ଦୁବାଇରେ ଆଗ୍ରହ ଦେଖାଇଲେ ଶିଳ୍ପପତି । ଓଡିଶାରେ ୨୨ ହଜାର କୋଟିର ପୁଞ୍ଜିନିବେଶ ପାଇଁ ପ୍ରତିଶ୍ରୁତି । ସୃଷ୍ଟି ହୋଇପାରେ ୧୯ ହଜାର ନିଯୁକ୍ତି ସୁଯୋଗ
କନକ ବ୍ୟୁରୋ: ଓଡିଶାରେ ପାଖାପାଖି ୨୨ ହଜାର କୋଟିର ପୁଞ୍ଜିନିବେଶ ପାଇଁ ଦୁବାଇରେ ପ୍ରତିଶ୍ରୃତି ଦେଇଛନ୍ତି ନିବେଶକ । ଏଥିସହ ୧୯ ହଜାରରୁ ଅଧିକ ଲୋକ ନିଯୁକ୍ତି ପାଇବାର ସୁଯୋଗ ସୃଷ୍ଟି ହୋଇଛି । ଭଲ ଖବର ହେଉଛି, ଦୁବାଇ ଓ କୁଏତ ପରି ମଧ୍ୟପ୍ରାଚ୍ୟର ଦେଶମାନେ ଓଡିଶାରେ ନିବେଶ ପାଇଁ ଆଗ୍ରହ ପ୍ରକାଶ କରିଛନ୍ତି । ବିଶେଷକରି ଖଣିଜଶିଳ୍ପ, ହୋଟେଲ ଶିଳ୍ପ, ୟୁରିଆ ପ୍ଲାଣ୍ଟରେ ନିବେଶ ପାଇଁ ଆଗ୍ରହ ଦେଖାଦେଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ପ୍ରତିଶ୍ରୃତି ଦେଇଛନ୍ତି ଓଡିଶାରେ ଶିଳ୍ପ ପ୍ରତିଷ୍ଠା ପାଇଁ ସରକାର ସମସ୍ତ ସହାୟତା ଯୋଗାଇଦେବେ ।
Kanak News is now on WhatsApp
Join and get latest news updates delivered to you via WhatsApp
ଓଡ଼ିଶାେରେ ନିବେଶ ପାଇଁ ଦୁବାଇରେ ଆୟୋଜିତ ଓଡ଼ିଶା ଇନଭେଷ୍ଟର୍ସ ମିଟରୁ ଭଲ ଖବର ଆସୁଛି । ପ୍ରଥମ ଥର ପାଇଁ ଦୁବାଇ ସ୍ଥିତ କମ୍ପାନୀଗୁଡ଼ିକ ମଧ୍ୟ ଓଡ଼ିଶାରେ ପୁଞ୍ଜି ନିବେଶ ପାଇଁ ଆଗ୍ରହ ପ୍ରକାଶ କରିଛନ୍ତି । ଓଡ଼ିଶା ସରକାରଙ୍କ ପକ୍ଷରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସେମାନଙ୍କୁ ଭରସା ଦେଇଛନ୍ତି ଯେ, ରାଜ୍ୟରେ ସେମାନଙ୍କ ପ୍ରକଳ୍ପ ସୁରୁଖୁରରେ ହୋଇପାରିବ ଏବଂ ବ୍ୟବସାୟ ମଧ୍ୟ ଠିକ୍ ଭାବରେ ଆଗକୁ ବଢ଼ିପାରିବ । ଏଥିପାଇଁ ରାଜ୍ୟ ସରକାର ସବୁ ପ୍ରକାର ସୁବିଧା ଯୋଗାଇଦେବେ ବୋଲି ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି । ଏବେ ନଜର ପକାନ୍ତୁ କେଉଁ କେଉଁ କମ୍ପାନୀମାନେ ନିବେଶ କରିବାକୁ ଆଗ୍ରହ ପ୍ରକାଶ କରିଛନ୍ତି ।
