ ଶୁଭେଚ୍ଛା ସୁଅ ଛୁଟିଛି । ବାଜା ବଜାଇ, ବାଣ ଫୁଟାଇ, ମିଠା ବାଂଟି ଖୁସ ମନାଉଛନ୍ତି ଦେଶବାସୀ । ରାଷ୍ଟ୍ରପତି, ପ୍ରଧାନମନ୍ତ୍ରୀ ନୀରଜଙ୍କୁ ଶୁଭେଚ୍ଛା ଜଣାଇଛନ୍ତି । ପ୍ରଧାନମନ୍ତ୍ରୀ ଟ୍ୱିଟ କରି କହିଛନ୍ତି, ନୀରଜଙ୍କ ଏହି ସଫଳତା ସବୁ ଦିନ ପାଇଁ ମନେ ରହିବ ।
୨୦୦୮ରେ ଅଭିନବ ବିନ୍ଦ୍ରା ସ୍ୱର୍ଣ୍ଣ ପଦକ ହାସଲ କରିଥିଲେ । ନୀରଜ ସ୍ୱର୍ଣ୍ଣ ଜିତିବା ପରେ ଅଲିମ୍ପିକ୍ସରେ ଭାରତର ନୂଆ ଯୁଗ ଆରମ୍ଭ ହୋଇଛି । ଟୋକିଓ ଅଭିଯାନ ରୂପାରେ ଆରମ୍ଭ ହୋଇ ସୁନାରେ ଶେଷ ହୋଇଛି । ଟୋକିଓ ଅଲିମ୍ପିକ୍ସରେ ଭାରତ ତା’ର ଶ୍ରେଷ୍ଠ ପ୍ରଦର୍ଶନ ଦେବାରେ ସମର୍ଥ ହୋଇଛି । ଗୋଟିଏ ସ୍ୱର୍ଣ୍ଣ, ଦୁଇଟି ରୌପ୍ୟ ଓ ୪ଟି କାଂସ୍ୟ ସହ ମୋଟ ୭ଟି ପଦକ ହାସଲ କରିଛି ଭାରତ ।
ନୀରଜଙ୍କ ଏହି ସଫଳତା ପଛରେ ତାଙ୍କର ଓଡ଼ିଶା ଲିଙ୍କକୁ ସାମନାକୁ ଆଣିଛନ୍ତି କ୍ରୀଡ଼ା ସଚିବ ଭିନିଲ କ୍ରିଷ୍ଣା । କହିଛନ୍ତି ୨୦୧୭ରେ ଭୁବନେଶ୍ୱର କଳିଙ୍ଗ ଷ୍ଟାଡିୟମରେ ଅଲିମ୍ପିକ୍ସ ପାଇଁ ପ୍ରସ୍ତୁତି କରିଥିଲେ ନୀରଜ । ଆଉ ପରବର୍ତି ସମୟରେ ଓଡ଼ିଶାର ଏହି ଅଭ୍ୟାସ ତାଙ୍କ ସଫଳତାର ଅଂଶ ହୋଇଛି ।