କନକ ବ୍ୟୁରୋ: ନାଗପୁରରେ ଘଟିଛି ହୃଦୟ ବିଦାରକ ଘଟଣା । କାରରେ ବସିଥିବା ପତ୍ନୀ ଓ ପୁଅକୁ କାର ସହ ନିଆଁ ଲଗାଇଦେବା ପରେ ନିଜ ଦେହରେ ପେଟ୍ରୋଲ ଢାଲି ଆତ୍ମହତ୍ୟା କରିଛନ୍ତି ବ୍ୟବସାୟୀ ।
Kanak News is now on WhatsApp
Join and get latest news updates delivered to you via WhatsApp
ପୋଲିସର ପ୍ରାଥମିକ ସୂଚନା ମୁତାବକ, ନାଗପୁର ଜୟତାଲାରେ ରହୁଥିବା ବ୍ୟବସାୟୀ ରାମରାଜ ଭଟ୍ଟ ମଙ୍ଗଳବାର ଅପରାହ୍ନରେ ବୁଲିବାକୁ ଯିବା କଥା କହି ପୁଅ ଓ ସ୍ତ୍ରୀକୁ ଧରି ଘରୁ ବାହାରିଥିଲେ । ହେଲେ ବାଟରେ କାର ରଖି ଆଣ୍ଟାସିଡ୍ ନାଁ କହି ବିଷ ପିଇବାକୁ କହିଥିଲେ । ହେଲେ ବିନା କାରଣରେ ଆଣ୍ଟସିଡ ପିଇବାକୁ ମନା କରିଦେଇଥିଲେ ପୁଅ ଓ ପତ୍ନୀ । ଫଳରେ ଡିକିରେ ରଖିଥିବା ପେଟ୍ରୋଲ ଆଣି କାର ଉପରେ ଢାଳିଦେଇଥିଲେ ଓ ନିଆଁ ଲଗାଇଥିଲେ । ପରେ ପରେ ନିଜ ଦେହରେ ମଧ୍ୟ ପେଟ୍ରୋଲ ଛିଞ୍ଚି ଆତ୍ମହତ୍ୟା କରିଥିଲେ । ଫଳରେ ଘଟଣାସ୍ଥଳରେ ହିଁ ବ୍ୟବସାୟୀ ରାମରାଜଙ୍କର ମୃତ୍ୟୁ ହୋଇଥିବାବେଳେ ଲୋକେ ତାଙ୍କ ପୁଅ ଓ ପତ୍ନୀଙ୍କୁ ଗୁରୁତର ଅବସ୍ଥାରେ ଉଦ୍ଧାର କରିଥିଲେ । ଦୁହେଁ ଜୀବନ ମରଣ ସହ ସଂଘର୍ଷ କରୁଛନ୍ତି । ତେବେ ବ୍ୟବସାୟରେ କ୍ଷତି ଯୋଗୁଁ ରାମରାଜ ଏପରି ପଦକ୍ଷେପ ନେଇଥିବା କୁହାଯାଉଛି ।
ପୋଲିସ କହିବା ମୁତାବକ, ରାମରାଜଙ୍କର ଏକ ନଟବୋଲ୍ଟ ତିଆରି ଫ୍ୟାକ୍ଟ୍ରି ଥିଲା । ସେ ବିଭିନ୍ନ କମ୍ପାନୀ ଗୁଡିକୁ ସପ୍ଲାଇ କରୁଥିଲେ । ହେଲେ କରୋନା ଠାରୁ ତାଙ୍କ ବ୍ୟବସାୟ ମାନ୍ଦା ପଡିଥିଲା । ପୁଅ ନନ୍ଦନ ଭଟ୍ଟ ମଧ୍ୟ ଜଣେ ଇଞ୍ଜିନିୟର ଥିଲେ ବି କରୋନା ଯୋଗୁଁ ଚାକିରି ହରାଇଥିଲେ । ଫଳରେ ପରିବାରରେ ଆର୍ଥିକ ଅନଟନ ନେଇ ଅଶାନ୍ତି ଲାଗିରହୁଥିଲା । ଯାହାକୁ ନେଇ ବ୍ୟବସାୟୀ ରାମରାଜ ଏଭଳି ଚରମ ପଦକ୍ଷେପ ନେଇଥିଲେ ।
ଏହାସହ ବ୍ୟବସାୟୀଙ୍କ ଘରୁ ମଧ୍ୟ ଏକ ସୁଇସେଇଡତ ନୋଟ୍ ପୋଲିସର ହସ୍ତଗତ ହୋଇଛି, ଯେଉଁଥିରେ ମଧ୍ୟ ଆର୍ଥିକ ସସସ୍ୟାକୁ ନେଇ ବ୍ୟବସାୟୀଙ୍କ ମାନସିକ ଅବସାଦର ପ୍ରମାଣ ମିଳୁଛି । ଏବଂ ସେ ଆତ୍ମହତ୍ୟା କରିବାକୁ ଚାହୁଁଥିବା ମଧ୍ୟ ଏହି ସୁଇସାଇଡ ନୋଟରେ ଉଲ୍ଲେଖ କରାଯାଇଛି ।