ରେଳବିଭାଗର ନୂଆ ଅଫର ! ଆଇଆରସିଟିସି ଆକାଉଣ୍ଟରେ ଆଧାରକାର୍ଡ ଲିଙ୍କ କରନ୍ତୁ, ମାଗଣା ଯାତ୍ରା ସହ ୧୦ ହଜାର ଟଙ୍କା ଜିତିବାର ଲାଭ ଉଠାନ୍ତୁ
ଏବେ ପ୍ରତି କ୍ଷେତ୍ରରେ ଆଧାରକାର୍ଡର ଆବଶ୍ୟକତା ପଡୁଛି । ଏପରିକି ବ୍ୟାଙ୍କ ଆକାଉଣ୍ଟ ଓ ମୋବାଇଲ ନମ୍ବରକୁ ମଧ୍ୟ ଆଧାରକାର୍ଡ ସହ ଲିଙ୍କ କରିବାକୁ ସରକାରଙ୍କ ପକ୍ଷରୁ ଡେଡଲାଇନ ଦିଆଯାଇଛି । ତେବେ ଏସବୁ ଭିତରେ ରେଳବିଭାଗ ରେଳ ଯାତ୍ରୀଙ୍କ ପାଇଁ ଆଉ ଏକ ନୂଆ ଅଫର ଘୋଷଣା କରିଛନ୍ତି । ରେଳ ବିଭାଗର ଆଇଆରସିଟିସି ଆକାଉଣ୍ଟ ସହ ଆଧାରକାର୍ଡ ଲିଙ୍କ କରିବା ଦ୍ୱାରା ଏଣିକି ରେଳରେ ମାଗଣା ଯାତ୍ରା କରିବା ସହ ୧୦ ହଜାର ଟଙ୍କା ଜିତିବାର ସୁଯୋଗ ଆଣିଛି ରେଳ ବିଭାଗ ।
Kanak News is now on WhatsApp
Join and get latest news updates delivered to you via WhatsApp
ଭାରତୀୟ ରେଳ ବିଭାଗ ଏଥିପାଇଁ ଲକି ଡ୍ର ସ୍କିମ ନାଁରେ ଯାତ୍ରୀଙ୍କ ପାଇଁ ଏକ ନୂଆ ଅଫର ଘୋଷଣା କରିଛନ୍ତି । ଯାହାଦ୍ୱାରା ରେଳ ଯାତ୍ରୀଙ୍କୁ ଆଇଆରସିଟିସି ଆକାଉଣ୍ଟରେ ଆଧାର ନମ୍ବର ଲିଙ୍କ କରିବାକୁ ପଡିବ । ଲିଙ୍କ କରିବା ପରେ ଟିକେଟ ବୁକ୍ କଲେ ୧୦ ହଜାର ଟଙ୍କା ଓ ମାଗଣା ରେଳଯାତ୍ରା କରିବାର ସୁଯୋଗ ପାଇପାରିବେ । ଏହି ସ୍କିମରେ ସାମିଲ ହେବା ପାଇଁ ଅଧିକ କିଛି କରିବାକୁ ପଡିବ ନାହିଁ । କେବଳ ଆଧାର କାର୍ଡ ନମ୍ବର ସହ ଆଇଆରସିଟିସି ଆକାଉଣ୍ଟକୁ ଲିଙ୍କ କରିବାକୁ ପଡିବ । ଲିଙ୍କ କରିବାର ୬ ମାସ ପର୍ଯ୍ୟନ୍ତ ଟିକେଟ ବୁକ କରିଲେ ଏହା ଆପଣାଛାଏଁ ଏହି ସ୍କିମରେ ସାମିଲ ହୋଇଯିବ ।
