କନକ ବ୍ୟୁରୋ : ଭରା ନଈ, ଆଉ ନଦୀ ପାରହେବା ଲାଗି ସାହାରା ତାର । ଜୀବନକୁ ବାଜି ଲଗାଇ ନଦୀ ପାର ହେଉଥିବାବେଳେ ଭାସିଯାଇଛନ୍ତି ୬ ମହିଳା । ତେବେ ସ୍ଥାନୀୟ ଯୁବକଙ୍କ ସହାୟତାରେ ଏମାନଙ୍କୁ ଉଦ୍ଧାର କରାଯାଇଛି । ଏଭଳି ଘଟଣା ଦେଖିବାକୁ ମିଳିଛି ଫୁଲବାଣୀ ଦାରିଙ୍ଗିବାଡି ବ୍ଲକ କିରିକୁଟୀ ପଂଚାୟତ ବୁରାଙ୍ଗିଆ ଗାଁରେ । ଏଠାରେ ଗାଁକୁ ଯିବା ବାଟରେ ପଡେ ଖଡ଼ଗ ନଦୀ । ଗାଁରୁ ସ୍କୁଲ, ବଜାର ଓ ଡାକ୍ତରଖାନା ଯିବାକୁ ହେଲେ ଏହି ନଦୀ ପାର ହୋଇ ଯିବାକୁ ପଡେ । ନଦୀ ଉପରେ ପୋଲ ନଥିବାରୁ ଦୁଇ କୂଳରେ ଥିବା ଗଛକୁ ତାରରେ ଯୋଡି, ସେଥିରେ ଝୁଲି ଝୁଲି ପାର ହୋଇଥାନ୍ତି ଲୋକେ । ସବୁଦିନ ଭଳି ଗତକାଲି ୬ ଜଣ ମହିଳାଙ୍କ ସହିତ କିଛି ଲୋକେ ତାର ସହାୟତାରେ ନଦୀ ପାର ହେଉଥିଲେ ।
Kanak News is now on WhatsApp
Join and get latest news updates delivered to you via WhatsApp
ପ୍ରତିଦିନ ଭଳି ଗତକାଲି ସକାଳେ ପରିବାରର ଅତ୍ୟାବଶ୍ୟକ ସାମଗ୍ରୀ କିଣିବା ପାଇଁ ବୁରାଙ୍ଗିଆର ସେରିନ୍ଦ୍ରି ଅମାୟତ (୬୦), ବିଳାସିନି ପ୍ରଧାନ(୫୦), ତିଳୋତମା ବିନ୍ଧାଣି (୪୦), ଶ୍ରୀମତି ଅମାୟତ (୩୦) ଓ ଦୁଇଜଣ ଗର୍ଭବତୀ ମହିଳା ସରସ୍ୱତୀ ଅମାୟତ (୩୦), ପାର୍ବତୀ ଅମାୟତ(୨୫) ଖଡ଼ଗନଦୀରେ ଦୁଇ କୂଳରେ ବନ୍ଧା ହୋଇଥିବା ରଶିକୁ ହାତରେ ଧରି ନଦୀ ପାର ହେଉ ଥିଲେ। ହେଲେ ହଠାତ ତାର ଛିଡ଼ି ପଡ଼ିଥିଲା । ନଦୀର ତୀବ୍ର ସ୍ରୋତରେ ଭାସିଯାଉଥିଲେ । ଏହି ସମୟରେ କୂଳ ଆରପାଖରେ ଗ୍ରାମକୁ ଆସିବା ପାଇଁ ଅପେକ୍ଷା କରିଥିବା ତିନି ଯୁବକ ସୁରଥ ମଳିକ, ରମେଶ ପ୍ରଧାନ ଓ ବସନ୍ତ ଅମାୟତ ଉପସ୍ଥିତ ବୁଦ୍ଧି ଖଟାଇ ନଦୀକୁ ଡେଇଁ ୬ଜଣ ମହିଳାଙ୍କୁ ଉଦ୍ଧାର କରିଥିଲେ। ସମସ୍ତଙ୍କ ଅବସ୍ଥା ସ୍ଥିର ଥିବା ଜଣାପଡ଼ିଛି। ୩ଜଣ ଯୁବକ ସେମାନଙ୍କୁ ଉଦ୍ଧାର କରିଥିଲେ । ଏହାକୁ ନେଇ ସେଠାରେ ତୀବ୍ର ପ୍ରତିକ୍ରିୟା ସୃଷ୍ଟି ହୋଇଛି । ସରକାରଙ୍କ ବିକାଶ ଉପରେ ବି ଲାଗିଛି ପ୍ରଶ୍ନଚିହ୍ନ ।