କନକ ବ୍ୟୁରୋ: ମହାରାଷ୍ଟ୍ର ବିଧାନ ପରିଷଦ ବା ଏମ୍ଏଲ୍ସି ନିର୍ବାଚନ ପରେ ରାଜନୈତିକ ସଂକଟ । ଏମ୍ଏଲ୍ସି ନିର୍ବାଚନ ପରେ ଶିବସେନାର ବରିଷ୍ଠ ନେତା ତଥା ମନ୍ତ୍ରୀ ଏକନାଥ ସିନ୍ଦେଙ୍କ ସମେତ ୨୦ରୁ ଅଧିକ ନେତାଙ୍କ କୌଣସି ଖୋଜଖବର ନଥିବା ନେଇ ଚର୍ଚ୍ଚା । ସେ କିଛି ବିଧାୟକଙ୍କ ସହ ଗୁଜରାଟର ସୁରଟରେ ଥିବା ଜଣାପଡ଼ିଛି । ଶିବସେନାର କିଛି ବିଧାୟକଙ୍କ ବିରୋଧରେ କ୍ରସ-ଭୋଟିଂ ଅଭିଯୋଗ ଆସିବା ପରେ ଏହି ଘଟଣା ସାମ୍ନାକୁ ଆସିଛି । ମହାରାଷ୍ଟ୍ର ବିଧାନ ପରିଷଦ ନିର୍ବାଚନରେ ଶିବସେନା ଓ ଏନସିପି ୨ଟି ଲେଖାଏଁ ଆସନ ହାତେଇଥିବା ବେଳେ ବିଜେପି ହାତକୁ ଯାଇଛି ୫ ସିଟ୍ । ବିଜେପିର ବିଧାୟକ ସଂଖ୍ୟା କମ ଥିବାରୁ ସମସ୍ତ ପ୍ରାର୍ଥୀଙ୍କ ବିଜୟ କ୍ରସ ଭୋଟିଂ ଯୋଗୁ ହୋଇଥିବା ଅନୁମାନ କରାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମ ରିପୋର୍ଟ ଅନୁସାରେ, ଶିବସେନାର ପାଖାପାଖି ୨୬ ବିଧାୟକ ଆତ୍ମଗୋପନ କରିବା ପରେ ଏବେ ଉଦ୍ଧବ ଠାକରେ ସରକାର ପ୍ରତି ବିପଦ ଘନେଇଛି । ଶିବସେନା ବିଧାୟକ ଗୁଜରାଟର ହୋଟେଲରେ ଅଟକିବା ପଛରେ ବିଜେପିର ‘ଅପରେସନ୍ ଲୋଟସ୍’ ବୋଲି କୁହାଯାଉଛି । ସେପଟେ ବିଦ୍ରୋହୀ ଏକନାଥ ସିନ୍ଦେଙ୍କୁ ମନାଇବାରେ ଶିବସେନାର ଉଦ୍ୟମ ବିଫଳ ହୋଇଛି । ଯାହା ପରେ ଶିବସେନା ସିଧାସଳଖ ବିଜେପିକୁ ଟାର୍ଗେଟ୍ କରିଛି । ବିଜେପି ପକ୍ଷରୁ ବିଧାୟକମାନଙ୍କୁ ବଳପୂର୍ବକ ଅପହରଣ କରାଯାଇଛି ଓ ଗୁଜରାଟ ପୋଲିସ୍ ସେମାନଙ୍କୁ ବନ୍ଧକ ରଖିଥିବା ଶିବସେନା ଅଭିଯୋଗ କରିଛି ।
ମହାରାଷ୍ଟ୍ର ସରକାର
– ମହାରାଷ୍ଟ୍ର ବିଧାନସଭାରେ ମୋଟ ୨୮୮ ଆସନ
– ସରକାର ଗଠନ ପାଇଁ ଦରକାର ୧୪୫ ବିଧାୟକ
– ଉଦ୍ଧବ ଠାକରେଙ୍କ ନେତୃତ୍ୱାଧୀନ ସରକାରଙ୍କୁ ରହିଛି ୧୬୯ ବିଧାୟକଙ୍କ ସମର୍ଥନ
– ଶିବସେନା ୫୬, ଏନସିପି ୫୩, କଂଗ୍ରେସର ୪୪ ଓ ଅନ୍ୟ ପାର୍ଟିର ୧୫ ବିଧାୟକ ସାମିଲ୍
– ମୁଖ୍ୟ ବିରୋଧୀ ଦଳ ବିଜେପି ପାଖରେ ରହିଛି ୧୧୩ ବିଧାୟକଙ୍କ ସମର୍ଥନ
– ସେଥିରୁ ବିଜେପିର ୧୦୬ ଓ ଅନ୍ୟାନ୍ୟ ଦଳର ୭
କେମିତି ମିଳିବ ବିଜେପିକୁ ବହୁମତ?
