ପାରମ୍ପରିକ ଶୈଳୀରେ ପ୍ରସ୍ତୁତ ହେଉଛି ପତୁଆ। ଅର୍ଡ଼ର କଲେ ଘରେ ପହଂଚୁଛି ଛତୁ, ଚୁନାମାଛ । ଉଦାହରଣ ପାଲଟିଛନ୍ତି ବାଲେଶ୍ୱର ଅଂଚଳର ମହିଳା ।
କନକ ବ୍ୟୁରୋ: ପତୁଆ ବା ପତ୍ରପୋଡା ଖାଇବାକୁ କିଏ ବା ଭଲ ନପାଏ । ଏହା ଖାଇବାକୁ ଯେତିକି ସ୍ୱାଦିଷ୍ଟ ସେତିକି ସ୍ୱାସ୍ଥ୍ୟ ଉପଯୋଗୀ । ଦିନକୁ ଦିନ ଚୁଲିରେ ରୋଷେଇ କମ୍ ହେଉଥିବା ବେଳେ ଦେଶୀ ପଦ୍ଧତିରେ ପ୍ରସ୍ତୁତ ଥିବା ଏହି ପତ୍ରପୋଡ଼ା ଖାଦ୍ୟ ଏବେ ଖାଇବା ଥାଳିରୁ ଉଭାନ ହେଲାଣି । କିନ୍ତୁ ଏହି ପାରମ୍ପାରିକ ଖାଦ୍ୟକୁ ବଂଚାଇ ରଖିବା ସହ ଏହାକୁ ପ୍ରସ୍ତୁତ କରି ରୋଜଗାରକ୍ଷମ ହେଉଛନ୍ତି ବାଲେଶ୍ୱରର ଅନେକ ମହିଳା । ବାଦାମ, ଛତୁ, କୋଇଲି ରୁଖା, ଚୁନାମାଛ, ହିଡ଼ିମିଚା, ମଦରଙ୍ଗା ଭଳି ଦେଶି ଜିନିଷରେ ପାରମ୍ପରିକ ପଦ୍ଧତିରେ ପତୁଆ ପ୍ରସ୍ତୁତ କରି ଅଳ୍ପ ସମୟ ଭିତରେ ଲୋକଙ୍କ ଘରେ ପହଁଚାଉଛନ୍ତି । ୧୨ ଜଣ ମହିଳା ଏକାଠି ହୋଇ ଏହି ସବୁ ଜିନିଷ ପ୍ରସ୍ତୁତ କରି ପ୍ରାୟ ୨୩ ପ୍ରକାରର ପତ୍ରପୋଡ଼ା ବା ପତୁଆ ପ୍ରସ୍ତୁତ କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପାରମ୍ପାରିକ ଶୈଳୀରେ ଶିଳବଟା ମସଲା ଦେଇ, କଦଳୀପତ୍ରରେ ଏହି ସବୁ ସାମଗ୍ରୀକୁ ବାନ୍ଧି ଚୁଲିରେ ପତ୍ରପୋଡ଼ା ପ୍ରସ୍ତୁତ କରୁଛନ୍ତି ମହିଳା । ପତୁଆ ତିଆରି କରିବାର ସମସ୍ତ ସାମଗ୍ରୀ ହାତ ପାହାନ୍ତାରେ ମିଳୁଥିବାରୁ ରୋଷେଇ ସରିବାର ୨ଘଂଟା ଭିତରେ ମାଟି ଚୁଲିରେ ପୋଡି ଏହି ସ୍ୱାଦିଷ୍ଟ ଖାଦ୍ୟ ପ୍ରସ୍ତୁତ ହେଉଛି । ପତୁଆ ପ୍ରସ୍ତୁତ ହେବା ପରେ ଆଲୁମିନିୟମ ଫଏଲ ଭିତରେ ଭର୍ତି କରି ପ୍ରସ୍ତୁତକାରୀ ମହିଳାଙ୍କ ନାମ ଲେଖାଯାଇ ଅର୍ଡ଼ର କରିଥିବା ଗ୍ରାହକଙ୍କ ପାଖରେ ପହଁଚାଯାଉଛି । ଫଳରେ ପତୁଆ ପ୍ରସ୍ତୁତ କରିଥିବା ମହିଳାଙ୍କୁ ସ୍ୱତନ୍ତ୍ର ପରିଚୟ ମିଳିବ । ଆଉ ଏହାକୁ ଲୋକଙ୍କ ପାଖରେ ପହଂଚାଉଛି ଯୁବ ବିକାଶ ସଂଗଠନ ।
ପତୁଆ ପରି ପାରମ୍ପରିକ ଖାଦ୍ୟ ହଜିବାକୁ ବସିଥିବାବେଳେ ଏହାକୁ ତିଆରି କରି ମହିଳା ମାନେ ସ୍ୱାବଲମ୍ବୀ ହୋଇପାରିଛନ୍ତି । ଯାହା ତାଙ୍କୁ ଏକ ସ୍ୱତନ୍ତ୍ର ପରିଚୟ ଦେଇଛି । ଓଡ଼ିଆ ପରମ୍ପରାକୁ ବଜାୟ ରଖିବା ସହ ଅନ୍ୟ ମହିଳାଙ୍କ ପାଇଁ ଉଦାହରଣ ପାଲଟିଛନ୍ତି ପତୁଆ ପ୍ରସ୍ତୁତ କରୁଥିବା ମହିଳା ।