ଉତ୍ତେଜନା ଭିତରେ ଅନିର୍ଦ୍ଦିଷ୍ଟ କାଳ ପାଇଁ ସମ୍ବଲପୁରରେ କର୍ଫ୍ୟୁ: ଆଉ ୨ ଦିନ ଇଣ୍ଟରନେଟ୍ ବନ୍ଦ, ସହରରେ ପୁଲିସ ଛାଉଣୀ
କନକ ବ୍ୟୁରୋ: ହନୁମାନ ଜୟନ୍ତୀ ଶୋଭାଯାତ୍ରାବେଳେ ସମ୍ବଲପୁରରେ ସୃଷ୍ଟି ହୋଇଥିବା ହିଂସାକାଣ୍ଡକୁ ନେଇ ଭିତରେ ଭିତରେ ଲାଗି ରହିଛି ଚାପା ଉତେଜନା । ଗତକାଲି ରାତିରେ ଗୋଟିଏ ପଟେ ହନୁମାନ ଜୟନ୍ତୀ ଶୋଭାଯାତ୍ରା ଚାଲିଥିବାବେଳେ, ଅନ୍ୟପଟେ ଉତେଜନା ପ୍ରକାଶ ପାଇବା ପରେ, ପ୍ରଶାସନ ଏହାକୁ ଗୁରୁତର ସହ ନେଇଛି । ଆଉ ପୂରା ସହରରେ କର୍ଫ୍ୟୁ ଲଗାଇଛି । ଗତରାତିରୁ ଲାଗୁ କରିଥିବା କଟକଣା ପରବର୍ତି ନିର୍ଦ୍ଦେଶ ନଆସିବା ପର୍ଯ୍ୟନ୍ତ ବଳବତର ରହିବ ବୋଲି ସମ୍ବଲପୁର ଜିଲ୍ଳା ପ୍ରଶାସନ ଘୋଷଣା କରିଛନ୍ତି । ଏବଂ କର୍ଫ୍ୟୁ ସମୟରେ ଜନସାଧାରଣଙ୍କୁ ଘରୁ ନବାହାରିବାକୁ କୁହାଯାଇଛି । ତେବେ କୌଣସି ଗୁଜବକୁ ବିଶ୍ୱାସ ନକରିବାକୁ ପ୍ରଶାସନ ପକ୍ଷରୁ ଅପିଲ କରାଯାଇଛି । ସେପଟେ ସମ୍ବଲପୁର ଯାଇ ସମୀକ୍ଷା ପରେ, ଖୁବ ଶୀଘ୍ର ଶାନ୍ତି ଫେରିବ ବୋଲି ଆଶା ରଖିଛନ୍ତି ପୋଲିସ ଡିଜି ।
Kanak News is now on WhatsApp
Join and get latest news updates delivered to you via WhatsApp
ହନୁମାନ ଜୟନ୍ତୀ ଶୋଭାଯାତ୍ରାରେ ଆରମ୍ଭ ହୋଇଥିବା ହିଂସାକାଣ୍ଡକୁ ନିୟନ୍ତ୍ରଣ କରିବା ପାଇଁ ପୁରା ସହରରେ ଲାଗୁ ହୋଇଛି କର୍ଫ୍ୟୁ । ଶୁକ୍ରବାର ମଧ୍ୟରାତ୍ରିରୁ ସମ୍ବଲପୁରରେ ଲାଗିଛି ଏହି କଟକଣା । ରାତି ୧୨ଟାରୁ ପରବର୍ତି ନିର୍ଦ୍ଦେଶ ନଆସିବା ପର୍ଯ୍ୟନ୍ତ କଟକଣା ବଳବତର ରହିବ ବୋଲି ଜିଲ୍ଲା ପ୍ରଶାସନ ପକ୍ଷରୁ ଘୋଷଣା କରାଯାଇଛି । କର୍ଫ୍ୟୁ ସମୟରେ ସାଧାରଣ ଲୋକଙ୍କୁ ଘରୁ ବାହାରିବାକୁ ମନା କରାଯାଇଛି । ଯେଉଁମାନେ ଘରୁ ବାହାରିବେ ସେମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠନ ଗ୍ରହଣ କରାଯିବ ବୋଲି ପ୍ରଶାସନ ପକ୍ଷରୁ ଲୋକଙ୍କୁ ସଚେତନ କରାଯାଇଛି ।
ସମ୍ବଲପୁର ସହରର ୬ଟି ଥାନା ଅଂଚଳରେ କର୍ଫ୍ୟୁ ଜାରି କରାଯାଇଛି । ଟାଉନ ଥାନା, ଧନୁପାଲି ଥାନା, କ୍ଷେତରାଜପୁର ଥାନା, ଅଇଁଠାପାଲି ଥାନା, ବରେଇପାଲି ଥାନା ଓ ସଦର ଥାନା ଅଂଚଳରେ କର୍ଫ୍ୟୁ କଟକଣା ଜାରି କରାଯାଇଛି । ସ୍ଥିତିରେ ସୁଧାର ନ ଆସିବା ଯାଏଁ କର୍ଫ୍ୟୁ ଜାରି ରହିବ । ତେବେ ସହରରେ ସ୍ଥିତି ନିୟନ୍ତ୍ରଣରେ ଥିବା କହିବା ସହ, କେମିତି ଶାନ୍ତି ଫେରିବ ସେଥିପାଇଁ ଜନସାଧାରଣଙ୍କୁ ଅପିଲ କରିଛନ୍ତି ଜିଲ୍ଲାପାଳ ଅନନ୍ୟା ଦାସ । ଜିଲ୍ଲାପାଳ ଅପିଲ କରି କହିଛନ୍ତି, କୌଣସି ପ୍ରକାର ଗୁଜବ ଉପରେ ବିଶ୍ୱାସ କରନ୍ତୁ ନାହିଁ । କୌଣସି ଗୁଜବ ସୃଷ୍ଟି କରନ୍ତୁ ନାହିଁ । ସ୍ୱାଭାବିକ ସ୍ଥିତି ଫେରାଇ ଆଣିବାକୁ ଜାରି ରହିଛି ଉଦ୍ୟମ ।
