କନକ ବ୍ୟୁରୋ : ମହାରାଷ୍ଟ୍ରରେ ଦେଖାଦେଇଥିବା ରାଜନୈତିକ ବିବାଦରେ ସୁପ୍ରିମକୋର୍ଟଙ୍କ ରାୟ ମହାବିକାଶ ଅଘାଡ଼ି ସରକାରଙ୍କ ପାଇଁ ଅଢୁଆ ବଢାଇଛି । ବିଦ୍ରୋହୀ ବିଧାୟକଙ୍କ ପଦବୀ ରଦ୍ଦ ନିଷ୍ପତିକୁ କୋର୍ଟ ଆସନ୍ତା ୧୧ ତାରିଖ ଯାଏ ଘୁଂଚାଇ ଦେବା ପରେ ସିନ୍ଦେ ଗୋଷ୍ଠୀ ଉଦ୍ଧବ ସରକାରଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଣିବାକୁ ପାଇଁ ପ୍ରସ୍ତୁତି ଆରମ୍ଭ କରିଛି । ଏଥିପାଇଁ ବିଦ୍ରୋହୀ ନେତା ଏକନାଥ ସିନ୍ଦେ ଆଇନଜୀବୀଙ୍କ ସହ କଥା ହୋଇଛନ୍ତି । କୋର୍ଟଙ୍କ ରାୟକୁ ଦୃଷ୍ଟିରେ ରଖି ମହାରାଷ୍ଟ୍ର ରାଜ୍ୟପାଳ ଫ୍ଲୋର ଟେଷ୍ଟ କରାନ୍ତୁ ବୋଲି ବିଦ୍ରୋହୀ ବିଧାୟକମାନେ କହିଛନ୍ତି । ତେଣୁ ରାଜ୍ୟପାଳ ସପ୍ତାହ ମଧ୍ୟରେ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ସଂଖ୍ୟା ଗରିଷ୍ଠତା ପ୍ରମାଣ କରିବାକୁ କହିପାରନ୍ତି । ଏପଟେ ଶିବସେନାର ବିଦ୍ରୋହୀ ବିଧାୟକଙ୍କ ସହ ମିଶି ରବିବାର ସୁଦ୍ଧା ସରକାର ଗଢିବାକୁ ପ୍ରସ୍ତୁତ ହେଉଛି ବିଜେପି । ଆଜି ବିଜେପି ନେତା ତଥା ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବିସ୍ ଦିଲ୍ଲୀ ଯାଇ ଗୃହମନ୍ତ୍ରୀ ଅମିତ ଶାହ ଏବଂ ଜେ.ପି ନଡ୍ଡ୍ାଙ୍କୁ ଭେଟିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗୌହାଟିରେ ଏକନାଥ ସିନ୍ଦେଙ୍କ କ୍ୟାମ୍ପର ଥିବା ୧୫ରୁ ୨୦ ବିଧାୟକଙ୍କ ସହ ଉଦ୍ଧବ ଠାକରେ ଯୋଗାଯୋଗରେ ଥିବା ଆଦିତ୍ୟ ଠାକରେ ଦାବି କରୁଥିବା ବେଳେ ଏହାର ଯବାବ ଦେଇଛନ୍ତି ଏକନାଥ ସିନ୍ଦେ । ତାଙ୍କ ପାଖରେ ୫୦ ବିଧାୟକଙ୍କ ସମର୍ଥନ ଅଛି, ଯେଉଁମାନେ ନିଜ ଇଛା ଏବଂ ଖୁସୀରେ ଆସିଛନ୍ତି, ଯଦି ସେମାନେ କହୁଛନ୍ତି ଯୋଗାଯୋଗରେ ଅଛନ୍ତି, ତେବେ ସେମାନଙ୍କ ନାଁ ପ୍ରକାଶ କରନ୍ତୁ ବୋଲି ଚ୍ୟାଲେଞ୍ଜ କରିଛନ୍ତି ସିନ୍ଦେ । ତେବେ ଖୁବଶିଘ୍ର ସେମାନେ ମୁମ୍ବାଇ ଆସିବେ ବୋଲି କହିଛନ୍ତି ଏହି ବିଦ୍ରୋହୀ ବିଧାୟକଙ୍କ ନେତା । ଏପଟେ ସଙ୍କଟରେ ଥିବା ଏମଭିଏ ସରକାରର ନୂଆ କ୍ୟାବିନେଟର ଆଜି ପ୍ରଥମ ବୈଠକ ଡକାଇଛନ୍ତି ଉଦ୍ଧବ ଠାକରେ । ବୈଠକରେ ସରକାରର ଆଗାମୀ କାର୍ଯ୍ୟପନ୍ଥା ନେଇ କୌଣସି ବଡ ନିଷ୍ପତି ନିଆଯାଇପାରେ ।
ଶିବସେନାର ବିବାଦରୁ ଫାଇଦା ଉଠାଇବାକୁ ଚେଷ୍ଟା କରୁଥିବା ବିଜେପି କହିଛି, ଯିଦି ବିଦ୍ରୋହୀ ଶିବସେନା ବିଧାୟକଙ୍କ ତରଫରୁ ମହାରାଷ୍ଟ୍ରରେ ସରକାର ଗଢିବା ପାଇଁ କୌଣସି ପ୍ରସ୍ତାବ ଆସେ, ତେବେ ସେମାନେ ଏହା ଉପରେ ବିଚାର କରିବେ ।
ବ୍ୟୁରୋ ରିପୋର୍ଟ କନକ ନ୍ୟୁଜ୍