ସୁନ୍ଦରଗଡ଼ର ସଫଳ ଚାଷୀ । ଆଇଟିଆଇ ପାସ୍ କରିବା ପରେ ଚାଷ କାମକୁ ଆପଣାଇ ହେଉଛନ୍ତି ଲାଭବାନ । ଚାକିରି ଅପେକ୍ଷା ମିଳୁଛି ଭଲ ରୋଜଗାର
କନକ ବ୍ୟୁରୋ: ଜଣେ ସଫଳ ଚାଷୀଙ୍କ କାହାଣୀ । ଆଇଟିଆଇ ପାଠ ପଢ଼ା ପରେ ଚାଷ କାମକୁ ଆପଣାଇ ସଫଳ ହୋଇଛନ୍ତି । ୮ ଏକର ଜମିରେ ବିଭିନ୍ନ ପ୍ରକାରର ଚାଷ କରୁଛନ୍ତି ସୁନ୍ଦରଗଡ ଟାଙ୍ଗରପାଲୀ ବ୍ଲକ ରତନପୁର ଗାଁର ହିରୋଦ ପଟେଲ । ହିରୋଦଙ୍କ ବୟସ ପାଖାପାଖି ୨୭ ବର୍ଷ ହେବ । ହେଲେ ଏହି ଚାଷ କାମରୁ ସେ ମାସକୁ ଲକ୍ଷାଧିକ ଟଙ୍କା ରୋଜଗାର କରୁଛନ୍ତି । ମାଟ୍ରିକ୍ ପାସ୍ କରିବା ପରେ ଆଇଟିଆଇ ପାସ୍ କରିଛନ୍ତି ହିରୋଦ । ଚାକିରି ପାଇଁ ଚେଷ୍ଟା କରି ବିଫଳ ହେବା ପରେ ଚାଷ କରିବାକୁ ମନସ୍ତ କରିଥିଲେ । ୪ ବର୍ଷ ତଳେ ଆରମ୍ଭ ହୋଇଥିବା ପନିପରିବା ଚାଷ ଏବେ ତାଙ୍କୁ ଦେଇଛି ଆଶନୁରୂପକ ସଫଳତା ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟର ବିଭିନ୍ନ ଅଞ୍ଚଳର ଚାଷୀଙ୍କ ଠାରୁ ଚାଷ କାମ ଶିଖିବା ପରେ ନିଜ ଜମିରେ ପାଚିଲା କଦଳୀ, କଞ୍ଚା କଦଳୀ, ଧାନ, ମାଛ, ଆମ୍ବ, ପିଜୁଳି, ବରକୋଳି ସହ ବିଭିନ୍ନ ପ୍ରକାରର ପନିପରିବା ଚାଷ କରିଛନ୍ତି । ଏବେ କଦଳୀରୁ ୮ ଲକ୍ଷ ଟଙ୍କା ରୋଜଗାର ହେଉଥିବା ବେଳେ ମାଛରୁ ରୋଜଗାର ହେଉଛି ୫ଲକ୍ଷ । ବାର୍ଷିକ ପାଖାପଖି ୧୫ ଲକ୍ଷ ଟଙ୍କାରୁ ଅଧିକ ଟଙ୍କା ରୋଜଗାର କରୁଛନ୍ତି ହିରୋଦ । ନିଜେ ରୋଜଗାର କରିବା ସହ ୪୦ରୁ ଅଧିକ ଲୋକଙ୍କୁ ଏହି କାମରେ ସେ ନିୟୋଜିତ କରିଛନ୍ତି ।
ଏହି କାମରେ ହିରୋଦଙ୍କୁ ତାଙ୍କ ବାପା ମା’ ପୂର୍ଣ୍ଣ ସହଯୋଗ କରନ୍ତି । ଚାକିରି ଅପେକ୍ଷା ଚାଷ କାମରୁ ଅଧିକ ଲାଭ ମିଳୁଥିବାବେଳେ ଏହାକୁ ନେଇ ଖୁସି ପ୍ରକାଶ କରିଛନ୍ତି ହିରୋଦଙ୍କ ବାପା-ମା’ । ତେବେ ଫଳ ପନିପରିବା ସହ ଫୁଲ ଚାଷ କରିଛନ୍ତି ହିରୋଦ । ପୋଖରୀ ହୁଡ଼ାରେ ଗେଣ୍ଡୁ ଫୁଲ ଚାଷ କରି ସେଥିରୁ କିଛି ରୋଜଗାର କରୁଛନ୍ତି । ହିରୋଦଙ୍କ ସଫଳ ଚାଷ ଏବେ ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛି ।