କନକ ବ୍ୟୁରୋ: ଖୋର୍ଦ୍ଧା ବୋଲଗଡ଼ରେ ବାଘ ଆତଙ୍କ । ବୋଲଗଡର କୋଶଳାଶୁଣୀ ଜଙ୍ଗଲରେ ବାଘର ପାଦ ଚିହ୍ନ ଦେଖିବାକୁ ମିଳିଛି । ଫଳରେ ସ୍ଥାନୀୟ ଆରିକମା, କୋଜିଅବଣୀ, ମାଣିବନ୍ଧ, ଛାମୁଣ୍ଡିଆପଲ୍ଲୀ ଓ ଦଦରା ଗାଁଲୋକଙ୍କ ମଧ୍ୟରେ ଆତଙ୍କ ଦେଖାଦେଇଛି । ଜଙ୍ଗଲ ଦେଇ ଯାଇଥିବା ରାସ୍ତାରେ ଲୋକେ ବାଘର ପାଦ ଚିହ୍ନ ଦେଖିବାକୁ ପାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଖୋର୍ଦ୍ଧା ଜିଲ୍ଲା ବୋଲଗଡ଼ ବ୍ଲକ ଅନ୍ତର୍ଗତ ମାଣିବନ୍ଧ ଗ୍ରାମ ନିକଟରେ ଥିବା କୋଶଳାଶୁଣୀ ଜଙ୍ଗଲରେ ବାଘ ରହିଥିବା ନେଇ ଚର୍ଚ୍ଚା ଜୋର ଧରିଛି । ମାଣିବନ୍ଧ ମେଡିକାଲରେ କାର୍ଯ୍ୟ କରୁଥିବା ଡାକ୍ତର ନିବେଦିତା ଭୋଳ ଓ ତାଙ୍କର ସହାୟକ ଉଦୟନାଥ ରାଉତ ଗତ ୨୪ ତାରିଖ ସନ୍ଧ୍ୟା ସାଢ଼େ ୫ଟା ସମୟରେ ମେଡିକାଲରୁ ନିଜ ଘର ଧଳାପଥର ଫେରୁଥିବା ବେଳେ କୋଶଳାଶୁଣୀ ଜଙ୍ଗଲରେ ଏକ ଗଛ ଉପରେ ଏକ ବାଘ ବସିଥିବାର ଦେଖିବାକୁ ପାଇଥିଲେ ।
ସେମାନେ ଭୟରେ ସେଠାରୁ ତୁରନ୍ତ ଧଳାପଥର ଆସି ଲୋକମାନଙ୍କୁ ଏ ସମ୍ପର୍କରେ ଜଣାଇଥିଲେ । ଏହି ଖବର ପାଇବା ପରେ ଖୋର୍ଦ୍ଧା ବନ ବିଭାଗ ପକ୍ଷରୁ ତତ୍ପରତା ପ୍ରକାଶ ପାଇଥିଲା । ବୋଲଗଡ଼ ବନପାଳ ଗଗନ ମହାପାତ୍ର ସଦଳବଳେ ଉକ୍ତ ଅଞ୍ଚଳ ଯାଇ ଅନୁସନ୍ଧାନ କରିଥିଲେ । ମାତ୍ର ବାଘ ଥିବା ସମ୍ପର୍କରେ କୌଣସି ଠୋସ ପ୍ରମାଣ ପାଇପାରି ନଥିଲେ ।
ତେବେ ବୁଧବାର ଆରିକମା ଗ୍ରାମର ୫ ଜଣ ବ୍ୟକ୍ତି ଏକ ଗାଡ଼ିରେ ମା’ କୋଶଳାଶୁଣୀ ଦର୍ଶନ କରିବାକୁ କୋଶଳାଶୁଣୀ ଜଙ୍ଗଲ ଭିତରକୁ ଯାଇଥିଲେ । ସେମାନେ ଫେରିବା ବେଳେ କୋଶଳାଶୁଣୀ ଜଙ୍ଗଲ ପାର୍ଶ୍ୱରେ ଥିବା ଧଳାପଥର-ରାଜସୁନାଖଳା ରାସ୍ତାରେ ବାଘ ପାଦ ଚିହ୍ନ ପଡ଼ିଥିବାର ଦେଖିବାକୁ ପାଇଛନ୍ତି । ଫଳରେ ସେ ଜଙ୍ଗଲରେ ବାଘ ରହିଥିବା ନେଇ ପୁଣି ଆଲୋଚିତ ହେଉଛି । ଏହି ଘଟଣାକୁ ନେଇ ସମ୍ପୃକ୍ତ ଅଞ୍ଚଳରେ ଲୋକମାନଙ୍କ ମଧ୍ୟରେ ଆତଙ୍କ ଦେଖା ଦେଇଥିବା ବେଳେ ବନ ବିଭାଗ ପକ୍ଷରୁ ଏ ନେଇ ଅନୁସନ୍ଧାନ କରିବା ପାଇଁ ସାଧାରଣରେ ମତ ପ୍ରକାଶ ପାଇଛି ।