ଦାନ୍ତେୱାଡା ଘଟଣା : ଛତିଶଗଡ ମୁଖ୍ୟମନ୍ତ୍ରୀଙ୍କ ବଡ ପ୍ରଶ୍ନ; ନକ୍ସଲମାନେ ଏତେ ପରିମାଣ ଅସ୍ତ୍ରଶସ୍ତ୍ର ପାଉଛନ୍ତି କିପରି ?
କନକ ବ୍ୟୁରୋ : ନକ୍ସଲମାନେ ଏତେ ପରିମାଣରେ ଅସ୍ତ୍ରଶସ୍ତ୍ର ଓ ବିସ୍ଫୋରକ କେଉଁଠାରୁ ଆଣୁଛନ୍ତି । ଏହାର ତଦନ୍ତ ହେବା ଦରକାର । ବୁଧବାର ଛତିଶଗଡ଼ର ଦନ୍ତେୱାଡ଼ାରେ ହୋଇଥିବା ନକ୍ସଲ ଆକ୍ରମଣକୁ ନେଇ ସାରା ଦେଶରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ଘଟଣାର ତଦନ୍ତ ଆରମ୍ଭ ହୋଇଥିବାବେଳେ ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବଘେଲ ଏଭଳି ଏକ ପ୍ରଶ୍ନ ଉଠାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେ କହିଛନ୍ତି ଯେ ନକ୍ସଲମାନେ ଏତେ ଅସ୍ତ୍ରଶସ୍ତ୍ର କେଉଁଠୁ ଆଣୁଛନ୍ତି ତାହାକୁ ନେଇ ଆମେ ଲଗାତାର ପ୍ରଶ୍ନ ଉଠାଉଛୁ । ସେମାନେ କେମିତି ଏତେ ପରିମାଣର ବିସ୍ଫୋରକ ଉତ୍ପାଦନ କରିପାରୁଛନ୍ତି ? କେନ୍ଦ୍ର ସରକାର ଏହାର ତଦନ୍ତ କରିବା ଦରକାର । ଏସବୁ ଜିନିଷ ଛତିଶଗଡ଼ରେ ତିଆରି ହେଉନାହିଁ, ତେବେ ନକ୍ସଲଙ୍କ ପାଖରେ କେମିତି ପହଂଚୁଛି ବୋଲି ପ୍ରଶ୍ନ କରିଛନ୍ତି ।
ଛତିଶଗଡ଼ ମୁଖ୍ୟମନ୍ତ୍ରୀ କହିଛନ୍ତି ଯେ ଏହି ଘଟଣା ଘଟିଥିବା ସ୍ଥାନର ଭୂଗୋଳ ବୁଝିବାର ଆବଶ୍ୟକତା ରହିଛି । ଏହା ୩ଟି ଜିଲ୍ଲା ସୁକମା, ବିଜାପୁର ଓ ଦାନ୍ତେୱାଡାକୁ ଲାଗି ରହିଛି । ଏଠାରେ ରାସ୍ତା ନଥିଲା । ଏଠାରେ ରାସ୍ତା ନିର୍ମାଣ ପାଇଁ ଆମର ଅନେକ ଯବାନ ସହିଦ ହୋଇଥିଲେ । ଏବେ ଏହି ରାସ୍ତା ନିର୍ମାଣ ହୋଇଛି । ଏହି ଅଞ୍ଚଳ ନକ୍ସଲଙ୍କ କବଜାରେ ଥିଲା । ଆମେ ଦୁଇ ବର୍ଷ ମଧ୍ୟରେ ଏଠାରେ ୭୫ଟି ଶିବିର ସ୍ଥାପନ କରିଛୁ । ଏଠାରେ ରାସ୍ତା ନିର୍ମାଣ କରାଯାଉଛି ଏବଂ ଶିବିର ସ୍ଥାପନ କରାଯାଉଛି ବୋଲି ସେ କହିଛନ୍ତି ।
ସେପଟେ ବୁଧବାର ଦନ୍ତେୱାଡ଼ାରେ ସୁରକ୍ଷାକର୍ମୀଙ୍କ ଉପରେ ହୋଇଥିବା ଆକ୍ରମଣ ପାଇଁ ଭାରତୀୟ କମ୍ୟୁନିଷ୍ଟ ପାର୍ଟି (ମାଓବାଦୀ)ର ଦରଭା ଡିଭିଜନ ନିଜକୁ ଦାୟୀ କରିଛି । ବ୍ରାହ୍ମଣବାଦୀ ହିନ୍ଦୁତ୍ୱ ଓ ଫାସିବାଦୀ କେନ୍ଦ୍ର ସରକାର ଓ ଜନବିରୋଧୀ ରାଜ୍ୟ ସରକାର ସାଧାରଣ ଲୋକଙ୍କ ଉପରେ କରୁଥିବା ଅତ୍ୟାଚାରର ଜବାବରେ ଏହି ଆକ୍ରମଣ କରାଯାଇଛି ବୋଲି ଦରଭା ଡିଭିଜନ କମିଟିର ସଚିବ ସାଇନାଥ ଏକ ପ୍ରେସ ବିଜ୍ଞପ୍ତି ଜାରି କରି କହିଛନ୍ତି ।