କେନ୍ଦୁଝରରେ ଚାଞ୍ଚଲ୍ୟ । ମଲା ମଇଁଷିରେ ବିଷ ଦେଇ ମହାବଳକୁ ହତ୍ୟା
କନକ ବ୍ୟୁରୋ : ମଲା ମଇଁଷିରେ ବିଷ ଦେଇ ମହାବଳକୁ ହତ୍ୟା । କେନ୍ଦୁଝର ଜିଲ୍ଲାରେ ଏବେ ବାଘ ହତ୍ୟାକୁ ନେଇ ଚାଞ୍ଚଲ୍ୟ । ଗତ କିଛିଦିନ ତଳେ କପ୍ତିପଦା ଜଙ୍ଗଲରେ ଫାଶ ପକାଇ କଲରାପତରିଆ ବାଘ ହତ୍ୟା କରାଯାଇଥିଲା । ଏବେ ଦେଓଗାଁ ରେଞ୍ଜ ରେବଣା ପଳାଶପାଳ ଜଙ୍ଗଲରେ ମହାବଳ ବାଘକୁ ହତ୍ୟା କରାଯାଇଥିବା ବନ ବିଭାଗର ଚିନ୍ତା ବଢାଇ ଦେଇଛି । ପ୍ରଥମଥର ଏକ ମହାବଳ ବାଘକୁ ହତ୍ୟା କରାଯାଇଥିବା ସୂଚନା ଦେଇଛି ବନ ବିଭାଗ ।
Kanak News is now on WhatsApp
Join and get latest news updates delivered to you via WhatsApp
ରେବଣା ପଳାଶପାଳ ପଂଚାୟତର ବୁଧପଡା ଗାଁରେ ଏକ ବାଘ ଚମଡା ଥିବା କୌଣସି ସୂତ୍ରରୁ ସୂଚନା ପାଇଥିଲେ କେନ୍ଦୁଝର ବନଖଣ୍ଡ କର୍ମଚାରୀ । ଏକ ସ୍ୱତନ୍ତ୍ର ଟିମ୍ ଗଠନ କରି ଏହି ଗାଁରେ ଚଢାଉ କରାଯାଇଥିଲା । ଗାଁର ୩୦ ବର୍ଷୀୟ ବୁଟୁ ମହାକୁଡଙ୍କ ପାଖରୁ ଏକ ମହାବଳ ବାଘର ଚମଡା ଜବତ କରିବା ସହ ତାଙ୍କୁ ଗିରଫ କରାଯାଇଛି ।
ତେବେ ମହାବଳଟିକୁ କେମିତି ମାରିଲେ ସେନେଇ ବନ ବିଭାଗକୁ ବୁଟୁ କହିଥିବା କାହାଣୀଟି ବେଶ ରୋଚକ । ବୁଟୁଙ୍କ କହିବା ହେଲା ରେବଣା ପଳାଶପାଳ ଜଙ୍ଗଲରେ ତାଙ୍କ ବାପା ନିୟମିତ ମଇଁଷି ଚରାଇବାକୁ ଯାଆନ୍ତି । ଦେଢମାସ ତଳେ ହଠାତ ତାଙ୍କର ଏକ ମଇଁଷିକୁ କେହି ଖାଇ ଦେଇଥିବା ଜାଣିବା ପରେ ବାଘ ଖାଇଥିବା ସନ୍ଦେହ କରିଥିଲେ ।
କୌଣସି ପଶୁକୁ ମାରିବା ପରେ ୭ରୁ ୮ ଦିନ ଯାଏଁ ବାଘ ମାଂସ ଖାଇଥାଏ । ତେଣୁ ବୁଟୁଙ୍କ ବାପା ମଲା ମଇଁଷିରେ ବିଷ ଦେଇଥିଲେ । ବାଘ ଏହାକୁ ଖାଇବା ପରେ ତାର ମୃତ୍ୟୁ ହୋଇଯାଇଥିଲା । ପରେ ବାଘର ଚମଡା ଛାଲି ତାକୁ ଶୁଖାଇ ରଖିଥିଲେ । ଏହାକୁ ବିକ୍ରି କରିବାକୁ ଉଦ୍ୟମ କରୁଥିବାବେଳେ ବନ ବିଭାଗ ହାତରେ ଧରା ପଡିଛନ୍ତି । ତେବେ ବୁଟୁଙ୍କ କାହାଣୀ ବନ ବିଭାଗକୁ ସନ୍ତୁଷ୍ଟ କରିପାରି ନାହିଁ । ଏହା ପଛରେ କିଛି ରାକେଟ କାମ କରୁଥିବା ସନ୍ଦେହରେ ବନ ବିଭାଗ ଅଧିକ ଛାନଭିନ ଚଳାଇଛି ।