ବିଜେପିର ବିପର୍ଯ୍ୟୟ ପଛର ବଡ ବିନ୍ଧାଣୀ । ଅପ୍ରତ୍ୟାଶିତ ଭାବେ ରାଜନୀତିକୁ ଆସିଥିଲେ, ଝାଡଖଣ୍ଡ ରାଜନୀତିରେ ଝଡ ସୃଷ୍ଟି କଲେ ।
କନକ ବ୍ୟୁରୋ : ମହାରାଷ୍ଟ୍ର ପରେ ଝାଡଖଣ୍ଡରେ ଝଡିଛି ପଦ୍ମ । ତ୍ରୀଦଳୀୟ ମେଣ୍ଟର ରଣନୀତି ଆଗରେ ମୁଣ୍ଡ ନୁଆଁଇଛି ବିଜେପି । ଝାଡଖଣ୍ଡରେ ପଦ୍ମ ଝଡିବା ପରେ ମୁଣ୍ଡ ଟେକିଛି ଜେଏମଏମ, କଂଗ୍ରେସ ଓ ଆରଜେଡି ମହାମେଣ୍ଟ । ଗଣତି ଶେଷ ହୋଇନଥିବା ବେଳେ ଝାଡଖଣ୍ଡରେ ମହାଗଠବନ୍ଧନ ମେଣ୍ଟ ବହୁମତ ହାସଲ କରିବା ସହ ସରକାର ଗଠନ ପାଇଁ ଆଗକୁ ବଢିଛି । ତେବେ ବିଜେପିର ଗଡରେ ବିପର୍ଯ୍ୟୟ ସୃଷ୍ଟି କରିବା ପଛର ସମସ୍ତ ଶ୍ରେୟ ହେମନ୍ତ ସୋରେନଙ୍କୁ ଦିଆଯାଉଛି । ଯାହାଙ୍କ ନେତୃତ୍ୱରେ ଝାଡଖଣ୍ଡରେ ମହାଗଠବନ୍ଧନ ମେଣ୍ଟ ନିର୍ବାଚନ ମୈଦାନକୁ ଓହ୍ଲାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଗୋଟିଏ ପଟେ ମହାଗଠବନ୍ଧନ ମେଣ୍ଟ ସରକାର ଗଠନ କରିବାକୁ ଯାଉଥିବା ବେଳେ ମୁଖ୍ୟମନ୍ତ୍ରୀ ଆସନରେ କିଏ ବସିବ ତାହାକୁ ନେଇ ଚର୍ଚ୍ଚା ଆରମ୍ଭ ହୋଇଛି । ଆଉ ଏହି ରେସରେ ହେମନ୍ତ ସବୁଠୁ ଆଗରେ ରହିଛନ୍ତି । ତେବେ ହେମନ୍ତ ଏହାପୂର୍ବରୁ ୨୦୧୩ରେ ଝାଡଖଣ୍ଡର ୫ମ ମୁଖ୍ୟମନ୍ତ୍ରୀ ଭାବେ ପଦ ଭାର ସମ୍ଭାଳିଛନ୍ତି । ତେବେ ଏହି ପଦରେ ଖୁବ କମ ଦିନ ରହିଥିଲେ ହେମନ୍ତ ।
ପ୍ରତ୍ୟକ୍ଷ ରାଜନୀତିରେ ହେମନ୍ତଙ୍କ ଏଣ୍ଟ୍ରି ବେଶ ଅପ୍ରତ୍ୟାଶିତ ଭାବେ ହୋଇଥିଲା । ଏହାପୂର୍ବରୁ ହେମନ୍ତ ସକ୍ରିୟ ରାଜନୀତିରେ ଥିଲେ ମଧ୍ୟ ପ୍ରତ୍ୟକ୍ଷ ରାଜନୀତିରେ ଏଣ୍ଟ୍ରି ମାରିନଥିଲେ । ତେବେ ୨୦୦୯ରେ ବଡ ଭାଇ ଦୁର୍ଗା ସୋରେନଙ୍କ ମୃତ୍ୟୁ ପରେ ହେମନ୍ତ ହାତକୁ ଆସିଥିଲା ଦଳର ପୂରା ଦାୟିତ୍ୱ । ବାପା ଶିବୁ ସୋରେନଙ୍କ ଅସୁସ୍ଥତା ଓ ବଡ ଭାଇ ଦୁର୍ଗା ସୋରେନଙ୍କ ମୃତ୍ୟୁ ଦଳୀୟ ରାଜନୀତିରେ ହେମନ୍ତଙ୍କୁ ବଡ ଚେହେରା ଭାବେ ସାମ୍ନାକୁ ଆଣିଥିଲା । ଆଉ ଏହି ଦାୟିତ୍ୱକୁ ବେଶ ପ୍ରଭାବୀ ଢଙ୍ଗରେ ତୁଲାଇଥିଲେ ହେମନ୍ତ ।
୨୦୦୯ରୁ ୨୦୧୦ ଯାଏଁ ରାଜ୍ୟସଭା ସଦସ୍ୟ ଭାବେ ରାଜନୀତି କ୍ୟାରିୟର ଆରମ୍ଭ କରିଥିବା ହେମନ୍ତ ୨୦୧୩ରେ କଂଗ୍ରେସ ଓ ଆରଜେଡି ସମର୍ଥନରେ ମୁଖ୍ୟମନ୍ତ୍ରୀ ଆସନରେ ବସିଥିଲେ । ତେବେ ୨୦୧୪ ବିଧାନସଭା ନିର୍ବାଚନରେ ଜେଏମଏମର ପରାଜୟ ହେମନ୍ତଙ୍କ ଠାରୁ ମୁଖ୍ୟମନ୍ତ୍ରୀ ପଦ ଛଡାଇ ନେଇଥିଲା । ତେବେ ୨୦୧୯ରେ ପୂରା ରଣନୀତି ସହ ରଣଭୂମିକୁ ଓହ୍ଲାଇଥିଲା ଦଳ । କଂଗ୍ରେସ ଓ ଆରଜେଡି ସହ ମେଣ୍ଟ କରି ପୁଣିଥରେ କ୍ଷମତାକୁ ଫେରିବାକୁ ଅଙ୍କ କଷିଥିଲେ ହେମନ୍ତ । ତେବେ ହେମନ୍ତଙ୍କୁ ହରାଇବା ପାଇଁ ଦିଲ୍ଲୀରୁ ପ୍ରସ୍ତୁତ ହୋଇଥିଲା ବିଜେପିର ବ୍ଲୁ-ପ୍ରିଣ୍ଟ । ହେମନ୍ତଙ୍କ ନିର୍ବାଚନମଣ୍ଡଳୀରେ ମୋଦି ପ୍ରଚାର କରିବା ଠାରୁ ଆରମ୍ଭ କରି ଏହି ଆସନକୁ ଜିତିବା ପାଇଁ ବିଜେପି ଜି ଜାନ୍ ଲଗାଇ ଦେଇଥିଲା । ତେବେ ଏହାସତ୍ତେ୍ୱ ମଧ୍ୟ ମୋଦି ମ୍ୟାଜିକକୁ ମାତ୍ ଦେଇ ଏଠାରେ ହାତ ସହାୟତାରେ ଧନୁ ତୀର ଉପରକୁ ଉଠାଇଥିଲେ ହେମନ୍ତ । କେବଳ ହେମନ୍ତ ନୁହଁନ୍ତି ଚଳିତ ନିର୍ବାଚନରେ ତାଙ୍କ ଦଳ ଜେଏମଏମ ମଧ୍ୟ ବେଶ ପ୍ରଭାବୀ ପ୍ରଦର୍ଶନ କରିଛି । ଆଉ ଏଥିପାଇଁ ମହାଗଠବନ୍ଧନ ମେଣ୍ଟରେ ହେମନ୍ତଙ୍କୁ ମିଳିପାରେ ମୁଖ୍ୟମନ୍ତ୍ରୀ ପଦ ।