ମୋଦୀଙ୍କ ଭାଷଣରେ ‘ଦ କେରଳ ଷ୍ଟୋରୀ’ ଫିଲ୍ମର କଥା । କଂଗ୍ରେସକୁ ଜୋରଦାର୍ ଟାର୍ଗେଟ୍ କଲେ ପ୍ରଧାନମନ୍ତ୍ରୀ । କହିଲେ, ମୁଁ ଜୟ ବଜରଙ୍ଗବାଲି କହିଲେ ବି ବିରୋଧ କରୁଛି କଂଗ୍ରେସ…
କନକ ବ୍ୟୁରୋ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କର୍ଣ୍ଣାଟକରେ ନିର୍ବାଚନ ପ୍ରଚାର ଜାରି ରଖିଛନ୍ତି । କର୍ଣ୍ଣାଟକର ବେଲାରୀରେ ଏକ ଜନସଭାକୁ ସମ୍ବୋଧିତ କରି ପ୍ରଧାନମନ୍ତ୍ରୀ ମୋଦୀ କଂଗ୍ରେସକୁ ତୀବ୍ର ସମାଲୋଚନା କରିଛନ୍ତି । ଏହି ସମୟରେ ସେ ଫିଲ୍ମ ‘ଦି କେରଳ ଷ୍ଟୋରୀ’ର ମଧ୍ୟ ଉଲ୍ଲେଖ କରିଥିଲେ। ସେ କହିଛନ୍ତି ଯେ ଫିଲ୍ମ କେରଳ ଷ୍ଟୋରୀ ଆଜିକାଲି ଚର୍ଚ୍ଚାରେ ରହିଛି । ପରିଶ୍ରମୀ, ପ୍ରତିଭାବାନ ଏବଂ ବୁଦ୍ଧିଜୀବୀଙ୍କ ସୁନ୍ଦର ଭୂମି ପାଇଁ ଜଣାଶୁଣା ରାଜ୍ୟ କେରଳରେ କିପରି ଆତଙ୍କବାଦ ଷଡ଼ଯନ୍ତ୍ରକୁ ପ୍ରୋତ୍ସାହିତ କରାଯାଉଛି ତାହା ଏହି ଚଳଚ୍ଚିତ୍ରରେ ଦର୍ଶାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ତେବେ କଂଗ୍ରେସ ଇସ୍ତାହାରରେ ଅନେକ ମିଥ୍ୟା ପ୍ରତିଶ୍ରୁତି ରହିଛି। କଂଗ୍ରେସର ଇସ୍ତାହାରର ଅର୍ଥ ହେଉଛି ତାଲାବନ୍ଦୀ ଏବଂ ତୁଷ୍ଟୀକରଣର ଏକ ବଣ୍ଡଲ । ଏବେ କଂଗ୍ରେସର ଅବସ୍ଥା ଏତେ ଖରାପ ଯେ ସେମାନଙ୍କ ପାଦ ଥରିବାରେ ଲାଗିଛି ଏବଂ ସେଥିପାଇଁ କଂଗ୍ରେସ ମୁଁ ଜୟ ବଜରଙ୍ଗ ବାଲି କହିଲେ ବି ବିରୋଧ କରୁଛି ବୋଲି ମୋଦୀ କହିଛନ୍ତି ।
ଅନ୍ୟପଟେ କଂଗ୍ରେସକୁ ସମାଲୋଚନା କରି ମୋଦୀ କହିଛନ୍ତି ଯେ ନିଜର ଭୋଟବ୍ୟାଙ୍କ ପାଇଁ କଂଗ୍ରେସ ଆତଙ୍କବାଦ ଆଗରେ ମୁଣ୍ଡ ନୁଆଁଇ ଦେଇଛି । ଏଭଳି ଦଳ କେବେ କର୍ଣ୍ଣାଟକକୁ ସୁରକ୍ଷା ଦେଇପାରିବ କି? ଆତଙ୍କର ବାତାବରଣରେ ଶିଳ୍ପ, ଆଇଟି ଶିଳ୍ପ, କୃଷି, ଚାଷ ଓ ଗୌରବମୟ ସଂସ୍କୃତି ନଷ୍ଟ ହୋଇଯିବ। କର୍ଣ୍ଣାଟକକୁ ଦେଶର ଏକ ନମ୍ବର ରାଜ୍ୟ ରେ ପରିଣତ କରିବା ପାଇଁ ସୁରକ୍ଷା ବ୍ୟବସ୍ଥା, ଆଇନ ଶୃଙ୍ଖଳା ସବୁଠାରୁ ଗୁରୁତ୍ୱପୂର୍ଣ୍ଣ ଆବଶ୍ୟକତା । କର୍ଣ୍ଣାଟକ ପାଇଁ ଆତଙ୍କବାଦମୁକ୍ତ ରହିବା ମଧ୍ୟ ସେତିକି ଜରୁରୀ । ଆତଙ୍କବାଦ ବିରୋଧରେ ବିଜେପି ସବୁବେଳେ କଠୋର ରହିଛି। ଆତଙ୍କବାଦ ବିରୋଧରେ କାର୍ଯ୍ୟାନୁଷ୍ଠାନ ହେଲେ କଂଗ୍ରେସ ର ପେଟରେ ଯନ୍ତ୍ରଣା ଆରମ୍ଭ ହୋଇଯାଏ ।