କନକ ବ୍ୟୁରୋ: ଗମ୍ଭୀର ରାଜନୈତିକ ସଙ୍କଟ ସମୟରେ ଏହି ଅବସର ବିନୋଦନର ଦୃଶ୍ୟକୁ ନେଇ ଚାରି ଆଡେ ଚର୍ଚ୍ଚା । ରାଜ୍ୟରେ ରାଜନୈତିକ ଛକାପନଝା ଭିତରେ ଝାରଖଣ୍ଡ ମୁକ୍ତି ମୋର୍ଚ୍ଚା ଓ କଂଗ୍ରେସର ସମସ୍ତ ବିଧାୟକ ଶନିବାର ତିନୋଟି ବସରେ ଖୁଂଟି ଜିଲ୍ଲାର ଲାତ୍ରାତୁ ଡ୍ୟାମରେ ପହଂଚିଥିଲେ । ଲତୁରାମ ନଦୀରେ ବିଧାୟକଙ୍କ ସହ ନୌବିହାର କରିଥିଲେ ମୁଖ୍ୟମନ୍ତ୍ରୀ ହେମନ୍ତ ସୋରେନ । ବୁଲାବୁଲି ଓ ନୌବିହାର ପରେ ଡ୍ୟାମ ପରିସରରେ ଥିବା ଗେଷ୍ଟ ହାଉସରେ କିଛି ସମୟ ରହିଥିଲେ ସମସ୍ତ ବିଧାୟକ । ଏହାପରେ ରାଂଚି ଫେରି ଆସିଥିଲେ ଶାସକ ‘ମେଂଟ’ର ବିଧାୟକ ।
Kanak News is now on WhatsApp
Join and get latest news updates delivered to you via WhatsApp
ଝାଡଖଣ୍ଡରେ ଯେଉଁ ରାଜନୈତିକ ଝଡ ଉଠିଛି, ଏହା ପଛର କାରଣ ହେଉଛି ନିର୍ବାଚନ କମିସନଙ୍କ ବନ୍ଦ ଲଫାଫାର ସେହି ଚିଠି, ଯେଉଁଥିରେ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ବିଧାନସଭା ସଦସ୍ୟତା ରଦ୍ଦ କରିବା ପାଇଁ ସୁପାରିଶ କରିଥିବା କୁହାଯାଉଛି । କିନ୍ତୁ ଝାଡଖଣ୍ଡ ରାଜ୍ୟପାଳ ଏହା ଉପରେ ଏପର୍ଯ୍ୟନ୍ତ କୌଣସି ନିଷ୍ପତି ନେଇ ନାହାନ୍ତି ।
ଝାଡଖଣ୍ଡରେ ଜାରି ପଲିଟିକାଲ ହାଇଡ୍ରାମା ଭିତରେ ଆଜି କଂଗ୍ରେସର ଝାଡଖଣ୍ଡ ପ୍ରଭାରୀ ଅବିନାଶ ପାଣ୍ଡେଙ୍କୁ ସାକ୍ଷାତ କରିଛନ୍ତି ମୁଖ୍ୟମନ୍ତ୍ରୀ ହେମନ୍ତ ସୋରେନ । ରାଜ୍ୟର ରାଜନୈତିକ ସଂକଟକୁ ନେଇ ଦୁଇ ନେତା ଚର୍ଚ୍ଚା କରିଥିବା ଜଣାପଡିଛି । ହେମନ୍ତ ସୋରେନ ଗଣମାଧ୍ୟମ ପ୍ରତିନିଧିଙ୍କ ପ୍ରଶ୍ନ ଏଡାଇ ଦେଇ ଚାଲିଯାଇଛନ୍ତି । ସେପଟେ କଂଗ୍ରେସ ଏହାକୁ ଔପଚାରିକ ସାକ୍ଷାତ ଆଲୋଚନା ବୋଲି କହିଛି ।
ଝାଡଖଣ୍ଡ ରାଜ୍ୟପାଳ ରମେଶ ବୈସ, ନିର୍ବାଚନ କମିସନଙ୍କ ସୁପାରିଶ ଉପରେ ନିଷ୍ପତି ନେବାରେ ଯେତିକି ଡେରି କରୁଛନ୍ତି, ଏପଟେ ରାଜ୍ୟ ରାଜନୀତିର ଉଦବେଗ ସେତେ ବଢୁଛି । ହେମନ୍ତ ସୋରେନଙ୍କ ବିଧାନସଭା ସଦସ୍ୟତା ରଦ୍ଦ ହେଲେ ପରବର୍ତି ମୁଖ୍ୟମନ୍ତ୍ରୀ କିଏ ହେବ ତାକୁ ନେଇ କଳ୍ପନା ଜଳ୍ପନା ଚାଲିିଛି । ଏପରି ସ୍ଥିତିରେ ହେମନ୍ତ ସୋରେନଙ୍କ ପତ୍ନୀ କଳ୍ପନା ସୋରେନଙ୍କ ନାଁ ସବୁଠୁ ଆଗରେ ଥିବା ଚର୍ଚ୍ଚା ହେଉଛି । କଳ୍ପନା ହେଉଛନ୍ତି ମୟୂରଭଂଜର ଝିଅ ।