ସୁନ୍ଦରଗଡର ଶ୍ମଶାନ ବନ୍ଧୁ । ୨ ବର୍ଷ ଭିତରେ ୭ ଶହ ଅଲୋଡ଼ା ଶବର ସତ୍କାର କଲେଣି ୪ ସାଙ୍ଗ, କରୋନାରେ ବି ସାହସ ଦେଖାଇ କରିଥିଲେ ଶବ ସତ୍କାର ।
କନକ ବ୍ୟୁରୋ : କରୋନା ମହାମାରୀରେ ମୃତ୍ୟୁବରଣ କରିଥାନ୍ତୁ କି ଦୁର୍ଘଟଣାରେ ପ୍ରାଣ ହରାଇଥାନ୍ତୁ, ସେ ଶବ ଅପରିଚିତ ହେଉ ବା ଅଲୋଡା । ସବୁ ଅଲୋଡା ଶବର ସାଥୀ ପାଲଟିଛନ୍ତି ଚାରି ଶ୍ମଶାନ ବନ୍ଧୁ । ସାଧାରଣ ଲୋକଙ୍କ ଠାରୁ ପୁଲିସ ଏବଂ ଜିଲ୍ଲା ପ୍ରଶାସନ, ସମସ୍ତଙ୍କ ଭରଷା ଏବେ ସୁନ୍ଦରଗଡର ଶ୍ମଶାନ ବନ୍ଧୁଙ୍କ ଉପରେ ।
Kanak News is now on WhatsApp
Join and get latest news updates delivered to you via WhatsApp
କରୋନା ମହାମାରୀ ଜନିତ ମୃତ୍ୟୁ ହେଉ କିମ୍ବା ଦୁର୍ଘଟଣା ଜନିତ ମୃତ୍ୟୁ ନିଦ୍ୱର୍ନ୍ଦ୍ୱରେ ଶବ ସତ୍କାର କରିବା ପାଇଁ ଆଗେଇ ଆସନ୍ତି ୪ ବନ୍ଧୁ ସିଦ୍ଧାନ୍ତ, ଶିଶିର, କମଲେଶ ଏବଂ ମନୋଜ । କରୋନା କାଳରେ ଦିନକୁ ୧୦ରୁ ଉର୍ଦ୍ଧ କୋଭିଡ ମୃତକଙ୍କ ଶବ ଦାହ କରି ଚର୍ଚ୍ଚାକୁ ଅସିଥିବା ଶ୍ମଶାନ ବନ୍ଧୁମାନେ ଏହି ୨ ବର୍ଷରେ ୭ଶହ ଶବ ସତ୍କାର କରି ସାରିଛନ୍ତି ।
ଯେତେବେଳେ ଭୂତାଣୁ ଭୟରେ ସଂପର୍କୀୟ ବି ଶବ ଛୁଉଁ ନଥିଲେ । କରୋନାରେ ମୃତ୍ୟୁବରଣ କରିଥିବା ବ୍ୟକ୍ତିଙ୍କ ଶବ ସତ୍କାର କରିବା ପ୍ରଶାସନ ପାଇଁ ବଡ ଚ୍ୟାଲେଞ୍ଜ ପାଲଟିଥିଲା । ଠିକ୍ ସେହି ସମୟରେ ଦିନରାତି ଏକ କରି ପିପିଇ କିଟ ପିନ୍ଧି ଶବ ସତ୍କାର କରୁଥିଲେ ସୁନ୍ଦରଗର ଏହି ଶ୍ମଶାନ ବନ୍ଧୁ ୪ ଜଣ । କେବଳ ମହାମାରୀ ମସୟରେ ନିର୍ଭୟରେ ୪୦୦ରୁ ଉର୍ଦ୍ଧ ଶବ ସତ୍କାର କରିଥିଲେ ।
ଅସହାୟ ଲୋକଙ୍କ ସହାୟତା ପାଇଁ ସବୁ ବେଳେ ଅଗେଇ ଆସନ୍ତି ୪ ସାଙ୍ଗ । ସୁନ୍ଦରଗଡ ସହର ଲୁହୁରାଢିପାର ରଞ୍ଜିତ ପଣ୍ଡାଙ୍କ ଶବ ସତ୍କାର ପରେ ଏମାନଙ୍କ ଶବ ସତ୍କାର ସଂଖ୍ୟା ୭୦୦ରେ ପହଂଚିଛି । ଆଉ ଏଭଳି ଏକ ମହତ କାର୍ଯ୍ୟ କରୁଥିବାରୁ ଚାରିଆଡୁ ପ୍ରଂଶସାର ସୁଅ ଛୁଟିଛି ।