ଭାରତ ହେଲା ବିଶ୍ୱର ଜନବହୁଳ ଦେଶ । ଚୀନକୁ ଟପି ଜନସଂଖ୍ୟାରେ ହେଲା ନମ୍ବର-୧ । ୨୦୫୦ ସୁଦ୍ଧା ଭାରତର ଜନସଂଖ୍ୟା ହେବ ୧୬୬ କୋଟି!
କନକ ବ୍ୟୁରୋ : ଜନସଂଖ୍ୟାରେ ଚୀନକୁ ଟପିଲା ଭାରତ । ଚୀନକୁ ପାର୍ କରି ଭାରତ ବନିଲା ବିଶ୍ୱର ଜନବହୁଳ ଦେଶ । ଚୀନର ଜନସଂଖ୍ୟା ଏବେ ୧୪୨ କୋଟି ୫୭ ଲକ୍ଷ ଥିବାବେଳେ, ଭାରତର ଜନସଂଖ୍ୟା ତାଠୁ ୨୯ ଲକ୍ଷ ଅଧିକ ହୋଇସାରିଛି । ଭାରତ ଜନସଂଖ୍ୟା ଏବେ ୧୪୨ କୋଟି ୮୬ ଲକ୍ଷ ରହିଥିବା ରିପୋର୍ଟ ପ୍ରକାଶ କରିଛି ୟୁନାଇଟେଡ୍ ନେସନ୍ ପୋପୁଲେସନ୍ ଫଣ୍ଡ୍ । ୧୯୫୦ ମସିହାରେ ପରେ ପ୍ରଥମ ଥର ପାଇଁ ଭାରତର ଜନସଂଖ୍ୟା ଚୀନକୁ ଟପିଛି । ସଂଯୁକ୍ତ ରାଷ୍ଟ୍ର ଗଲା ବର୍ଷ ହିଁ ଅନୁମାନ କରୁଥିଲା ଯେ, ଗୋଟିଏ ବର୍ଷ ଭିତରେ ଭାରତର ଜନସଂଖ୍ୟା ଚୀନକୁ ଟପିଯାଇପାରେ । ହେଲେ ଏହାର ଯଥେଷ୍ଟ ପୂର୍ବରୁ ଭାରତର ଲୋକସଂଖ୍ୟା ଚୀନକୁ ଟପିସାରିଛି ।
Kanak News is now on WhatsApp
Join and get latest news updates delivered to you via WhatsApp
ୟୁନାଇଟେଡ୍ ନେସନ୍ ପପୁଲେସନ୍ ଫଣ୍ଡ ରିପୋର୍ଟ ମୁତାବକ, ଏହି ଦୁଇ ଦେଶର ଲୋକସଂଖ୍ୟାକୁ ତୁଳନା କରିବା ବେଶ କଷ୍ଟକର ଅଟେ । କାହିଁକି ନା ଦୁଇ ଦେଶରୁ ଡାଟା କଲେକ୍ସନ କରିବା ହିଁ ଏକ କଷ୍ଟକର ବ୍ୟାପାର ଅଟେ । ତେବେ ମିଳିଥିବା ରିପୋର୍ଟ ଅନୁସାରେ, ଚୀନର ଜନସଂଖ୍ୟା ଗତ ବର୍ଷ ଶୀର୍ଷ ଛୁଇଁଥିଲା । ହେଲେ ଏବେ କିନ୍ତୁ ଏଥିରେ ବହୁପରିମାଣରେ ହ୍ରାସ ଦେଖିବାକୁ ମିଳିଛି । ଅନ୍ୟପଟେ ସ୍ୱାଧୀନତା ପରେ ଭାରତର ଜନସଂଖ୍ୟା ହୁ ହୁ ହେଇ ବଢୁଥିଲେ ବି, ୧୯୮୦ ମସିହା ପରେ ଭାରତର ଜନଂସଖ୍ୟା ବୃଦ୍ଧି ଅପେକ୍ଷାକୃତ ଭାବେ କମ୍ ହୋଇଛି ବୋଲି ରିପୋର୍ଟରେ ଦର୍ଶାଯାଇଛି ।
