ଶୌଚାଳୟ ନଥିବାରୁ ଶଶୁର ଓ ଦିଅରଙ୍କ ନାଁ’ରେ କେସ୍ କଲେ ବୋହୂ !
କନକ ବ୍ୟୁରୋ : ଯୁଗ ବଦଳୁଛି ତା ସାଙ୍ଗରେ ତାଳ ଦେଇ ବଦଳୁଛି ଲୋକଙ୍କ ମାନସିକତା । ଏବେ ଲୋକମାନେ ସ୍ୱଚ୍ଛତାକୁ ନେଇ ବେଶ ସଚେତନ । ମୋଦି ସରକାର ସ୍ୱଚ୍ଛ ଭାରତ ଅଭିଯାନ ଆରମ୍ଭ କରିବା ପରେ ଲୋକଙ୍କ ମାନସିକତାରେ ସିଧାସଳଖ ପ୍ରଭାବ ପକାଇଛି । ଗାଁରେ ମଧ୍ୟ ଏହି ପରିବର୍ତ୍ତନର ପ୍ରଭାବ ଦେଖିବାକୁ ମିଳିଛି । ଏଣିକି ଖାଲି ସ୍ଥାନରେ ଶୌଚ ହେବାକୁ ପସନ୍ଦ କରୁନାହାନ୍ତି ସାଧାରଣ ଲୋକ ।
Kanak News is now on WhatsApp
Join and get latest news updates delivered to you via WhatsApp
କିଛି ଦିନ ପୂର୍ବେ ସ୍ୱଚ୍ଛ ଅଭିଯାନ ଏବଂ ଖୋଲା ପଡିଆରେ ଶୌଚକୁ ନେଇ ‘ଟଏଲେଟ’ ନାମକ ଏକ ହିନ୍ଦୀ ଫିଲ୍ମ ରିଲିଜ ହୋଇଥିଲା । ଗାଁ ଗହଳିରେ ଖୋଲା ପଡିଆରେ ଶୌଚ କରୁଥିବାରୁ ମହିଳାଙ୍କୁ କେତେ ଅସୁବିଧାର ସମ୍ମୁଖୀନ ହେବାକୁ ପଡୁଛି ତାହାର ବାସ୍ତବ ଚିତ୍ର ଏହି ଫିଲ୍ମରେ ପ୍ରଦର୍ଶିତ ହୋଇଥିଲା । ତା ଛଡା ଶୌଚାଳୟ ପାଇଁ ମହିଳା ଜଣକ କିପରି ପୂରା ସମାଜ ସହ ଲଢେଇ କରିବାକୁ ମଧ୍ୟ ପ୍ରସ୍ତୁତ ହୋଇ ଯାଇଥିଲା ତାହାର ନିଛକ ଦୃଶ୍ୟ ଫିଲ୍ମରେ ପ୍ରଦର୍ଶିତ ହୋଇଥିଲା । କିନ୍ତୁ ବାସ୍ତବରେ ଏହାର ଏକ ଝଲକ ଏବେ ଉତ୍ତରପ୍ରଦେଶର ମୁଜାଫରନଗରରେ ଦେଖିବାକୁ ମିଳିଛି । ଶୌଚାଳୟ ପାଇଁ ନିଜ ପରିବାର ସହ ଲଢେଇ କରିବା ସହ ନିଜ ଶଶୁର ଓ ଦିଅରଙ୍କ ନାମରେ ଥାନାରେ ଏତଲା କରିଛନ୍ତି ମହିଳା । ଯାହା ଏବେ ଚର୍ଚ୍ଚାର ବିଷୟ ପାଲଟିଛି ।
