ବଢ଼ିଲା ହେମନ୍ତ ସୋରେନଙ୍କ ଅଡ଼ୁଆ, ବିପଦରେ ମୁଖ୍ୟମନ୍ତ୍ରୀ ପଦ
କନକ ବ୍ୟୁରୋ: ଝାଡ଼ଖଣ୍ଡରେ ହେମନ୍ତ ସୋରେନଙ୍କ ନେତୃତ୍ୱାଧୀନ ଜେଏମଏମ୍-କଂଗ୍ରେସ ମେଣ୍ଟ ସରକାର ଉପରେ ଦେଖାଦେଇଛି ସଙ୍କଟର ବାଦଲ । ବେଇଆନ୍ ଖଣି ଖନନ ମାମଲାରେ ଫସିଥିବା ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ ବିଧାନସଭା ସଦସ୍ୟତା ବିପଦରେ ପଡ଼ିଛି । ନିର୍ବାଚନ କମିଶନ୍ ତାଙ୍କ ରାୟକୁ ରାଜଭବନ ପଠାଇ ଦେଇଛନ୍ତି, ଯାହା ଉପରେ ଏବେ ରାଜ୍ୟପାଳ ରମେଶ ବୈସ ନିଷ୍ପତି ନେବେ । ଯଦି ସୋରେନଙ୍କ ବିଧାନସଭା ସଦସ୍ୟତା ହରାଇବେ, ତେବେ ମୁଖ୍ୟମନ୍ତ୍ରୀ ପଦ ମଧ୍ୟ ହରାଇବାକୁ ପଡ଼ିପାରେ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ନିର୍ବାଚନ କମିଶନଙ୍କ ତରଫରୁ ହେମନ୍ତ ସୋରେନଙ୍କ ବିଧାନସଭା ସଦସ୍ୟତା ବାତିଲ କରିବା ନିର୍ଦ୍ଦେଶ ପରେ ବିଜେପି ଆକ୍ରମଣାତ୍ମକ ଆଭିମୁଖ୍ୟ ଆପଣାଇଛି । ବିଜେପି ସାଂସଦ ନିଶିକାନ୍ତ ଦୁବେ କହିଛନ୍ତି ଯେ ସୋରେନଙ୍କୁ ଦୁର୍ନୀତି ଅଭ୍ୟାସ କରିବାର ଫଳ ମିଳିଛି । ରାଜ୍ୟପାଳ କୌଣସି ନିଷ୍ପତି ନେବା ପୂର୍ବରୁ ସୋରେନ ସ୍ୱୟଂ ଇସ୍ତଫା ଦେଇଦେବା ଦରକାର ବୋଲି ନିଶିକାନ୍ତ କହିଛନ୍ତି ।
ଏହାରି ଭିତରେ ହେମନ୍ତଙ୍କ ଘର ବାହାରେ ସମର୍ଥକ ଜୋରଦାର ନାରା ଲଗାଇଥିଲେ । କିଛି ପୋଲିସକର୍ମୀ ମଧ୍ୟ ତାଙ୍କ ସମର୍ଥନରେ ବାହାରିଥିଲେ । ଯାହା ପରେ ମୁଖ୍ୟମନ୍ତ୍ରୀ ଟ୍ୱିଟ୍ କରି ପରୋକ୍ଷରେ ବିଜେପି ଉପରେ ଆକ୍ରମଣ କରିଛନ୍ତି । ସାମ୍ବିଧାନିକ ସଂସ୍ଥାକୁ ତ କିଣିପାରିବ, ଜନସମର୍ଥନ କିପରି କିଣିବ ବୋଲି ପାଲଟା ପ୍ରଶ୍ନ କରିଛନ୍ତି ସୋରେନ । ଝାଡ଼ଖଣ୍ଡର ହଜାର ହଜାର ସଂଖ୍ୟାର ପୋଲିସକର୍ମୀଙ୍କ ସ୍ନେହ ଓ ଜନତାଙ୍କ ସମର୍ଥନ ହିଁ ମୋର ଶକ୍ତି ବୋଲି ଲେଖିଛନ୍ତି ।
କ’ଣ ରହିଛି ପୂରା ମାମଲା?
– ହେମନ୍ତ ସୋରେନ ଖଣି ଖନନ ପଟାକୁ ନିଜ ଓ ନିଜ ଭାଇ ନାଁରେ କରିଥିବା ଅଭିଯୋଗ ରହିଛି
– ମୁଖ୍ୟମନ୍ତ୍ରୀ ପଦରେ ରହି ସେ ଏଭଳି ଦୁର୍ନୀତି କରିଥିବା ଅଭିଯୋଗ କରିଥିଲା ବିଜେପି
– ଫେବୃଆରୀ ୧୦ ତାରିଖରେ ପୂର୍ବତନ ମୁଖ୍ୟମନ୍ତ୍ରୀ ରଘୁବର ଦାସ ଉଠାଇଥିଲେ ପ୍ରଶ୍ନ
– ଫେବୃଆରୀ ୧୧ରେ ରାଜ୍ୟପାଳଙ୍କୁ ଭେଟି ସୋରେନଙ୍କ ବିଧାୟକ ପଦକୁ ଅଯୋଗ୍ୟ ଘୋଷିତ ପାଇଁ କରିଥିଲେ ଦାବି
– ପରେ ରାଜ୍ୟପାଳ ମାମଲାକୁ ନିର୍ବାଚନ କମିଶନଙ୍କୁ ନିକଟକୁ ପଠାଇଥିଲେ
ଏହା ପୂର୍ବରୁ ଇଡି ରାଞ୍ଚିରେ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ସହଯୋଗୀ ପ୍ରେମ ପ୍ରକାଶଙ୍କ ଘରୁ ଦୁଇଟି ଏକେ-୪୭ ରାଇଫଲ ଜବତ କରିଥିଲା । ଯାହା ପରେ ପ୍ରେମ ପ୍ରକାଶଙ୍କୁ ଇଡି ଗିରଫ କରିଛି ।