ପୁଣି ଫେରିଲା ଗୁମୁଡୁମାହା ଗୁଳିକାଣ୍ଡ ଘଟଣା ! ଗୁମୁଡୁମାହାକୁ ନେଇ ମୁଖ୍ୟମନ୍ତ୍ରୀଙ୍କୁ ସମାଲୋଚନା କଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ।
କନକ ବ୍ୟୁରୋ : କନ୍ଧମାଳ ଜିଲ୍ଲା ଗୁମୁଡୁମାହା ଗୁଳିକାଣ୍ଡ ଦୁଇ ବର୍ଷ ପୂର୍ତ୍ତି ପୂର୍ବରୁ ରାଜ୍ୟ ସରକାରଙ୍କୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସମାଲୋଚନା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଟାର୍ଗେଟ କରି ଧର୍ମେନ୍ଦ୍ର କହିଛନ୍ତି ଯେ, ଘଟଣାର ଦୁଇ ବର୍ଷ ପୁରିବାକୁ ବସିଛି ହେଲେ ନବୀନ ବାବୁ ଆପଣ ନିଜେ ଦେଇଥିବା ପ୍ରତିଶ୍ରୁତିକୁ ପାଳନ କରିବାରେ ବିଫଳ ହୋଇଛନ୍ତି । ତେଣୁ ଆପଣଙ୍କୁ ସ୍ଥାଣୁ ଅପାରଗ କୁହାଯିବନି ତ ଆଉ କେଉଁ ଶବ୍ଦର ବ୍ୟବହାର କରାଯିବ ବୋଲି ପ୍ରଶ୍ନ କରିଛନ୍ତି ଧର୍ମେନ୍ଦ୍ର । ଗୁମୁଡୁମାହା ଗୁଳିକାଣ୍ଡରେ ମୃତ ଓ ଅକର୍ମଣ୍ୟ ହୋଇଯାଇଥିବା ଲୋକଙ୍କ ପରିବାରକୁ ସ୍ଥାୟୀ ନିଯୁକ୍ତି ଦେବା ପାଇଁ ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେଇଥିଲେ ମଧ୍ୟ ଏପର୍ଯ୍ୟନ୍ତ ମିଳିଲା ନାହିଁ । ଯାହାକୁ ନେଇ କେନ୍ଦ୍ରମନ୍ତ୍ରୀ ଫେରାଦ ହୋଇଛନ୍ତି ଗୁଳିକାଣ୍ଡରେ ଆହତ ହୋଇଥିବା ଆଦିବାସୀ ବୋଲି ନିଜ ଫେସବୁକ ଆକାଉଣ୍ଟରେ ପୋଷ୍ଟ କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ।
Kanak News is now on WhatsApp
Join and get latest news updates delivered to you via WhatsApp
ସାଢ଼େ ଚାରିକୋଟି ଓଡିଆଙ୍କୁ ଗଭୀର ଦୁଃଖ ପହଂଚାଇବା ସହ ମୃତାହତଙ୍କ ପରିବାର ପ୍ରତି ସମ୍ବେଦନଶୀଳତା ସୁଅ ତିଆରି କରିଥିଲା । ଗତ ଦୁଇବର୍ଷ ତଳେ ଜୁଲାଇ ୮ ତାରିଖ ଦିନ ଗୁମୁଡୁମାହା ଠାରେ ଅତର୍କିତ ପୋଲିସ ଗୁଳିଚାଳନା କରିଥିବା ଘଟଣା ଆଜି ବି ବ୍ୟଥିତ କରୁଛି । ଏଭଳି ଘଟଣାକୁ ପ୍ରତିଶ୍ରୁତି ଦେଇ ଗଣତନ୍ତ୍ର ଓ ବିକାଶ ଯୁଗରେ ଆଉ କାହାର ଭୁଲ ପାଇଁ ଦଣ୍ଡ ଭୋଗୁଥିବା ଆଦିବାସୀ ଲୋକମାନଙ୍କର ବର୍ତ୍ତମାନ ସ୍ଥିତିକୁ ସମାଧାନ ନକରିବା ଦୁଃଖ ଓ ପରିତାପ ବିଷୟ ବୋଲି ପୋଷ୍ଟରେ ଉଲ୍ଲେଖ କରିଛନ୍ତି ଧର୍ମେନ୍ଦ୍ର ।
କ୍ଷତିଗ୍ରସ୍ତ ପରିବାର ସଦସ୍ୟମାନେ ଧର୍ମେନ୍ଦ୍ରଙ୍କୁ ସାକ୍ଷାତ କରି ରାଜ୍ୟ ସରକାର ଦେଇଥିବା ପ୍ରତିଶ୍ରୁତିକୁ ପାଳନ ନ କରିବା ନେଇ କୋହଭରା କଣ୍ଠରେ ଦୁଃଖ ବଖାଣିଥିବା କହିଛନ୍ତି ଧର୍ମେନ୍ଦ୍ର । ମୃତକ ପରିବାରକୁ କିଛି ଅର୍ଥ ସହାୟତା ଛଡା ରାଜ୍ୟ ସରକାର ଅନ୍ୟ କିଛି ପ୍ରତିଶ୍ରୁତିକୁ ପୂରଣ କରି ନଥିବା କ୍ଷତିଗ୍ରସ୍ତ ପରିବାର ଅଭିଯୋଗ କରିଛନ୍ତି ବୋଲି ଫେସବୁକ ପୋଷ୍ଟରେ କହିଛନ୍ତି ଧର୍ମେନ୍ଦ୍ର । ଏପରିକି ଯେଉଁ କାଦୁଅ ରାସ୍ତା ପାଇଁ ଏତେ ଲୋକ ବଳିଦାନ ଓ ଅକର୍ମଣ୍ୟ ହେଲେ, ସେ ରାସ୍ତାର ବାବଦରେ ସରକାର ଚୁପ ବସିଛନ୍ତି । ଯାହା ଦ୍ୱାରା ଏବେ ବି ଦୈନିକ କାମ, ଡାକ୍ତରଖାନା ଓ ପ୍ରସୂତି ମହିଳାଙ୍କୁ ବାଲିଗୁଡାକୁ ୩୦ କିଲୋମିଟର ରାସ୍ତା ଅତିକ୍ରମ କରିବାକୁ ପଡୁଛି । ଗାଁରେ ବିଦ୍ୟୁତ ସରବରାହ ଅତ୍ୟନ୍ତ ନିମ୍ନ ମାନ ରହିଥିବା ଯୋଗୁଁ ପିଲାମାନେ ରାତିରେ ପାଠ ପଢ଼ିପାରୁ ନଥିବା ଜଣାଇଛନ୍ତି କ୍ଷତିଗ୍ରସ୍ତ ଓ ଆହତଙ୍କ ପରିବାର । ନବୀନ ବାବୁ ଏପରି ସମ୍ବେଦନଶୀଳ ମାମଲାରେ ପ୍ରତିଶ୍ରୁତି ଦେଇ ପୂରଣ ନ କରିବା ଓଡିଶାବାସୀଙ୍କ ଭାବାବେଗ ସହ ଖେଳିବା ପରି କାର୍ଯ୍ୟ ବୋଲି ସମାଲୋଚନା କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।