ମୁଜାଫରନଗର ମୀନାପୁର ବ୍ଲକର ରଙ୍ଗିଲା ଦେବୀ । ୨୦୧୨ ମସିହାରେ କରଜା ଥାନାର ସୁନୀଲଙ୍କ ସହ ତାଙ୍କର ବାହାଘର ହୋଇଥିଲା । କିନ୍ତୁ ବାହାଘରର ୫ ବର୍ଷ ପରେ ଶଶୁର ଓ ଦିଅରଙ୍କ ନାମରେ ଅଭିଯୋଗ ନେଇ ଥାନାରେ ପହଞ୍ଚିଥିଲେ । ଘରେ ଶୌଚାଳୟ ନଥିବାରୁ ଶଶୁର ଓ ଦିଅରଙ୍କ ନାଁରେ ଅଭିଯୋଗ ଆଣିଥିଲେ ରଙ୍ଗିଲା ଦେବୀ । ତାଙ୍କ କହିବା ଅନୁଯାୟୀ, ଘରେ ଶୌଚାଳୟ ନ ଥିବାରୁ ଦୀର୍ଘ ୫ ବର୍ଷ ଧରି ପ୍ରତିଦିନ ଖୋଲା ପଡିଆକୁ ଶୌଚ ହେବାକୁ ସେ ଯାଉଥିଲେ । ଖୋଲାରେ ଶୌଚ କରୁଥିବାରୁ ଲୋକଙ୍କ ନଜରରେ ବାରମ୍ବାର ପଡୁଥିଲେ ରଙ୍ଗିଲା ଦେବୀ । ତେଣୁ ଘରେ ଶୌଚାଳୟ ତିଆରି କରିବାକୁ ଶଶୁର ଓ ଦିଅରଙ୍କୁ କହିଲେ ମଧ୍ୟ କେହି ତାଙ୍କ କଥା ଶୁଣୁନଥିଲେ । ବରଂ ତାଙ୍କୁ ସେଠାରେ ନିର୍ଯ୍ୟାତନା ଦିଆଯାଉଥିଲା ।
ଯେହେତୁ ତାଙ୍କ ପତି ବାହାରେ ରହୁଥିଲେ ତେଣୁ ତାଙ୍କ କଥାକୁ ମଧ୍ୟ କେହି କର୍ଣ୍ଣପାତ କରୁନଥିଲେ । ଘରେ ଶୌଚାଳୟ ନଥିବାରୁ ବାଧ୍ୟ ହୋଇ ବାପଘରକୁ ଚାଲି ଆସିଥିଲେ ରଙ୍ଗିଲା ଦେବୀ । କେବଳ ଶୌଚାଳୟ ପାଇଁ ସ୍ୱାମୀଙ୍କ ଠାରୁ ତାଙ୍କୁ ଦୂରେଇ ରହିବାକୁ ପଡୁଥିଲା । ଏହା ତାଙ୍କୁ ବେଶ ବାଧିଥିଲା । ତେଣୁ ଏହି ସମସ୍ୟାର ସ୍ଥାୟୀ ସମାଧାନ କରିବାକୁ ସେ ଏକ ଭିନ୍ନ ଉପାୟ ଚିନ୍ତା କରିଥିଲେ । ବାରମ୍ବାର ପରିବାର ଲୋକଙ୍କୁ କହିବା ଅପେକ୍ଷା ସିଧା ଯାଇ ଥାନାରେ ପହଞ୍ଚିଥିଲେ । ଶଶୁର ଓ ଦିଅରଙ୍କ ନାଁରେ ଥାନାରେ ଅଭିଯୋଗ କରିଥିଲେ । ପୋଲିସ ମଧ୍ୟ ଡେରି ନକରି ଉଭୟଙ୍କ ନାମରେ ମାମଲା ରୁଜୁ କରି ଥାନାକୁ ଆଣିଥିଲେ । ପୋଲିସ ଥାନାରେ ଶଶୁର ଓ ଦିଅର ଘରେ ନୂଆ ଶୌଚାଳୟ କରିବାକୁ ପ୍ରତିଶୃତି ଦେବା ପରେ ବୋହୂ ଅଭିଯୋଗ ପ୍ରତ୍ୟାହାର କରିଥିଲେ । ଏବେ ରଙ୍ଗୀଲା ଦେବୀଙ୍କୁ ନେଇ ପୂରା ମୁଜାଫରନଗରରେ ଚର୍ଚ୍ଚା ହେଉଛି । ତାଙ୍କ ସାହସିକ ପଦକ୍ଷେପ ଅନ୍ୟମାନଙ୍କ ପ୍ରେରଣା ସୃଷ୍ଟି କରିବ ।