ଓଡିଶା ଆକାଶରେ ବାରମ୍ବାର ଠାବ ହେଉଛନ୍ତି ଚୀନ ପାରା: କେନ୍ଦ୍ରାପଡା, ପୁରୀ ଓ ସୁନ୍ଦରଗଡରୁ ଉଦ୍ଧାର ହେଲେଣି ୪ଟି ଗୁଇନ୍ଦା ପାରା
କନକ ବ୍ୟୁରୋ: ପାରାଦୀପରୁ ଉଦ୍ଧାର ପାରା ଡେଣାରେ ଚୀନ ଭାଷା ଲେଖାଯାଥିବା ଜଣାପଡିବା ପରେ ଓଡିଶା ଉପରେ ଚୀନର ଆଖି ନେଇ ସନ୍ଦେହ ବଢିବାରେ ଲାଗିଛି । କାରଣ ନିକଟରେ ଏହିଭଳି ୪ଟି ପାରା ଉଦ୍ଧାର ହେଲେଣି । ଆପଣଙ୍କ ଟିଭି ସ୍କ୍ରିନରେ ସେହିଭଳି ୪ଟି ପାରାଙ୍କ ଚିତ୍ର ରହିଛି । ଗତବର୍ଷ ଜାନୁଆରୀ ୩ ତାରିଖରେ ସୁନ୍ଦରଗଡ ଜିଲ୍ଲା କାଂଶବାହାଲ ଅଂଚଳର ସର୍ବେଶ୍ୱର ଛୋଟରାୟଙ୍କ ଘରୁ ଏକ ପାରା ମିଳିଥିଲା । ଯେଉଁ ପାରାର ଡେଣାରେ ଲେଖାଯାଇଥିଲା ଚୀନ ଭାଷା । ପରଦିନ ପୁରୀ ଜିଲ୍ଲା ମାଳତିପାଟପୁରରୁ ମିଳିଥିଲା ଆଉଏକ ପାରା । ଗୋଡରେ ଟ୍ୟାଗ ସହ ଦେହରେ କେମିକାଲ ବୋଳା ହୋଇଥିବା ସେତେବେଳେ ଜଣାପଡିଥିଲା । ସେହିଦିନ କେନ୍ଦ୍ରାପଡା ଜିଲ୍ଲା ମାର୍ଶାଘାଇ ବ୍ଲକ ଦଶିପୁର ଗାଁର ଜୀବନ ମାଝୀଙ୍କ ଘରୁ ଉଦ୍ଧାର ପାରା ଗୋଡରେ ବି ଟ୍ୟାଗ ଥିଲା । ଜାନୁଆରୀ ୫ ତାରିଖରେ ମହାକାଳପଡା ବତୀଘରର ରଞ୍ଜନ ଜାନାଙ୍କ ଘର ପାଖରେ ଦେଖାଯାଇଥିବା ପାରା ଗୋଡରେ ରହିଥିଲା ସନ୍ଦିଗ୍ଧ ଟ୍ୟାଗ୍ । ଏବେ ପୁଣି ଗତ ୬ ତାରିଖରେ ପାରାଦୀପ ସମୁଦ୍ରରେ ସାରଥୀ ବୋଟ୍ରୁ ମିଳିଥିବା ପାରାକୁ ରାଜ୍ୟ ଫରେନସିକ ଲ୍ୟାବରେ ଯାଂଚ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
କୋଣାର୍କ ସମୁଦ୍ର ଉପକୂଳର ୪୦ ନଟିକାଲ ମାଇଲ ଦୂର ସମୁଦ୍ରରେ ମାଛଧରା ବୋଟ୍ରୁ ଉଦ୍ଧାର ହୋଇଛି ଏହି ପାରା । ୨୦୧୨ରେ ମଧ୍ୟ କୋଣାର୍କ ଥାନା ପୋଲିସ ଏକ ହୁମର ପ୍ରଜାତିର ପାରାକୁ ଉଦ୍ଧାର କରିଥିଲା । ଯାହାର ଗୋଡରେ ଏକ ପ୍ଲାଷ୍ଟିକ କ୍ୟାପସୁଲରେ ଉର୍ଦ୍ଦୁ ଭାଷାରେ କିଛି ଲେଖାଯାଇଥିଲା ।
