ଟିକେଟ କାଟିଲେ, ବସରେ ବୁଲିଲେ ମୁଖ୍ୟମନ୍ତ୍ରୀ ।
‘ମୋ ବସ୍’ କାର୍ଯ୍ୟକ୍ରମର ଶୁଭାରମ୍ଭ କରିଲେ ମୁଖ୍ୟମନ୍ତ୍ରୀ । ବସରେ ବସି ବିଧାନସଭା ଆସିଲେ ମୁଖ୍ୟମନ୍ତ୍ରୀ ।
କନକ ବ୍ୟୁରୋ: ଆଜି ଠାରୁ ରାଜଧାନୀ ଭୁବନେଶ୍ୱରରେ ଆରମ୍ଭ ହୋଇଛି ‘ ମୋ ବସ’ ସେବା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଜୁ ପଟ୍ଟନାୟକ ବିମାନବନ୍ଦର ଠାରେ ‘ ମୋ ବସ୍’ସେବାର ଶୁଭ ଉଦଘାଟନ କରିଛନ୍ତି । ସବୁଠାରୁ ଗୁରୁତ୍ୱପୂର୍ଣ୍ଣ ହେଉଛି ମୁଖ୍ୟମନ୍ତ୍ରୀ ହେବା ପରେ ପ୍ରଥମ ଥର ପାଇଁ ନବୀନ ପଟ୍ଟନାୟକ ବସ ଚଢ଼ି ବିଧାନସଭାକୁ ଆସିଛନ୍ତି । ସାଧାରଣ ଲୋକଙ୍କ ଭଳି କୌଣସି ବିନା ପ୍ରୋଟୋକଲରେ ବସରେ ଯାତ୍ରା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ।
Kanak News is now on WhatsApp
Join and get latest news updates delivered to you via WhatsApp
୮ଟଙ୍କା ମୂଲ୍ୟର ଟିକେଟ ପାଇଁ ମୁଖ୍ୟମନ୍ତ୍ରୀ ବସର ଟିକଟ ବାବଦରେ ବସ ଗାଇଡ଼ଙ୍କୁ ୧୦ ଟଙ୍କା ଦେଇଥିଲେ । ଏବଂ ଗାଇଡ଼ ମୁଖ୍ୟମନ୍ତ୍ରୀଙ୍କୁ ୨ଟଙ୍କା ଫେରସ୍ତ କରିଥିବା ଦେଖିବାକୁ ମିଳିଥିଲା । ରାସ୍ତାରେ ଯାତ୍ରୀମାନଙ୍କ ସହିତ ଆଲୋଚନା କରିଥିଲେ ଏବଂ ଯାତ୍ରୀମାନେ ମୁଖ୍ୟମନ୍ତ୍ରୀଙ୍କୁ ପାଖରେ ପାଇ ସେଲ୍ଫି ଉଠାଇଥିଲେ । ସବୁଠାରୁ ବଡ଼ କଥା ହେଲା ଯେ ମୁଖ୍ୟମନ୍ତ୍ରୀଙ୍କ ବସ୍ ଯାତ୍ରା ସମୟରେ କୌଣସି ସୁରକ୍ଷା କର୍ମଚାରୀ ବସରେ ଉପସ୍ଥିତ ନଥିଲେ । ଏହି ଅବସରରେ ମୁଖ୍ୟମନ୍ତ୍ରୀ କହିଥିଲେ ଯେ ବସ୍ ଗୁଡ଼ିକର କଣ୍ଡକ୍ଟର ମାନଙ୍କୁ ବସ୍ ଗାଇଡ୍ କୁହାଯିବ । ଏବଂ ବସ୍ ଗାଇଡ୍ ପାଇଁ ୫୦ ପ୍ରତିଶତ ମହିଳାଙ୍କୁ ନିଯୁକ୍ତି ଦିଆଯିବ ।
ତେବେ ଏହି ମୋ ବସ ସେବାରେ ବସଗୁଡ଼ିକରେ ଓ୍ଵାଇଫାଇ ସେବା ସହିତ ଯାତ୍ରୀମାନଙ୍କ ସୁରକ୍ଷା ପାଇଁ ସିସିଟିଭି କ୍ୟାମେରା ବ୍ୟବସ୍ଥା କରାଯାଇଛି । ଏହି ମୋ ସେବା ଆରମ୍ଭ ସହିତ ରାଜଧାନରେ ଏହି ବର୍ଗର ଶହେଟି ବସ ଆଜି ଠାରୁ ସେବା ପ୍ରଦାନ ଆରମ୍ଭ କରିଛନ୍ତି । ଆଉ ୩ଶହ ବସ୍ ଖୁବ୍ ଶୀଘ୍ର ରାଜଧାନୀ ରାଜରାସ୍ତାରେ ଗଡ଼ିବ ବୋଲି ମୁଖ୍ୟମନ୍ତ୍ରୀ କହିଛନ୍ତି ।