ୟୁନାଇଟେଡ୍ ନେସନ୍ ପପୁଲେସନ୍ ଫଣ୍ଡ ପ୍ରକାଶ କରିଥିବା ରିପୋର୍ଟ ଅନୁସାରେ, ଭାରତର ମୋଟ ଜନସଂଖ୍ୟାରୁ ୨୫ ପ୍ରତିଶତ ହେଉଛନ୍ତି ଶୂନରୁ-୧୪ ବର୍ଷ । ସେହିପରି ୧୮ ପ୍ରତିଶତ ଲୋକଙ୍କ ବୟସ ୧୦ ବର୍ଷରୁ ୧୯ ବର୍ଷ ହେଇଥିବାବେଳେ, ଭାରତରେ ୨୬ ପ୍ରତିଶତ ଲୋକଙ୍କ ବୟସ ହେଉଛି ୧୦ରୁ ୨୪ ବର୍ଷ । ଅନ୍ୟପଟେ ଭାରତରେ ରହୁଥିବା ଲୋକଙ୍କ ଭିତରୁ ୬୮ ପ୍ରତିଶତ ଲୋକଙ୍କ ବୟସ ହେଉଛି ୧୫ ବର୍ଷରୁ ୬୪ ବର୍ଷ । ସେହିପରି ଭାରତରେ ମାତ୍ର ୭ ପ୍ରତିଶତ ଲୋକଙ୍କ ବୟସ ୬୫ ବର୍ଷରୁ ଅଧିକ ବୋଲି ଏହି ରିପୋର୍ଟରେ ପ୍ରକାଶ ପାଇଛି ।
ଭାରତର ଜନସଂଖ୍ୟାକୁ ନେଇ ଆମେରିକା ସରକାରଙ୍କ ଏକ ରିପୋର୍ଟ ମଧ୍ୟ ପ୍ରକାଶ ପାଇଥିଲା । ଯେଉଁଥିରେ କୁହାଯାଇଥିଲା ଭାରତର ଲୋକସଂଖ୍ୟା ୨୦୫୦ ସୁଦ୍ଧା ୧୬୬ କୋଟି ଛୁଇଁପାରେ । ୧୮୨୦ ବେଳକୁ ଏହି ସଂଖ୍ୟା ପାଖାପାଖି ୧୩ କୋଟି ଥିଲାବେଳେ, ୧୯ଶହ ଶତାବ୍ଦୀ ବେଳକୁ ଏହି ସଂଖ୍ୟା ୨୩ କୋଟି ପାର କରିଥଲା । ସେହିପରି ଭାରତର ଜନସଂଖ୍ୟା ୨୦୦୧ ବେଳକୁ ଶହେ କୋଟି ପାର୍ କରିଥିଲା । ଆଉ ବର୍ତ୍ତମାନ ଏହି ସଂଖ୍ୟା ୧୪୦ରୁ ୧୫୦ କୋଟି ଭିତରେ ରହିଛି ।
ଚୀନକୁ ଟପି ଭାରତ ବିଶ୍ୱର ନମ୍ବର ୱାନ ଜନବହୁଳ ଦେଶ ହେବା ପଛରେ କାରଣ ବି ରହିଛି । ରିପୋର୍ଟ ମୁତାବକ, ଭାରତରେ ଶିଶୁ ମୃତ୍ୟୁ ହାର ପୂର୍ବ ଅପେକ୍ଷା ଯଥେଷ୍ଟ କମ୍ ହୋଇଛି । ସେହିପରି ନବଜାତ ଶିଶୁଙ୍କ ମୃତ୍ୟୁ କମିଥିବାବେଳେ, ଲୋକଙ୍କ ଆୟୁ ସୀମା ବି ପୂର୍ବ ଅପେକ୍ଷା ଯଥେଷ୍ଟ ବୃଦ୍ଧି ପାଇଛି । ଯାହାର କାରଣ ସ୍ୱରୂପ ଭାରତ ଏବେ ଚୀନକୁ ଟପ ବିଶ୍ୱର ଏକ ନମ୍ବର ଜନବହୁଳ ଦେଶ ହୋଇସାରିଛି ।