ପ୍ରତିରକ୍ଷା ଦୃଷ୍ଟିରୁ ଦୁଇଟି ଅତି ସମ୍ବେଦନଶୀଳ ଅଂଚଳ ଓଡିଶାରେ ରହିଛି । ସୁନାବେଡାରେ ଥିବା ମିଗ୍ ଇଂଜିନ ଫ୍ୟାକ୍ଟ୍ରି ଓ ଚାନ୍ଦିପୁରରେ ଥିବା କ୍ଷେପଣାସ୍ତ୍ର ଘାଟି ଉପରେ ଚୀନ ଆଖି ପକାଇଥିବା ସନ୍ଦେହ ବଢିବାରେ ଲାଗିଛି । ଗୁଇନ୍ଦା ପାରା ଗୋଡରେ ଟ୍ରାନ୍ସମିଟର ଓ ଗୁପ୍ତ କ୍ୟାମେରା ଖଞ୍ଜି ବଙ୍ଗୋପସାଗରରେ ମଝି ସମୁଦ୍ରରୁ ଜାହାଜରୁ ଛାଡୁଥାଇ ପାରନ୍ତି ଚୀନର ଗୁପ୍ତଚର ସଂସ୍ଥା । ଏମାନେ ଓଡିଶା ଆକାଶରେ ଉଡି ବିଭିନ୍ନ ପ୍ରତିରକ୍ଷା ପ୍ରତିଷ୍ଠାନର ଫଟୋ ଉଠାଇବା ସହ ସୀମା ଆରପଟେ ବସିଥିବା ଏମାନଙ୍କ ହ୍ୟାଣ୍ଡଲରଙ୍କୁ ଯୋଗାଇ ଦେଉଛନ୍ତି । ପାରା ଓଡିଶା ସୀମାରେ ପଶିବା ପରେ ମୂଳ ସ୍ଥାନକୁ ଆଉ ଫେରି ପାରୁନଥିବାରୁ ଲୋକଙ୍କ ହାତରେ ଧରାପଡୁଛନ୍ତି । କେନ୍ଦ୍ରାପଡା, ପୁରୀ ଓ ସୁନ୍ଦରଗଡରୁ ବାରମ୍ବାର ଏହିଭଳି ଗୁଇନ୍ଦା ପାରା ଧରାପଡିବା ପରେ ଓଡିଶା ପୋଲିସର ଚିନ୍ତା ବଢିଯାଇଛି ।
କୁହାଯାଉଛି ୧୯୬୯ରେ ପୁରୀ ଜିଲ୍ଲା ସାକ୍ଷୀଗୋପାଳ ନିକଟରେ ଏକ ଚାଇନା ବେଲୁନ ଜବତ ହୋଇଥିଲା । ଏଥିରେ ଏକ ଛୋଟ ମେସିନ ଲାଗିଥିବାବେଳେ ସେତେବେଳେ ପୋଲିସ ହାତରେ ଲାଗିଥିଲା ।
ପାରାଦୀପ ସମୁଦ୍ରରେ ମାଛଧରା ବୋଟରୁ ଉଦ୍ଧାର ହୋଇଥିବା ଗୁଇନ୍ଦା ପାରାକୁ ନେଇ ଏବେ ଚିନ୍ତାରେ ପଡିଯାଇଛି ପୋଲିସ । କିଏ ଓ କେଉଁ ଉଦ୍ଦେଶ୍ୟରେ ପାରାଟିକୁ ପଠାଇଥିବା ତାହା ଜାଣିବା ଗୁରୁତ୍ୱପୂର୍ଣ୍ଣ ହୋଇପଡିଛି । ପାରା ଗୋଡରେ ଖଞ୍ଜା ଯାଇଥିବା ସୋଲାର ପ୍ୟାନେଲ ଓ ଟ୍ରାନ୍ସମିଟର ସଂପର୍କିତ ତଥ୍ୟ ଜାଣିବା ପାଇଁ ଜୋରଦାର ଉଦ୍ୟମ କରୁଛି ପୋଲିସ । ପାରା ଦେହରୁ ଜବତ ଦୁଇ ଯନ୍ତ୍ରାଂଶକୁ କୋଲକାତା କିମ୍ବା ହାଇଦ୍ରାବାଦରେ ଥିବା ସିଏଫଏସଏଲକୁ ପଠାଇବାକୁ ପ୍ରୟାସ କରାଯାଉଛି ।