ତେବେ ସ୍କିମ ଅନୁଯାୟୀ ପ୍ରତିମାସରେ ୫ ଜଣ ବିଜେତାଙ୍କୁ ଚୟନ କରାଯିବ । ପ୍ରତି ବିଜେତାଙ୍କୁ ୧୦ ହଜାର ଟଙ୍କା ପୁରସ୍କାର ବାବଦରେ ମିଳିବ । ଏହାଛଡା ଟିକେଟ ବୁକ୍ କରିବା ପାଇଁ ବିଜେତା ଯାତ୍ରୀ ଯେତିକି ଟଙ୍କା ଖର୍ଚ୍ଚ କରିଥିବେ ତାହା ମଧ୍ୟ ଫେରସ୍ତ କରାଯିବ ।ତେବେ ଯାତ୍ରୀଙ୍କୁ ଏଥିପାଇଁ କିଛି ନିୟମ ପାଳନ କରିବାକୁ ହେବ । ଆଇଆରସିଟିସି ଆକାଉଣ୍ଟରେ ଯେଉଁ ନାମ ଥିବ ସେହି ନାଁରେ ଟିକେଟ ହୋଇଥିଲେ ହିଁ ଆପଣ ଏହି ସ୍କ୍ରିମରେ ସାମିଲ ହୋଇପାରିବେ ।
ଆଇଆରସିଟିସି ଆକାଉଣ୍ଟ ସହ ଆଧାର ନମ୍ବର ଲିଙ୍କ କରିବା ପରେ ଟିକେଟ ବୁକ୍ କରିବା ପରେ ଆପଣଙ୍କ ପିଏନଆର ନମ୍ବର ଆପଣାଛାଏଁ ଏହି ସ୍କିମରେ ସାମିଲ ହୋଇଯିବ । ଏହାପରେ କମ୍ପ୍ୟୁଟର ସାହାଯ୍ୟରେ ପ୍ରତିମାସ ୫ ଜଣ ଭାଗ୍ୟଶାଳୀ ବିଜେତାଙ୍କୁ ବଛାଯିବ । ତେବେ ଟିକେଟ ବୁକ୍ କରିବାର ଗୋଟିଏ ମାସ ପରେ ହିଁ ଜଣା ପଡିବ ଆପଣ ଭାଗ୍ୟଶାଳୀ ବିଜେତା ହୋଇଛନ୍ତି କି ନାହିଁ । ଭାଗ୍ୟଶାଳୀ ବିଜେତାଙ୍କ ନାମ ଆଇଆରସିଟିସିି ସାଇଟରେ ଉପଲବ୍ଧ ହେବା ସହ ବିଜେତା ହୋଇଥିବା ଯାତ୍ରୀଙ୍କୁ ରେଜିଷ୍ଟର ଆଇଡି ମାଧ୍ୟମରେ ସୂଚନା ଦିଆଯିବ ।
ଏହି ସ୍କିମ ଡିସେମ୍ବର ମାସରୁ ଆରମ୍ଭ ହୋଇଛି ଓ ଆଗାମୀ ୬ ମାସ ପର୍ଯ୍ୟନ୍ତ ଏହା ଚାଲିବ । ଆଇଆରସିଟିସି ଆକାଉଣ୍ଟରେ ଆଧାର ଲିଙ୍କ କରିବା ଦ୍ୱାରା ଏହି ସ୍କିମର ଫାଇଦା ପାଇବା ସହ ଅନ୍ୟ ଏକ ଫାଇଦା ମଧ୍ୟ ଯାତ୍ରୀ ପାଇପାରିବେ । ଆଧାର ଲିଙ୍କ କରିବା ଦ୍ୱାରା ପ୍ରତି ମାସରେ ଅନଲାଇନରେ ୧୨ଟି ଟିକେଟ ବୁକ କରାଯାଇପାରିବ । କିନ୍ତୁ ବିନା ଆଧାରକାର୍ଡ ଲିଙ୍କରେ ପ୍ରତି ମାସ ମାତ୍ର ୬ଟି ଟିକେଟ ବୁକ୍ କରିପାରିବେ ଯାତ୍ରୀ । ତେବେ ଏହି ସ୍କିମ ବିଷୟରେ ଅଧିକ ସୂଚନା ପାଇବା ପାଇଁ ଆଇଆରସିଟିସି ସାଇଟ କ୍ଲିକ କରି ଏହାର ନିୟମାବଳୀ ବିଷୟରେ ଜାଣନ୍ତୁ ।