ବିଷାକ୍ତ ମଦ ନେଇଛି କେତେ ଜୀବନ? ବିଧାନସଭାରେ ବର୍ଷ ୱାରୀ ହିସାବ ଦେଲେ ମନ୍ତ୍ରୀ ।
କନକ ବ୍ୟୁରୋ : ବିଷାକ୍ତ ମଦ ପିଇ ଯାଇଛି କେତେ ଜୀବନ? ୨୦୧୦ରୁ ୨୦୨୨ ମଧ୍ୟରେ ବିଷାକ୍ତ ଦେଶୀ ଓ ବିଦେଶୀ ମଦ ପିଇ କେତେ ଜଣ ମୃତ୍ୟୁବରଣ କରିଛନ୍ତି । ଖାସକରି ବିଷାକ୍ତ ଦେଶୀ ଓ ବିଦେଶୀ ମଦ ବିକୁଥିବା ମଦ ଭାଟି ଉପରେ ସରକାର କି ପଦକ୍ଷେପ ନେଇଛନ୍ତି, ସେ ବାବଦରେ ଜାଣିବାକୁ ଚାହିଁଥିଲେ ବିଧାୟକ ସନ୍ତୋଷ ସିଂ ସାଲୁଜା । ଆଉ ଏହାର ଲିଖିତ ଉତ୍ତରରେ ପୂରା ତଥ୍ୟ ଦେଇଛନ୍ତି ବିଭାଗୀୟ ମନ୍ତ୍ରୀ ଅବକାରୀ ମନ୍ତ୍ରୀ ଅଶ୍ୱିନୀ କୁମାର ପାତ୍ର ।
Kanak News is now on WhatsApp
Join and get latest news updates delivered to you via WhatsApp
ବିଭାଗୀୟ ମନ୍ତ୍ରୀ ଅଶ୍ୱିନୀ କୁମାର ପାତ୍ର ବର୍ଷୱାରୀ ରିପୋର୍ଟ ଦେବା ସହ କହିଛନ୍ତି, ଏହି ଅବଧିରେ ରାଜ୍ୟରେ ବିଷାକ୍ତ ମଦ ନେଇଛି ୫୦ ଜୀବନ । ଏହାସହ ଭଦ୍ରକ ମଦ ମୃତ୍ୟୁକୁ ସ୍ୱୀକାର କରିଛନ୍ତି ସରକାର । ନିର୍ବାଚନ ବେଳେ ବିଷାକ୍ତ ମଦ ପିଇ ଭଦ୍ରକ ଜିଲ୍ଲାର ୯ ଜଣ ପ୍ରାଣ ହରାଇଥିବା ନେଇ ବିଧାନସଭାରେ ଉତ୍ତର ରଖିଛନ୍ତି ମନ୍ତ୍ରୀ । ସେହିଭଳି ୨୦୧୧-୧୨ରେ କଟକ ମଦ ମୃତ୍ୟୁରେ ୪୧ ଜଣ ପ୍ରାଣ ହରାଇଥିବା ମନ୍ତ୍ରୀ ସ୍ପଷ୍ଟ କରିଛନ୍ତି ।
ଏହାବାଦ୍ ମନ୍ତ୍ରୀ କହିଛନ୍ତି, ସରକାରୀ ଲାଇସେନ୍ସ ପ୍ରାପ୍ତ ମଦ ଦୋକାନ ଗୁଡିକରେ କେବଳ ସରକାରଙ୍କ ଦ୍ୱାରା ଅନୁମୋଦିତ ଓ ପରୀକ୍ଷିତ ମଦ ବିକ୍ରି କରିବା ପାଇଁ ଲାଇସେନ୍ସ ଦିଆଯାଇଥାଏ । ଯଦି କୌଣସି ସରକାରୀ ଲାଇସେନ୍ସ ପ୍ରାପ୍ତ ମଦ ଦୋକାନରେ ବିଷାକ୍ତ ମଦ ତିଆରି/ବିକ୍ରି କରୁଥିବା ଧରାପଡେ ଓ ରାସାୟନିକ ପରୀକ୍ଷଣ ପରେ ଯଦି ବିଷାକ୍ତ ଦ୍ରବ୍ୟର ଉପସ୍ଥିତି ଓ ଉପାଦାନ ସମ୍ପର୍କରେ ପ୍ରମାଣ ହସ୍ତଗତ ହୁଏ ତେବେ ୧୦ ଲକ୍ଷ ଟଙ୍କାର ଜରିମାନା ସହ ୧୦ ବର୍ଷ ପର୍ଯ୍ୟନ୍ତ ଜେଲଦଣ୍ଡ ବ୍ୟବସ୍ଥା ରହିଛି ।