ପୁଅର ଆତ୍ମାର ଶାନ୍ତି ପାଇଁ ନିଆରା ଢ଼ଙ୍ଗରେ ଶ୍ରଦ୍ଧାଞ୍ଜଳି ଦେଲେ ବାପା । ପୁଅର ମୃତ୍ୟୁ ପରେ ମିଳିଥିବା ବୀମା ଟଙ୍କାରେ ଗରିବ ଲୋକଙ୍କୁ କମ୍ବଳ ବାଂଟିଲେ, ଅସହାୟଙ୍କ ମୁହଁରେ ହସ ଫୁଟାଇଲେ ।
କନକ ବ୍ୟୁରୋ: ବର୍ଷର ଶେଷ ଦିନରେ ସୁନ୍ଦରଗଡ଼ରୁ ଏମିତି ଏକ ଦୃଶ୍ୟ ଆସିଛି, ଯାହାକୁ ଦେଖିଲେ ଆପଣଙ୍କ ହୃଦୟ ତରଳିଯିବ । ପୁଅକୁ ନିଆରା ଢ଼ଙ୍ଗରେ ଶ୍ରଦ୍ଧାଂଜଳି ଦେଉଛନ୍ତି ବାପା । ନିଜ ଆବେଗକୁ ଚାପି ରଖି ଗରିବ ଲୋକଙ୍କ ଦୁଃଖ ଦୂର କରିବାକୁ କରୁଛନ୍ତି ପ୍ରୟାସ । ଅସହ୍ୟ ଶୀତରୁ ଅସହାୟମାନଙ୍କୁ ରକ୍ଷା କରିବା ପାଇଁ ବୀମା ଟଙ୍କାରେ କମ୍ବଳ ଓ ପୋଷାକ ବାଂଟିଛନ୍ତି । ୪ ବର୍ଷ ତଳେ ପୁଅକୁ ହରାଇ ଥିବା ପରିବାରକୁ ଏହା ଦେଇଛି ମାନସିକ ଶାନ୍ତି ।
Kanak News is now on WhatsApp
Join and get latest news updates delivered to you via WhatsApp
୨୦୧୬ ମସିହା ଫେବ୍ରୁଆରୀ ୨୧ ତାରିଖ କଟକରେ ଏକ ସଡ଼କ ଦୁର୍ଘଟଣାରେ ପ୍ରାଣ ହରାଇଲେ ସୁନ୍ଦରଗଡ଼ ନିବାସୀ ପ୍ରପୁଲ୍ଲ ପଟେଲଙ୍କ ପୁଅ ଅସିତ । ଭୁବନେଶ୍ୱରର ଘରୋଇ ଇଂଜିନିୟରିଂ କଲେଜରେ ଅସିତ ପାଠ ପଢ଼ୁଥିଲେ । ପୁଅକୁ ଇଂଜିନିୟର ଭାବେ ଦେଖିବାକୁ ଚାହୁଁଥିବା ବାପା ମାଆଙ୍କ ଉପରେ ଓଜାଡି ହୋଇ ପଡ଼ିଥିଲା ଦୁଃଖର ପାହାଡ଼ । ଏକ ମାତ୍ର ପୁଅକୁ ହରାଇ ଭାଙ୍ଗି ପଡ଼ିଥିଲେ ପରିବାର । ବୀମା ଟଙ୍କା ମିଳିବା ପରେ ନିଜ ପଂଚାୟତର ଗରିବ ଲୋକଙ୍କୁ ସହଯୋଗର ହାତ ବଢ଼ାଇଛନ୍ତି ।
ସଡ଼କ ଦୁର୍ଘଟଣାରେ ମୃତ ପୁଅ ପାଇଁ ଇନସୁରାନ୍ସ ବାବଦରେ ୭ ଲକ୍ଷ ୧୦ ହଜାର ଟଙ୍କା ପାଇଥିଲେ ପ୍ରଫୁଲ୍ଲ । ପୁଅ ତ ଗଲା, ଟଙ୍କା ନେଇ କରିବେ କ’ଣ, ଏହା ଭାବି ସୁନ୍ଦରଗଡ଼ର ମେଘଡେଗା ପଂଚାୟତର ୧୦ଟି ଗାଁର ୮୮୮ ଜଣ ଗରିବ ଲୋକଙ୍କୁ କମ୍ବଳ ବାଂଟିଛନ୍ତି । କେବଳ କମ୍ବଳ ନୁହେଁ, ବୃଦ୍ଧାଶ୍ରମ ଓ ଅନାଥ ଆଶ୍ରମରେ କପଡ଼ା ମଧ୍ୟ ଦାନ କରିଛନ୍ତି । ଆଉ ଯାହା ବଳକା ଟଙ୍କା ରହିଛି, ସେଥିରେ ଦୁଃଖୀ ଦରିଦ୍ରଙ୍କୁ ଲକ୍ଷ୍ୟ ରଖିଛନ୍ତି ପ୍ରଫୁଲ୍ଲ । ତାଙ୍କର ଏହି ମହତ ଉଦ୍ଦେଶ୍ୟ ପାଇଁ ପୁଅର ମୃତ୍ୟୁକୁ ଭୁଲି ପାରୁନାହାନ୍ତି ପରିବାର । ପୁଅକୁ ଶ୍ରଦ୍ଧାଂଜଳି ଦେବା ପାଇଁ ବାପା ଯେଉଁ ମହତ କାର୍ଯ୍ୟ ହାତକୁ ନେଇଛନ୍ତି, ତାକୁ ସାଧୁବାଦ ଜଣାଇଛନ୍ତି ସ୍ଥାନୀୟ ଲୋକେ ।