– ବିଜେପି- ୧୦୬
– ଅସନ୍ତୁଷ୍ଟ ନେତା- ୨୬ (ଯଦି ବିଜେପିରେ ସାମିଲ୍ ହୁଅନ୍ତି)
– ଅନ୍ୟାନ୍ୟ- ୧୩
– ଏମଏନଏସ- ୦୧
– ମୋଟ- ୧୪୬
ସେପଟେ ମହାରାଷ୍ଟ୍ର ରାଜନୀତିରେ ମୋଡ଼ ବଦଳାଇଥିବା ଏକନାଥ ସିନ୍ଦେଙ୍କୁ ନେଇ ଚର୍ଚ୍ଚା ଆରମ୍ଭ ହୋଇଇଛି । ରାଜ୍ୟରେ ବିଶେଷକରି ଥାନେ ଅଂଚଳରେ ସେନାକୁ ସୁଦୃଢ଼ କରିବା ପାଇଁ ଗୁରୁତ୍ୱପୂର୍ଣ୍ଣ ଭୂମିକା ବହନ କରିଥିବା ସିନ୍ଦେ ଜଣେ ସୁପରିଚିତ ଜନନେତା । ସେନାର ପ୍ରମୁଖ ରାଜନୈତିକ ଦାୟିତ୍ୱ ତୁଲାଇବାରେ ସେ ବେଶ୍ ମାହିର୍ । ତାଙ୍କ ପୁଅ ଶ୍ରୀକାନ୍ତ ସିନ୍ଦେ ଶିବସେନା ଦଳର ସାଂସଦ । ଏକନାଥ ସିନ୍ଦେ ୨୦୦୪, ୨୦୦୯. ୨୦୧୪ ଓ ୨୦୧୯ରେ ବିଧାନସଭା ନିର୍ବାଚନରେ ନିର୍ବାଚିତ ହୋଇଛନ୍ତି । ୨୦୧୪ରେ ତାଙ୍କୁ ବିରୋଧୀ ଦଳର ନେତା କରାଯାଇଥିଲା । ସେ ମଧ୍ୟ ମହାବିକାଶ ଅଘାଡ଼ି ସରକାରରେ ନଗର ଉନ୍ନୟନ ଓ ପୂର୍ତ ବିଭାଗ ମନ୍ତ୍ରୀ ହୋଇଥିଲେ ।
ସୁରଟ ଯିବା ପରେ ଏକନାଥ ସିନ୍ଦେ ଏକ ଟ୍ୱିଟ୍ କରି ଲେଖିଛନ୍ତି, ସ୍ୱର୍ଗତ ବାଲାସାହାବେ ଆମକୁ ହିନ୍ଦୁତ୍ୱ ଶିଖାଇଛନ୍ତି । ଆମେ କହାପି କ୍ଷମତା ପାଇଁ ଧୋକା ଦେବୁ ନାହିଁ । ବାଲାସାହେବଙ୍କ ଚିନ୍ତାଧାରା ଓ ଧର୍ମବୀର ଆନନ୍ଦ ସାହେବ ଆମକୁ ଧୋକା ନକରିବାକୁ ଶିଖାଇଛନ୍ତି ।