ପଞ୍ଚାୟତ ଭଳି ଏକତରଫା ହୋଇନି ପୌର ଫଳାଫଳ । ୧୬ଟି ଜିଲ୍ଲାରେ ବିଜେଡିର ବିଜୟ ପଥରେ ଭାଗ ବସାଇଛନ୍ତି ବିରୋଧୀ
କନକ ବ୍ୟୁରୋ: ପୌର ନିର୍ବାଚନରେ ବିଜେଡିର ବିଜୟରେ ଭାଗ ବସାଇଛନ୍ତି ବିରୋଧୀ । ରାଜ୍ୟର ୩୦ ଜିଲ୍ଲାରୁ ୧୬ଟି ଜିଲ୍ଲାରେ ବିରୋଧୀ ବିଜେଡିକୁ ଟକ୍କର ଦେଇଛନ୍ତି । ଯାହା ପଞ୍ଚାୟତ ନିର୍ବାଚନରେ ଆଦୌ ଦେଖା ଯାଇନଥିଲା ।
Kanak News is now on WhatsApp
Join and get latest news updates delivered to you via WhatsApp
ପଞ୍ଚାୟତ ନିର୍ବାଚନରେ ବିଜେଡି ଯେପରି ଏକପାଖିଆ ବିଜୟ ହାସଲ କରିଥିଲା, ପୌର ଫଳାଫଳ ସେଥିରେ କିିଛିଟା ରୋକ୍ ଲଗାଇଛି । ଯଦିଓ ବିଜେଡି ୭୦ ପ୍ରତିଶତରୁ ଅଧିକ ପୌର ଅଧ୍ୟକ୍ଷ ପଦ ହାତେଇବାକୁ ଯାଉଛି, ହେଲେ ବିରୋଧୀ ଟକ୍କର ଦେଇଥିବା ଦେଖିବାକୁ ମିଳିଛି । ନିକଟରେ ସରିଥିବା ପଞ୍ଚାୟତ ନିର୍ବାଚନରେ ଐତିହାସିକ ସଫଳତା ପାଇଥିଲା ବିଜେଡି । ୩୦ଟି ଯାକ ଜିଲ୍ଲା ପରିଷଦ ଅଧ୍ୟକ୍ଷ ପଦ ପୋଛି ନେଇଥିଲା ଶାସକ ଦଳ । ତେବେ ପୌର ଫଳାଫଳ ଯାହା ଆସିଛି, ସେଥିରୁ ଗୋଟିଏ କଥା ସ୍ପଷ୍ଟ ହୋଇଛି ପଞ୍ଚାୟତ ନିର୍ବାଚନର ଟ୍ରେଣ୍ଡ, ପୌର ନିର୍ବାଚନରେ କିଛିଟା ପରିବର୍ତ୍ତନ ହୋଇଛି ।
ନୂଆପଡ଼ା ଜିଲ୍ଲାରେ କୌଣସି ପୌର ଅଧ୍ୟକ୍ଷ ପଦ ହାତେଇ ପାରିନି ବିଜେଡି । ୩ଟି ଅଧ୍ୟକ୍ଷ ପଦରୁ ବିଜେପି, କଂଗ୍ରେସ ଓ ସ୍ୱାଧୀନ ପ୍ରାର୍ଥୀ ବିଜୟୀ ହୋଇଛନ୍ତି । ସେହିପରି କୋରାପୁଟରେ ୪ଟି ଅଧ୍ୟକ୍ଷ ପଦରୁ ବିଜେଡି ଗୋଟିଏ, କଂଗ୍ରେସକୁ ୨ଟି ଏବଂ ସ୍ୱାଧୀନକୁ ମିଳିଛି ଗୋଟିଏ ପଦ । ନବରଙ୍ଗପୁର, ମାଲକାନଗିର.ସମ୍ବଲପୁର ଜିଲ୍ଲାରେ ବିଜେଡି ଓ ବିଜେପି ଗୋଟିଏ ଲେଖାଁ ଅଧ୍ୟକ୍ଷ ପଦ ହାତେଇଛନ୍ତି । ସେହିପରି କଳାହାଣ୍ଡି ଜିଲ୍ଲାରେ ୨ଟି ଲେଖାଁଏ ଅଧ୍ୟକ୍ଷ ପଦ ବିଜେଡି ଓ ବିଜେପି ଭାଗବାଂଟି ନେଇଛନ୍ତି । ଜଗତସିଂହପୁରରେ କଂଗ୍ରେସ ଗୋଟିଏ ପୌର ଅଧ୍ୟକ୍ଷ ପଦ ହାତେଇଛି ।
୩୦ଟି ଜିଲ୍ଲାରୁ ୧୬ ଜିଲ୍ଲାରେ ବିଜେଡିର ବିଜୟ ପଥରେ ଭାଗ ବସାଇଛନ୍ତି ବିରୋଧୀ । ଅନେକ ସ୍ଥାନରେ ଜୋରଦାର ମୁକାବିଲା ହୋଇଛି । ତେଣୁ ଗୋଟିଏ କଥା ସ୍ପଷ୍ଟ ହୋଇଛି, ଗାଁ ଭୋଟର ବିଜେଡିକୁ ଯେପରି ସମର୍ଥନ ଅଜାଡି ଦେଇଥିଲେ, ସହରୀ ଭୋଟର ସେପରି କରିନାହାନ୍ତି । ବିଶେଷ କରି ପଶ୍ଚିମ ଓଡ଼ିଶା ଓ ଉତ୍ତର ଓଡ଼ିଶାରେ ବିରୋଧୀ ଦଳ ଅପେକ୍ଷାକୃତ ଭଲ ପ୍ରଦର୍ଶନ କରିଛନ୍ତି । ଶେଷ ଖବର ସୁଦ୍ଧା ୧୦୮ଟି ପୌରାଧ୍ୟକ୍ଷ ପଦରୁ ବିଜେଡି-୭୫, ବିଜେପି-୧୭, କଂଗ୍ରେସ-୭, ସ୍ୱାଧୀନ-୯ଟି ସ୍ଥାନରେ ଆଗୁଆ କିମ୍ବା ବିଜୟୀ ହୋଇଛନ୍ତି ।