କର୍ଣ୍ଣାଟକରେ ଉଠିଲା ହାତ, ଝାଉଁଳିଲା ପଦ୍ମ । କର୍ଣ୍ଣାଟକରେ ଏଥର କଂଗ୍ରେସ ସରକାର । ବେଙ୍ଗାଲୁରୁରୁ ଦିଲ୍ଲୀ ପର୍ଯ୍ୟନ୍ତ ଉତ୍ସବ ।
କନକ ବ୍ୟୁରୋ: କର୍ଣ୍ଣାଟକରେ କଂଗ୍ରେସର ବିଜୟ ପୂରା ଦଳ ଭିତରେ ଭରି ଦେଇଛି ସଞ୍ଜିବନୀ । ବେଙ୍ଗାଲୁରୁରୁ ଦିଲ୍ଲୀ ପର୍ଯ୍ୟନ୍ତ ଉତ୍ସବ ମୁଖର ହୋଇପଡିଛନ୍ତି ଦଳୀୟ ନେତାଠାରୁ କର୍ମୀ । ନୂଆ ଉତ୍ସାହ ଓ ଉଦ୍ଦୀପନା ଭରି ଯାଇଛି କଂଗ୍ରେସ ଶିବିରରେ । ଏହି ବିପୁଳ ବିଜୟ ପରେ କଂଗ୍ରେସର ବରିଷ୍ଠ ନେତା ରାହୁଲ ଗାନ୍ଧୀ କହିଛନ୍ତି, ‘ଘୃଣାର ବଜାର ବନ୍ଦ ହେଲା, ଖୋଲିଲା ଭଲ ପାଇବାର ଦୋକାନ ।’
Kanak News is now on WhatsApp
Join and get latest news updates delivered to you via WhatsApp
କର୍ଣ୍ଣାଟକରେ କଂଗ୍ରେସର ପଲ୍ଲା ଭାରି ଥିବା ସମସ୍ତଙ୍କୁ ଜଣାଥିଲା । ଏଥିପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଠାରୁ ଆରମ୍ଭ କରି ଅମିତ ଶାହାଙ୍କ ପର୍ଯ୍ୟନ୍ତ ନିର୍ବାଚନ ପ୍ରଚାରରେ ଜୋର ଲଗାଇ ଦେଇଥିଲେ । ବଡ଼ ବଡ଼ ରାଲି, ବିଶାଳ ଶୋଭାଯାତ୍ରା କରି ଜନମତକୁ ବଦଳାଇବା ପାଇଁ ଜୋରଦାର ଉଦ୍ୟମ କରିଥିଲା ବିଜେପି । କିନ୍ତୁ କର୍ଣ୍ଣାଟକବାସୀ ସରକାର ବଦଳାଇବା ପାଇଁ ମନ ସ୍ଥିର କରି ସାରିଥିଲେ ।
ଏକଜିଟ୍ ପୋଲ ମଧ୍ୟ କଂଗ୍ରେସର ବିଜୟ ନେଇ ସଙ୍କେତ ଦେଇଥିଲା । କିନ୍ତୁ ଦଳ ଯେ ପାଖାପାଖି ଦୁଇ-ତୃତୀୟାଂଶ ଆସନରେ ବିଜୟୀ ହେବ, ତାହା ଅନେକ ଆକଳନ କରି ପାରିନଥିଲେ । ପୂର୍ବତନ ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କ ବ୍ୟକ୍ତିତ୍ୱ ଏବଂ କର୍ଣ୍ଣାଟକ ପିସିସି ସଭାପତି ଡି.କେ ଶିବକୁମାରଙ୍କ ଗୋଟି ଚାଳନା ଆଗରେ ବହୁ ପଛରେ ପଡିଗଲା ବିଜେପି । ତେବେ ବିଜେପିର ବଡ଼ ପରାଜୟ ପରେ, ଏଥିପାଇଁ ନିଜକୁ ଦାୟୀ କରିଛନ୍ତି ମୁଖ୍ୟମନ୍ତ୍ରୀ ବାସବରାଜ ବୋମାଇ ।କେବଳ ଅଧିକ ସିଟ୍ ପାଇନି କଂଗ୍ରେସ । ଭୋଟ ପ୍ରତିଶତ ମଧ୍ୟ ବଢ଼ିଯାଇଛି । ଦୁଇ ଦଶନ୍ଧୀ ପରେ ପ୍ରଥମ ଥର ପାଇଁ ୪୩ ପ୍ରତିଶତରୁ ଅଧିକ ଭୋଟ ପାଇଛି ଦଳ । ଗତ ନିର୍ବାଚନ ଠାରୁ ବିଜେପିର ଭୋଟ ପ୍ରତିଶତ କମିଯାଇଛି । ସବୁଠୁ ବଡ଼ କ୍ଷତି ଘଟିଛି ଜେଡିଏସର । ୫ ପ୍ରତିଶତ ଭୋଟ ହରାଇଛି ଏଚଡି କୁମାରସ୍ୱାମୀଙ୍କ ଦଳ ।