ଛୋଟ କିନ୍ତୁ ଘାତକ ଯୁଦ୍ଧ ପାଇଁ ପ୍ରସ୍ତୁତ ରହିବା ଆବଶ୍ୟକ । ଚୀନ ସହ ଉତ୍ତେଜନା ଭିତରେ ଚର୍ଚ୍ଚା ସୃଷ୍ଟି କଲା ଏୟାର ଚିଫ୍ ମାର୍ଶଲଙ୍କ କଥା…
କନକ ବ୍ୟୁରୋ: ବର୍ତ୍ତମାନ ସମୟରେ ଭାରତୀୟ ବାୟୁସେନା ଛୋଟ ଏବଂ ଘାତକ ଯୁଦ୍ଧର ସାମ୍ନା କରିବାକୁ ପ୍ରସ୍ତୁତ ରହିବାକୁ ପଡିବ । କମ ସମୟର ଯୁଦ୍ଧ ଏବଂ ପୂର୍ବ ଲଦାଖରେ ଲମ୍ବା ସମୟ ଧରି ଯୁଦ୍ଧ ହେଲେ, ଭାରତୀୟ ବାୟୁସେନା ଏହାକୁ ସାମ୍ନା କରିବାକୁ ପ୍ରସ୍ତୁତ ରହିବା ଆବଶ୍ୟକତା ଅଛି । ଗୁରୁବାର ଏକ ସେମିନାରରେ ଯୋଗ ଦେବା ସହ ଏପରି କହିଛନ୍ତି ଭାରତର ଏୟାର ଚିଫ୍ ମାର୍ଶଲ ବିଆର ଚୌଧୁରୀ ।
Kanak News is now on WhatsApp
Join and get latest news updates delivered to you via WhatsApp
ଉତ୍ତର ସୀମା ପଟେ ଲାଗି ରହିଥିବା ବିବାଦକୁ ଦେଖି ଏୟାର ଚିଫ୍ ମାର୍ଶଲ କହିଛନ୍ତି ଯେ, ଭାରତୀୟ ବାୟୁସେନାକୁ ସବୁ ସମ୍ଭାବିତ ସୁରକ୍ଷା ଦିଗକୁ ଦୃଷ୍ଟିରେ ରଖି ପ୍ରସ୍ତୁତ ରହିବାକୁ ପଡିବ । ଏହାର ଆବଶ୍ୟକତା ମଧ୍ୟ ଅଛି । ବଳ, ସ୍ଥାନ ଓ ସମୟର ନିରନ୍ତରତାରେ ଛୋଟ ଯୁଦ୍ଧ ଓ ଲମ୍ବା ସମୟ ଧରି ଯୁଦ୍ଧ ଲାଗି ରହିଲେ, ଆମକୁ ସେହି ଅନୁସାରେ ଏବେଠୁ ପ୍ରସ୍ତୁତ ରହିବାକୁ ପଡିବ ବୋଲି ସେ କହିଛନ୍ତି ।
ଅନ୍ୟପଟେ ଏଥିପାଇଁ ସଂଶାଧନକୁ ଯୋଡିବାକୁ, ପରିବହନ ବ୍ୟବସ୍ଥାକୁ ସୁଦୃଢ କରିବାର ଆବଶ୍ୟକତା ଅଛି । ଦେଶକୁ ଆତ୍ମନିର୍ଭର କରିବାର କଳ୍ପନା ନିଶ୍ଚୟ ମହତ୍ତ୍ୱପୂର୍ଣ୍ଣ ଅଟେ । ସ୍ୱଦେଶୀକରଣ ପାଇଁ କାମ କରିବା ଆବଶ୍ୟକ ବୋଲି ସେ କହିଛନ୍ତି ।
ସୂଚନାଯୋଗ୍ୟ ଯେ, ଗତ ଦୁଇ ବର୍ଷରୁ ଅଧିକ ବର୍ଷ ଧରି ପୂର୍ବ ଲଦାଖର କିଛି ଅଞ୍ଚଳରେ ଉତ୍ତେଜନା ଲାଗି ରହିଛି । ଚୀନ ଓ ଭାରତୀୟ ସେନା ଭିତରେ ଲଗାତାର ସେଠାରେ ମୁହାଁମୁହିଁ ସ୍ଥିତି ଦେଖିବାକୁ ମିଳୁଛି । ଏପରି ସ୍ଥିତିରେ କେବେ କଣ ହେବ ତାକୁ ନେଇ ତର୍କ ବିତର୍କ ଲାଗି ରହିଥିବାବେଳେ ଏୟାର ଚିଫ୍ ମାର୍ଶଲଙ୍କ ଏହି ବୟାନ ଏବେ ଚର୍ଚ୍ଚା ସୃଷ୍ଟି କରିଛି ।