କନକ ବ୍ୟୁରୋ : ଆକାଶ ଏୟାର ଲାଇନ୍ସରୁ ୪୩ ଜଣ ପାଇଲଟ ଏକାସାଥିରେ ଇସ୍ତଫା ଦେବା ପରେ ଏବେ ସଂକଟରେ ପଡିଛି । ଏହି କାରଣରୁ ଏୟାରଲାଇନ୍ସ ତାର ଉଡାଣ ବନ୍ଦ କରିପାରେ ବୋଲି ଆଶଂକା କରାଯାଉଛି । ପାଇଲଟଙ୍କ ଅଚାନକ ଇସ୍ତଫା ପରେ ସେପ୍ଟେମ୍ବର ମାସରେ ଦୈନିକ ୨୪ଟି ଉଡାଣ ବାତିଲ କରିବାକୁ ପଡିଛି । ଏନେଇ ଏୟାରଲାଇନ୍ସ ତରଫରୁ ମଙ୍ଗଳବାର ଦିନ ଦିଲ୍ଲୀ ହାଇକୋର୍ଟରେ ସୂଚନା ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏୟାରଲାଇନର ଓକିଲ ବିଚାରପତି ଜଷ୍ଟିସ ମନପ୍ରୀତ ସିଂ ଅରୋଡାକୁ କହିଛନ୍ତି କି, ଇସ୍ତଫା ଦେଇଥିବା ପାଇଲଟମାନେ ନୋଟିସ ଅବଧି ପୂରଣ କରିନଥବାରୁ ଆକାଶ ଏୟାରଲାଇନ ପ୍ରତିଦିନ ଅନେକ ବିମାନ ଉଡାଣ ବାତିଲ କରୁଛି । କହିରଖୁ କି, ପ୍ରଥମ ଅଫିସରଙ୍କ ପାଇଁ ନୋଟିସ ଅବଧି ୬ ମାସ ଓ କ୍ୟାପଟେନଙ୍କ ପାଇଁ ୧ବର୍ଷ ରହିଛି ।
ଚୁକ୍ତିଭିତ୍ତିକ ନୋଟିସ ଅବଧି ପୂରଣ ନକରି ଚାଲିଯାଇଥିବା ପାଇଲଟଙ୍କ ବିରୋଧରେ ଦଣ୍ଡନୀୟ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଏୟାରଲାଇନ୍ସ ପକ୍ଷରୁ ଦାବି କରାଯାଇଛି । ଏହାସହ ବିମାନ ବାତିଲ ଯୋଗୁଁ ରାଜସ୍ୱ ହାନି ପାଇଁ କମ୍ପାନୀ ୨୨ କୋଟି ଟଙ୍କା ଦାବି କରିଛି ।
ଅନ୍ୟପକ୍ଷରେ ଏକ ଜାତୀୟ ଗଣମାଧ୍ୟମର ପ୍ରକାଶିତ ରିପୋର୍ଟ ମୁତାବକ ଆକାଶକୁ ଅନ୍ତର୍ଜାତୀୟ ବିମାନ ଚଳାଚଳ ପାଇଁ ସବୁଜ ସଂକେତ ଦିଆଯାଇଛି । କିନ୍ତୁ ଯେଉଁ ଦେଶକୁ ଆକାଶ ଏୟାରଲାଇନ୍ସ ବିମାନ ଚଳାଚଳ କରିବାକୁ ଚାହୁଁଛି ସେହି ଦେଶଗୁଡିକର ଅନୁମୋଦନକୁ ଅପେକ୍ଷା କରିଛି । ବର୍ତମାନ ଏୟାରଲାଇନ୍ସ କେବଳ ଘରୋଇ ରୁଟରେ ଚଳାଚଳ କରୁଛି ।