ବରେଲିରେ ଦଳାଚକଟା ପରେ ମାରାଥନ ରାଲି ଉପରେ ରୋକ ଲଗାଇଲା କଂଗ୍ରେସ, ମୁଖ୍ୟମନ୍ତ୍ରୀ ଯୋଗୀଙ୍କ ନୋଏଡା ରାଲି ବାତିଲ
କନକ ବ୍ୟୁରୋ : ଉତ୍ତର ପ୍ରଦେଶରେ କଂଗ୍ରେସ ତାର ନିର୍ବାଚନୀ ରାଲି ଉପରେ ବ୍ରେକ୍ ଲଗାଇଛି । ୟୁପି ନିର୍ବଚନକୁ ନେଇ କଂଗ୍ରେସ ‘ଲେଡକୀ ହୁଁ ଲଡ ଶକ୍ତି ହୁଁ’ ଅଭିଯାନ କ୍ରମରେ ରାଜ୍ୟର ବିଭିନ୍ନ ସ୍ଥାନରେ ମାରାଥନ ରାଲିମାନ ଆୟୋଜନ କରିବାରେ ଲାଗିଥିଲା । ହେଲେ ଏବେ ବଢୁଥିବା କରୋନା ସଂକ୍ରମଣକୁ ଦୃଷ୍ଟିରେ ରଖି କଂଗ୍ରେସ ପକ୍ଷରୁ ସମସ୍ତ ରାଲିକୁ ବାତିଲ କରାଯାଇଛି । ଏହା ବ୍ୟତୀତ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଆଜି ନୋଏଡାରେ ଯେଉଁ ରାଲିକୁ ସମ୍ବୋଧିତ କରିବାର ଥିଲା ତାହାକୁ ବି ମୁଖ୍ୟମନ୍ତ୍ରୀ ବାତିଲ କରିଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କହିରଖୁ କି ଚଳିତ ବର୍ଷ ୟୁପିରେ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି ହେଲେ ଅନ୍ୟପଟେ ବଢୁଥିବା କରୋନା ସଂକ୍ରମଣକୁ ଦୃଷ୍ଟିରେ ରଖି ସରକାର ଗୋଟିଏ ପରେ ଗୋଟିଏ କଟକଣା ଲଗାଇବାରେ ଲାଗିଛନ୍ତି । ଅନ୍ୟପଟେ ନିର୍ବାଚନ ରାଲିକୁ ନେଇ ଲଗାତର ପ୍ରଶ୍ନ ଉଠିବାରେ ଲାଗିଛି ।
ବରେଲିରେ ଆୟୋଜିତ କଂଗ୍ରେସର ମାରାଥନ ରାଲିରେ ଦଳଚକଟା ପରେ ଏହାକୁ ନେଇ ଖୁବ ଚର୍ଚ୍ଚା ହୋଇଥିଲା । ଜାନୁଆରୀ ୪ ତାରିଖ ଅର୍ଥାତ ଗତକାଲି ହଜାର ହଜାର ଛାତ୍ରୀ ଏହି ମାରାଥନ ରାଲିରେ ଯୋଗ ଦେଇଥିଲେ । ମାତ୍ର ଅଚାନକ ରାଲିରେ ଦଳଚକଟା ଆରମ୍ଭ ହୋଇଯାଇଥିଲା । ଏଥିରେ ଅନେକ ଛାତ୍ରୀ ଆହତ ହୋଇଥିଲେ । ଏହାକୁ କଂଗ୍ରେସ ନେତାମାନେ ବିରୋଧୀଙ୍କର ଏକ ଷଡଯନ୍ତ୍ର ବୋଲି କହିଥିଲେ ।
ଗୋଟେପଟେ କଂଗ୍ରେସ ମାରାଥନ ରାଲି ଉପରେ ରୋକ ଲଗାଇଥିବା ବେଳେ ମୁଖ୍ୟମନ୍ତ୍ରୀ ନୋଏଡା ରାଲିକୁ ବାତିଲ କରିଛନ୍ତି । ହେଲେ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ କି ବିଜେପି ତାର ବାକି ରାଲି ଉପରେ ରୋକ ଲଗାଇବ କି ନାହିଁ ? । ନିର୍ବାଚନୀ ରାଲିରେ ସାମାଜିକ ଦୂରତା ଓ ମାସ୍କ ଏକ ପ୍ରହେଳିକା ସାଜିଛି ।