କନକ ବ୍ୟୁରୋ: କାର୍ଯ୍ୟଶୈଳିରୁ ହିଁ ଜୀବନର ମହନିୟତା ପ୍ରକାଶିତ ହୁଏ । କଥାରେ କୁହାଯାଏ, ଖୁସି ବାଂଟିଲେ ଦ୍ୱିଗୁଣିତ ହୁଏ । ଏଭଳି କଥାକୁ ସତରେ ପରିଣତ କରିଛନ୍ତି ଭଂଜନଗରର ଜଣେ ସ୍ୱେଚ୍ଛାସେବୀ ଅରଖିତ ପରିଛା । ନିଆରା ଢଙ୍ଗରେ ପାଳନ କରିଛନ୍ତି ଜନ୍ମଦିନ । ଉପାନ୍ତ ଡ଼ିହକୁମ୍ପାପଲ୍ଲୀ ଗାଁର ପିଲାଙ୍କୁ ଭଂଜନଗର ଶିଶୁ ଉଦ୍ୟାନକୁ ଆଣି ଟଏ ଟ୍ରେନ୍ରେ ବୁଲାଇବା ସହ ହୋଟେଲରେ ଖୁଆଇ ଘରକୁ ପଠାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପାର୍କ ବୁଲିଲେ ଗାଁ ପିଲା.. ଟଏ ଟ୍ରେନରେ ବସିଲେ.. ପାର୍କରେ ଦୋଳି ଖେଳିଲେ.. ହୋଟେଲରେ ମନ ପସନ୍ଦର ଖାଦ୍ୟ ଖାଇଲେ.. । କୁନି କୁନି ପିଲା ମୁହଁରେ ହସ ଫୁଟାଇବା ପାଇଁ ଏମାନଙ୍କୁ ଗାଁରୁ ପାର୍କକୁ ଆଣିଛନ୍ତି ସ୍ୱେଚ୍ଛାସେବୀ । ନିଜ ଜନ୍ମ ଦିନକୁ ଛୋଟ ପିଲାଙ୍କ ସହ ପାଳନ କରିବା ସହ ସେମାନଙ୍କୁ ଟିକିଏ ଖୁସି କରିବା ପାଇଁ ଚେଷ୍ଟା କରିଛନ୍ତି ସ୍ୱେଚ୍ଛାସେବୀ ଅରକ୍ଷିତ ପରିଚ୍ଛା ।
ଜନ୍ମଦିନରେ ଭଂଜନଗର ବ୍ଳକ ଉପାନ୍ତ ଗାଁ ଡିହକୁମ୍ପାପଲ୍ଲୀର ପିଲାଙ୍କୁ ଭଂଜନଗର ଶିଶୁ ଉଦ୍ୟାନକୁ ବୁଲାଇ ନେଇଥିଲେ ସ୍ୱେଚ୍ଛାସେବୀ ସଂଗଠନ ‘ବିପଦର ବନ୍ଧୁ’ର ସଦସ୍ୟ ଅରକ୍ଷୀତ ପରିଛା । ଏହି ପିଲାମାନେ କେବେ ଭଂଜନଗର ଆସି ନାହିଁନ୍ତି । ସେମାନଙ୍କୁ ପାର୍କକୁ ଆଣି କୁନି କୁନି ପିଲାଙ୍କ ଗହଣରେ କେକ୍ କାଟିବା ପରେ ଏକ ହୋଟେଲରେ ଖୁଆଇବାର ବ୍ୟବସ୍ଥା କରିଥିଲେ । ଏହାପରେ ପିଲାମାନଙ୍କୁ ଟଏ ଟ୍ରେନ୍ ବସାଇବା ସହ, ଆକ୍ୱାରିମ୍, ସାଇନ୍ସପାର୍କ, ଜଳଭଣ୍ଡାର ବୁଲାଇ ଦେଖାଇଥିଲେ ଅରକ୍ଷିତ ଓ ତାଙ୍କ ବଂଧୁମାନେ ।
ଡିହକୁମ୍ପାପଲ୍ଲୀ ଗାଁରେ ବିଦ୍ୟାଳୟ ନଥିବାରୁ ୧୫ରୁ ୨୦ ପିଲା ପାଠପଢ଼ାରୁ ବଂଚିତ ହୋଇଛନ୍ତି । ସେମାନଙ୍କୁ ପାଠ ପଢାଇବା ପାଇଁ ବିପଦର ବନ୍ଧୁ ଅନୁଷ୍ଠାନ ପକ୍ଷରୁ ‘ମୁଁ ବି ପାଠ ପଢ଼ିବି” ଅଭିଯାନ ଜାରି ରହିଛି । ଗାଁରେ ଭଢ଼ାଟିଆ ଶିକ୍ଷକ ନିଯୁକ୍ତି କରି ପାଠପଢ଼ା ଜାରି ରଖିଛନ୍ତି ସ୍ୱେଚ୍ଛାସେବୀ ସଂଗଠନର ସଦସ୍ୟମାନେ । ପ୍ରାୟ ସମସ୍ତେ ନିଜ ପରିବାର, ବନ୍ଧୁବାନ୍ଧବ ଓ ସାଙ୍ଗ ସାଥିଙ୍କ ସହ ଜନ୍ମଦିନ ଭଳି ଉତ୍ସବ ପାଳନ କରିଥାନ୍ତି, ହେଲେ ଅରକ୍ଷିତଙ୍କ ଜନ୍ମଦିନ ପାଳନ ନିହାତି ଅନ୍ୟାମାନଙ୍କ ଠାରୁ ନିଆରା ।