ଦୁବାଇରୁ ଆସିବ ନିବେଶ
- ଲୁଲୁ ଫାଇନାନ୍ସିଆଲ ଗ୍ରୁପ ଆଣ୍ଡ ଟ୍ୱେଂଟି ୧୪ ହୋଲଡିଂ ୧୫ ଶହ କୋଟିର ନିବେଶ ପାଇଁ ପ୍ରସ୍ତାବ ଦେଇଛି
- ଏକ ବିଳାସମୟ ହୋଟେଲ ନିର୍ମାଣ ପାଇଁ କମ୍ପାନୀ ଯୋଜନା ରଖିଛି
- ଦୁବାଇର ଶୋଭା ରିୟାଲିଟି କମ୍ପାନୀ ୫ ହଜାର କୋଟି ନିବେଶ କରିବାକୁ ଲକ୍ଷ୍ୟ ରଖିଛି
- ଖଣିଜ ପଦାର୍ଥ ଏବଂ ହୋଟେଲ ଶିଳ୍ପରେ ଏହି କମ୍ପାନୀ ପୁଞ୍ଜି ନିବେଶ କରିବ
- କୁଏତର ଏନବିଟିସି ଗ୍ରୁପ ୫ ହଜାର କୋଟି ନିବେଶ ପାଇଁ ପ୍ରସ୍ତାବ ଦେଇଛି
- ଏକ ଆମୋନିଆ ୟୁରିଆ ପ୍ଲାଣ୍ଟ ନିର୍ମାଣ ପାଇଁ ଯୋଜନା ରଖିଛି ଏନବିଟିସି ଗ୍ରୁପ
- ଡିପି ୱାଲର୍ଡ ଆଣ୍ଡ ହିନ୍ଦୁସ୍ତାନ ପୋର୍ଟସ୍ ପ୍ରାଇଭେଟ୍ ଲିମିଟେଡ୍ ୮ ହଜାର କୋଟି ନିବେଶ କରିବ
- ବନ୍ଦର ନିର୍ମାଣ ଓ ସ୍ୱତନ୍ତ୍ର ଅର୍ଥନୈତିକ ଜୋନ ବାବଦରେ ଏହି କମ୍ପାନୀ ନିବେଶ କରିବ
- ତବରିଦ ଗ୍ରୁପ ଆଇସିଟି କ୍ୟାମ୍ପସ ଭୁବନେଶ୍ୱରରେ ୧ ହଜାର କୋଟିର ନିବେଶ ପାଇଁ ପ୍ରସ୍ତାବ ଦେଇଛି
- ସରାଫ ଗ୍ରୁପ୍ ଓଡ଼ିଶାର ଲଜିଷ୍ଟିକ ସେକ୍ଟରରେ ୭୫୦ କୋଟି ନିବେଶ ପାଇଁ ଲକ୍ଷ୍ୟ ରଖିଛି
ମଧ୍ୟ ପ୍ରାଚ୍ୟ ଦେଶର ନିବେଶମାନଙ୍କୁ ଓଡ଼ିଶାରେ ନିବେଶ କରିବା ପାଇଁ ଆକୃଷ୍ଟ କରିବାକୁ ଦୁବାଇରେ ଏହି ମିଟର ଆୟୋଜନ କରିଥିଲେ ଓଡ଼ିଶା ସରକାର । ଯଦି ପ୍ରକୃତରେ ଏହି ନିବେଶ ପ୍ରତିଶ୍ରୁତି ଫଳପ୍ରଦ ହୁଏ, ତେବେ ଓଡ଼ିଶାରେ ବ୍ୟାପକ ଆର୍ଥିକ ଉନ୍ନତି ସହ ବ୍ୟାପକ ରୋଜଗାରର ସୁଯୋଗ ସୃଷ୍ଟି ହେବ । କିନ୍ତୁ ପ୍ରତିଶ୍ରୁତି ଓ ତାକୁ କାର୍ଯ୍ୟେରେ ପରିଣତ କରିବା ଭିତରେ ଅନେକ ଫରକ ରହିଥାଏ । ତେଣୁ ଏ କ୍ଷେତ୍ରରେ ପ୍ରକୃତରେ କ’ଣ ଘଟୁଛି ତା’ ଉପରେ ସମସ୍ତଙ୍କ ନଜର ରହିଛି ।