ଶୁଖୁଛି ଓଡିଶା ଭାସୁଛି ଆନ୍ଧ୍ର : ବାଲିମେଳା ଜଳ ଭଣ୍ଡାରରୁ ପୁରୁଣା ଟନେଲ ଦେଇ ପାଣି ନେବା ପଡିଲା ମହଙ୍ଗା, ଆନ୍ଧ୍ର ପ୍ରଦେଶରେ ବନ୍ୟା ପରିସ୍ଥିତି
କନକ ବ୍ୟୁରୋ : ଏପଟେ ଓଡିଶାରେ ଶୁଖିଲା, ସେପଟେ ଆନ୍ଧ୍ରରେ ବନ୍ୟା । ଏଭଳି ସ୍ଥିତି ସୃଷ୍ଟି ହୋଇଛି ବାଲିମେଳା ଡ୍ୟାମର ଆନ୍ଧ୍ର ଅଂଚଳରେ । ଡ୍ୟାମର ପୁରୁଣା ଟନେଲରୁ ଆନ୍ଧ୍ର ଅତିରିକ୍ତ ପାଣି ନେବା ପରେ ଏହା ଅଣାୟତ ପରିସ୍ଥିତି ସୃଷ୍ଟି କରିଛି । ଫଳରେ ୪୫ ବର୍ଷ ପୁରୁଣା ଟନେଲ ବନ୍ଦ କରି ନପାରି ବାଲିମେଳା ଜଳଭଣ୍ଡାରର ପାଣିକୁ ରୋକିବାକୁ ଦିନରାତି ଉଦ୍ୟମ ଜାରି ରଖିଛନ୍ତି ଆନ୍ଧ୍ର ଏ.ପି.ଜେନକୋ ଓ ଚିତ୍ରକୋଣ୍ଡା ଆର୍ଥ ଡ୍ୟାମ ଡିଭିଜନର ଯନ୍ତ୍ରୀ ଦଳ । ଗଭୀର ପାଣି ଭିତରେ ପଥର ଓ ପାଳ ବୋଝେଇ ଅଖା ବସ୍ତା ଛଡା ଯାଉଛି । କିନ୍ତୁ ପାଣିର ସୁଅ ଥମିବାର ନାଁ ଧରୁନି । ଜଙ୍ଗଲ ଭିତରେ ପସିବାରେ ଲାଗିଛି ଜଳଭଣ୍ଡାର ପାଣି । ତେବେ କାହିଁକି ଓ କେଉଁ ପରିସ୍ଥିତିରେ ବ୍ୟବହାର ହେଉ ନ ଥିବା ୪୫ ବର୍ଷ ପୁରୁଣା ସ୍ଲୁଇସ ଗେଟ ଖୋଲି ଆନ୍ଦ୍ର କୁ ପାଣି ଛଡା ଗଲା?
Kanak News is now on WhatsApp
Join and get latest news updates delivered to you via WhatsApp
ଏନେଇ ଜଳ ସମ୍ପଦ ବିଭାଗର ସଚିବ, ଜିଲ୍ଲାପାଳ କିମ୍ବା ଏସ.ପିଙ୍କୁ କାହିଁକି ଅବଗତ କରାଯାଇ ନାହିଁ ? ଏନେଇ ଉଭୟ ଚିତ୍ରକୋଣ୍ଡା ଆର୍ଥ ଡ୍ୟାମ ଡିଭିଜନର ନିର୍ବାହୀ ଯନ୍ତ୍ରୀ ଓ ପୋଟେରୁ ଜଳ ସେଚନ ବିଭାଗର ନିର୍ମାଣ ଯନ୍ତ୍ରୀଙ୍କୁ ଆଇ.ପି.ସି.ର ଧାରା ୧୩୩ ଅନୁଯାଇ କାରଣ ଦର୍ଶାଇ ନୋଟିସ ଜାରି କରିଛନ୍ତି ମାଲକାନଗିରି ଉପଜିଲ୍ଲାପାଳ । ସେପଟେ ଜଳସ୍ତର କମିବାରୁ ବିଚ୍ଛିନ୍ନାଂଚଳର ଲାଇଫ ଲାଇନ କୁହାଯାଉଥିବା ମୋଟର ଲଂଚ ଚଳାଚଳ ବାଧା ପ୍ରାପ୍ତ ହେବାର ଆଶଙ୍କା ସୃଷ୍ଟି ହୋଇଛି । ଫଳରେ ବିକଳ୍ପ ବାଟ ପାଇଁ ପ୍ରସ୍ତୁତି ଆରମ୍ଭ କରିଛି ଜିଲ୍ଲା ପ୍ରଶାସନ । ଜଳ ଭଣ୍ଡାରର ଆଖପାଖ ଅଂଚଳରେ ପି.ଡି.ଏସ ଚାଉଳ ଗଚ୍ଛିତ ରଖାଯାଉଥିବା ଦେଖିବାକୁ ମିଳିଛି । ଏଥି ସହ ଭତା ଓ ବିଭିନ୍ନ ସାମାଜିକ ନିରାପତା କାର୍ଯ୍ୟକ୍ରମ ଅବ୍ୟାହତ ରଖିବା ଉପରେ ଗୁରୁତ୍ୱ ଦେଉଛି ମାଲକାନଗିରି ପ୍ରଶାସନ ।