ଯେମିତି ଆଉ କୌଣସି ଅସ୍ୱାଭାବିକ ପରିସ୍ଥିତି ନଉପୁଜେ ସେଥିପାଇଁ ସମ୍ବଳପୁର ସୀମାକୁ ସିଲ କରିଛି ପ୍ରଶାସନ । ବିଶେଷକରି କୌଣସି ଅସାମାଜିକ ତତ୍ୱ ଯେମିତି ପ୍ରବେଶ କରି ନପାରିବେ ତା ଉପରେ ଗୁରୁତ୍ୱ ଦେଇଛି ପ୍ରଶାସନ । ଏଥିସହ ଇଂଟରନେଟ୍ ସେବାକୁ ଆଗାମି ୧୭ତାରିଖ ପର୍ଯ୍ୟନ୍ତ ବନ୍ଦ ରଖିବାକୁ ଘୋଷଣା କରାଯାଇଛି । ଏବଂ ୪୩ପ୍ଲାଟୁନରୁ ଅଧିକ ସୁରକ୍ଷା ବଳ ମୂତୟନ ହୋଇଛନ୍ତି ।
କର୍ଫ୍ୟୁ ଭିତରେ ସମ୍ବଲପୁର ଗସ୍ତ କରିଛନ୍ତି ପୋଲିସ ଡିଜି । ସେଠାରେ ସ୍ଥିତିର ସମୀକ୍ଷା କରିଛନ୍ତି । ବରିଷ୍ଠ ଅଧିକାରୀଙ୍କ ସହ ଆଲୋଚନା କରିଛନ୍ତି । ଆଉ ସମୀକ୍ଷା ପରେ, କହିଛନ୍ତି, ଶାନ୍ତି ଶୃଂଖଳା ବଜାୟ ରଖିବାକୁ ଚେଷ୍ଟା କରାଯାଉଛି । ସ୍ଥିତି ଭଲ ଆଡକୁ ଗତି କରୁଛି । ଦିନେ ଦୁଇ ଦିନ ଭିତରେ ସ୍ଥିତି ସୁଧୁରିବ ବୋଲି ଆଶା କରାଯାଉଛି । ହେଲେ, କଫ୍ରୁ୍ର୍ୟ ବଳବତ୍ତର ରହିବ । ଇଂଟରନେଟ୍ ବନ୍ଦ ରହିବ । ଗଣ୍ଡଗୋଳକାରୀଙ୍କୁ ଧରିବାକୁ ଚେଷ୍ଟା କରାଯାଉଛି । କର୍ଫ୍ୟୁ ସମୟରେ ସହଯୋଗ ପାଇଁ ଲୋକଙ୍କୁ ଅପିଲ କରିଛନ୍ତି । ତେବେ କାଲିର ପରୀକ୍ଷା ପାଇଁ ବ୍ୟବସ୍ଥା କରାଯାଇଛି ବୋଲି କହିଛନ୍ତି ଡିଜି । ପରୀକ୍ଷା ପାଇଁ କଟକଣା କୋହଳ ହୋଇପାରେ ।
ସାଧାରଣ ଲୋକଙ୍କ ଆବଶ୍ୟକତାକୁ ଦୃଷ୍ଟିରେ ରଖି କର୍ଫ୍ୟୁ ସମୟରେ, ଦିନକୁ ଦୁଇଥର କଟକଣା କୋହଳ ହେବ ବୋଲି ପ୍ରଶାସନ ପକ୍ଷରୁ ସ୍ପଷ୍ଟ କରାଯାଇଛି । ପ୍ରଶାସନର ନିଷ୍ପତି ଅନୁସାରେ, ସକାଳ ୮ଟାରୁ ୧୦ଟା ଯାଏଁ ଏବଂ ଅପରାହ୍ଣ ସାଢେ ୩ଟାରୁ ସନ୍ଧ୍ୟା ସାଢେ ୫ଟା ଯାଏଁ ଜରୁରୀ କାମର ବାହାରକୁ ବାହାରିପାରିବେ ଲୋକେ । କର୍ଫ୍ୟୁ ସମୟରେ ଡାକ୍ତରଖାନା, ଔଷଧ ଦୋକାନ ଭଳି ଆତ୍ୟାବଶ୍ୟକ ସେବା ବ୍ୟତିତ ଅନ୍ୟ ସବୁ କିଛି ବନ୍ଦ ରହିବ । ସେହିପରି ଟ୍ରେନ ଯାତ୍ରୀ ଓ ବିମାନ ଯାତ୍ରୀ, ଟିକେଟ ଦେଖାଇ ଯାଇପାରିବେ । ଜରୁରୀ ସ୍ୱାସ୍ଥ୍ୟ ସେବା ପାଇଁ ୨୪ ଘଂଟିଆ ହେଲପଲାଇନ ନଂବର ଜାରି କରାଯାଇଛି । ହେଲପ ଲାଇନ ନଂବର ହେଉଛି ୭୬୫୫୮୦୦୭୬୦ । ତେବେ କଟକଣା କୋହଳ ସମୟ ବ୍ୟତିତ ସାଧାରଣ ଲୋକ ଅନ୍ୟ ସମୟରେ ପଦାକୁ ବାହାରିଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଘୋଷଣା କରାଯାଇଛି ।