ମେକ୍ ଇନ୍ ଓଡିଶାରେ ସ୍ୱପ୍ନ ଦେଖାଇଲେ ଦେଶର ବଡ ବଡ ଶିଳ୍ପପତି ! ଜାଣନ୍ତୁ ଓଡିଶାରେ କେଉଁ ଶିଳ୍ପପତି କେତେ ଟଙ୍କାର ନିବେଶ କରିବେ ?
ମେକ୍ ଇନ୍ ଓଡିଶା କନକ୍ଲେଭରେ ନିବେଶର ଲମ୍ବା ପ୍ରତିଶୃତି ଦେଲେ ଦେଶର ବିଶିଷ୍ଟ ଶିଳ୍ପପତି
କନକ ବ୍ୟୁରୋ : ଆଜି ଭୁବନେଶ୍ୱରରେ ଦେଶର ସବୁଠୁ ବଡ଼ ବଡ଼ ଶିଳ୍ପପତି ଏକାଠି ହୋଇଥିଲେ । ଅବସର ଥିଲା ମେକ୍ ଇନ୍ ଓଡ଼ିଶା କନକ୍ଲେଭ୍ ଦ୍ୱିତୀୟ ସଂସ୍କରଣର- ବିଜନେସ୍ ଲିଡରସିପ୍ ସମିଟ୍ । ସମ୍ମିଳନୀରେ ଯୋଗ ଦେଇ ନିବେଶର ଲମ୍ବା ପ୍ରତିଶ୍ରୁତି ଦେଇଛନ୍ତି ଦେଶର ବିଶିଷ୍ଟ ଶିଳ୍ପପତି । କେବଳ ସେତିକି ନୁହେଁ, ଓଡ଼ିଶାର ପ୍ରଶଂସାରେ ଶତମୁଖ ହୋଇଛନ୍ତି ଏହି ବିଜନେସ୍ ଟାଇକୁନ୍ ।
Kanak News is now on WhatsApp
Join and get latest news updates delivered to you via WhatsApp
ମେକ୍ ଇନ୍ ଓଡ଼ିଶାରେ ଆଜି ଏଭଳି କିଛି ପ୍ରତିଶ୍ରୁତି ମିଳିଛି, ଯଦି ତାହା ବାସ୍ତବତାରେ ପରିଣତ ହେବ, ତେବେ ଗରିବ ଓ ପଛୁଆ ରାଜ୍ୟର ଅପଖ୍ୟାତିରୁ ମୁକୁଳି ଶିଳ୍ପ ଜଗତରେ ଏକ ଆଗୁଆ ରାଜ୍ୟରେ ପରିଣତ ହେବ ଓଡ଼ିଶା । କନକ୍ଲେଭରେ ସାମିଲ ହୋଇ ମୁକେଶ ଅମ୍ବାନୀ କହିଛନ୍ତି, ମେକ୍ ଇନ୍ ଓଡ଼ିଶାକୁ ମେକ୍ ଏ ନିଉ ଓଡ଼ିଶା ଗଢ଼ି ତୋଳିବାରେ ରାଜ୍ୟ ସରକାରଙ୍କ ସହଭାଗୀ ହେବ ଜିଓ ଡିଜିଟାଲ । ଡାଟା ବ୍ୟବହାରରେ ଓଡ଼ିଶା ଆଗୁଆ ରାଜ୍ୟ ବୋଲି କହିଛନ୍ତି ମୁକେଶ । ଜାତୀୟ ଅଭିବୃଦ୍ଧି ହାର ତୁଳନାରେ ଓଡ଼ିଶାର ଅଧିକ ଅଭିବୃଦ୍ଧି ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଶ୍ରେୟ ଦେଇଛନ୍ତି ମୁକେଶ ଅମ୍ବାନୀ ।
ଆଦିତ୍ୟ ବିର୍ଲା ଗ୍ରୁପର ମୁଖ୍ୟ କୁମାର ମଙ୍ଗଳମ ବିର୍ଲା ଓଡିଶାରେ ୧୪ ହଜାର ୪୦୦ ଟଙ୍କା କୋଟି ନିବେଶ ପ୍ରତିଶ୍ରୁତି ଦେଇଛନ୍ତି । ଏହାଛଡା ୨୦୩୦ ସୁଦ୍ଧା ଜିନ୍ଦଲ ଷ୍ଟିଲ୍ର ଉତ୍ପାଦନ ୨୦ ମିଲିୟନ ଟନ ବଢାଇବାକୁ ଲକ୍ଷ୍ୟ ରଖିଛି ଜିନ୍ଦଲ ଷ୍ଟିଲ୍ ଆଣ୍ଡ ପାୱାର ଲିମିଟେଡ୍ । ରାଜ୍ୟରେ ୧ଲକ୍ଷ କୋଟି ଟଙ୍କା ପୁଂଜିନିବେଶ ବୃଦ୍ଧି ହେବ ଏବଂ ଏହାଦ୍ୱାରା ୧ଲକ୍ଷ ଲୋକଙ୍କୁ ନିଯୁକ୍ତି ମିଳିବ ବୋଲି ସୂଚନା ଦେଇଛନ୍ତି ଜେଏସପିଏଲ୍ ମୁଖ୍ୟ ନବୀନ ଜିନ୍ଦଲ ।
ଷ୍ଟିଲ୍ ପ୍ଲାଂଟକୁ ୩ ମିଲିୟନ୍ ଟନରୁ ୮ ମିଲିୟନ ଟନକୁ ସଂପ୍ରସାରଣ କରିବାକୁ ପ୍ରତିଶ୍ରୁତି ଦେଇଛି ଟାଟା । ଏଥିପାଇଁ ନିବେଶ ହେବ ୨୩ ହଜାର ୫୦୦ କୋଟି ଟଙ୍କା । ସେହିପରି କନକ୍ଲେଭରେ ଯୋଗ ଦେଇ ନିବେଶ ପାଇଁ ଲମ୍ବା ପ୍ରତିଶ୍ରୁତି ଦେବା ସହ ଓଡ଼ିଶାକୁ ପ୍ରଶଂସା କରିଛନ୍ତି ବେଦାନ୍ତ ରିସୋର୍ସେସ୍ ଅଧ୍ୟକ୍ଷ ଅନୀଲ ଅଗ୍ରୱାଲ୍ ଓ ଜେଏସଡବ୍ଲୁ ମୁଖ୍ୟ ସଜ୍ଜନ ଜିନ୍ଦଲ ।ଭୁବନେଶ୍ୱର ଜନତା ମଇଦାନରେ ଆୟୋଜିତ ୫ ଦିନିଆ କନକ୍ଳେଭରେ ପ୍ରାୟ ଅଢ଼େଇ ଲକ୍ଷ କୋଟି ଟଙ୍କାର ପୁଂଜିନିବେଶ ଆଶା କରିଛି ଓଡ଼ିଶା । ପୁଂଜିନିବେଶ ବ୍ୟତୀତ ଦେଶବିଦେଶରେ ଓଡ଼ିଶାକୁ ସ୍ୱତନ୍ତ୍ର ପରିଚୟ ଦେବାକୁ ଭରପୂର ଉଦ୍ୟମ କରାଯାଉଛି ।