ରାଜନୀତିରେ ରୋଚକ ଓ ଭାବପୂର୍ଣ୍ଣ ଦୃଶ୍ୟ। ବିଶ୍ୱଭୂଷଣ ହରିଚନ୍ଦନଙ୍କ ବିଦାୟୀ କାର୍ଯ୍ୟକ୍ରମରେ ପାଦ ଛୁଇଁ ପ୍ରଣାମ କଲେ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ।
କନକ ବ୍ୟୁରୋ: ରାଜନୀତିର ପଶାପାଲିରେ ଏମିତି ଫଟୋ ଖୁବ୍ କମ୍ ଦେଖିବାକୁ ମିଳେ । କାରଣ ଆରୋପ ଓ ପ୍ରତ୍ୟାରୋପର ପର୍ବ ଭିତରେ କେଉଁଠି ସମ୍ପର୍କର ମଧୁରତା ଯେମିତି ଲୁଚି ହଜିଯାଇଛି । ହେଲେ ଏହି ଫଟୋଟି ପୁଣି ଥରେ ପ୍ରମାଣ କରୁଛି, ରାଜନୀତିରେ ଏବେବି ସୌଜନ୍ୟ ଅଛି, ସମ୍ମାନ ଅଛି, ସୌହାର୍ଦ୍ଦ୍ୟ ବି ଅଛି । ରାଜ୍ୟର ରାଜ୍ୟପାଳ ଯେତେବେଳେ ନିଜ କାର୍ଯ୍ୟକାଳ ସାରି ବିଦାୟ ନେଉଛନ୍ତି ତାଙ୍କ ପାଦ ଛୁଇଁ ସମ୍ମାନର ସହ ତାଙ୍କୁ ବିଦାୟ ଦେଉଛନ୍ତି ମୁଖ୍ୟମନ୍ତ୍ରୀ
Kanak News is now on WhatsApp
Join and get latest news updates delivered to you via WhatsApp
ଭାରତୀୟ ସାମ୍ବିଧାନିକ ବିଧି ବ୍ୟବସ୍ଥାରେ ରାଜ୍ୟପାଳ ରାଜ୍ୟର ସାମ୍ବିଧାନିକ ମୁଖ୍ୟ । ତାଙ୍କରି ନାମରେ ଶାସନ ଚାଲେ । ହେଲେ କାର୍ଯ୍ୟକାରୀ ମୁଖ୍ୟ ହେଉଛନ୍ତି ମୁଖ୍ୟମନ୍ତ୍ରୀ । ସରକାରର ମୁଖ୍ୟ ହିସାବରେ ସାରା ରାଜ୍ୟର ଦାୟିତ୍ୱ ତାଙ୍କ ଉପରେ । ଆଉ ଏହି ଦୁଇ ମୁଖ୍ୟଙ୍କ ମଧ୍ୟରେ ତାଳମେଳ ରହିବା ନିହାତି ଜରୁରୀ । ନହେଲେ ରାଜ୍ୟର ପରିଚାଳନା କଷ୍ଟକର ହୋଇପଡ଼େ । ପଶ୍ଚିମବଙ୍ଗ, କେରଳ ପରି ଅଣବିଜେପି ଶାସିତ ରାଜ୍ୟରେ ଏହାର ଉଦାହରଣ ମଧ୍ୟ ଦେଖିବାକୁ ମିଳିଛି । ହେଲେ ଆନ୍ଧ୍ରରେ ତକ୍ରାଳୀନ ରାଜ୍ୟପାଳ ବିଶ୍ୱଭୂଷଣ ହରିଚନ୍ଦନ ଓ ମୁଖ୍ୟମନ୍ତ୍ରୀ ଜଗନ ରେଡ୍ଡୀଙ୍କ ମଧ୍ୟରେ ଏକ ବେଶ୍ ଭଲ ତାଳମେଳ ଦେଖିବାକୁ ମିଳିଥିଲା । ନିକଟରେ ଆନ୍ଧ୍ରରେ ୩ ବର୍ଷ ୭ ମାସର କାର୍ଯ୍ୟକାଳ ପରେ ବିଶ୍ୱଭୂଷଣଙ୍କୁ ଛତିଶଗଡ଼ର ରାଜ୍ୟପାଳ ଭାବେ ଦାୟିତ୍ୱ ମିଳିଛି । ଆଉ ଏଥିପାଇଁ ସେ ମଙ୍ଗଳବାର ଆନ୍ଧ୍ର ଛାଡ଼ିଛନ୍ତି । ଆଉ ସେହି ବିଦାୟ ସମୟରେ ଏମିତି କିଛି ଭାବପୂର୍ଣ୍ଣ ଫଟୋ ସାମ୍ନାକୁ ଆସିଛି । ବିଶ୍ୱଭୂଷଣଙ୍କ ପାଦ ଛୁଇଁ ପ୍ରଣାମ କରୁଛନ୍ତି ଆନ୍ଧ୍ର ମୁଖ୍ୟମନ୍ତ୍ରୀ ଜଗନ ରେଡ୍ଡୀ ।
ରାଜ୍ୟପାଳଙ୍କୁ ବିଦାୟୀ ଉତ୍ସବରେ ଉଭୟ ବିଶ୍ୱଭୂଷଣ ଓ ଜଗନ ଭାବପ୍ରବଣ ହୋଇପଡ଼ିଥିଲେ । ଜଗନ କହିଥିଲେ, ବିଶ୍ୱଭୂଷଣ ତାଙ୍କ ପାଇଁ ବାପା ଭଳି । ଏହାସହ ସେ ଜଣେ ବରିଷ୍ଠ ରାଜନେତା ଓ ଆଇନ ବିଶାରଦ । ରାଜ୍ୟପାଳ ଭାବେ ନିଜ କାର୍ଯ୍ୟକାଳ ସମୟରେ ରାଜ୍ୟ ସରକାରଙ୍କ ସହ ମିଳିମିଶି କାର୍ଯ୍ୟ କରିଛନ୍ତି । ଆଗାମୀ ଦିନରେ ସ୍ୱାସ୍ଥ୍ୟ ଓ ନୂଆ ଦାୟିତ୍ୱରେ ସଫଳତା ପାଇଁ କାମନା କରୁଛି ବୋଲି କହିଛନ୍ତି ଜଗନ । ସେପଟେ ବିଶ୍ୱଭୂଷଣ କହିଛନ୍ତି ଯେ, ଆନ୍ଧ୍ର ତାଙ୍କ ପାଇଁ ଦ୍ୱିତୀୟ ଘର । ଆଉ ସେ ଯେତେବେଳେ ଏହି ଘର ଛାଡ଼ି ଯାଉଛନ୍ତି, ମନରେ ଦୁଃଖ ନେଇ ଯାଉଛନ୍ତି, ହେଲେ ଆନ୍ଧ୍ରବାସୀଙ୍କ ଭଲ ପାଇବା ମଧ୍ୟ ତାଙ୍କ ସାଥୀରେ ଅଛି ।