ଲୁପ୍ତ ହେବାକୁ ବସିଛି ଧଳାପଥରର ପ୍ରସିଦ୍ଧ କଳା। ପ୍ରୋତ୍ସାହନ ଅଭାବରୁ ଏହି କୁଟୀର ଶିଳ୍ପରୁ ମୁହଁ ଫେରାଇଲେଣି ବୁଣାକାର।
କନକ ବ୍ୟୁରୋ: ପରଦା କଳା ପାଇଁ ସ୍ୱତନ୍ତ୍ର ପରିଚୟ ସୃଷ୍ଟି କରିଛି ଖୋର୍ଦ୍ଧା ଜିଲ୍ଲା ବୋଲଗଡ଼ ବ୍ଲକ୍ । ଗ୍ରାମର ଉଦୟନାଥଙ୍କ ଭଳି ପ୍ରତିଭାବାନ ଶିଳ୍ପୀ ନିଜ ହାତର ଯାଦୁରେ ଚମକାଉଥିଲେ କଳାକୃତି । ତାଙ୍କର ଏହି କଠୋର ପରିଶ୍ରମ ଓ କଠିନ ଅଧ୍ୟବସାୟ ଫଳରେ ପରଦା କଳାର ଗାଁ ଭାବେ ଧଳାପଥର ବେଶ ପରିଚୟ ସୃଷ୍ଟି କରିଥିଲା । କିନ୍ତୁ ପର୍ଯ୍ୟାୟକ୍ରମେ ସରକାରୀ ପ୍ରୋତ୍ସାହନ ଓ କଞ୍ଚାମାଲ ଅଭାବ କାରଣରୁ ପରଦା କଳା ଏବେ ହଜିଯିବାକୁ ବସିଲାଣି । ଗାଁର ୭୦ରୁ ୮୦ ଭାଗ ଲୋକେ ବୁଣାକାରକୁ ନିଜର ଜୀବିକା ଗ୍ରହଣ କରିଆସିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପ୍ରାକୃତିକ ପ୍ରଣାଳୀରେ ରଙ୍ଗ ପ୍ରସ୍ତୁତ କରି ସୂତାକୁ ରଙ୍ଗ କରି ସୁଷ୍ମ କାରୁକାର୍ଯ୍ୟ ପ୍ରଣାଳୀରେ ପରଦା ପ୍ରସ୍ତୁତ କରାଯାଉଥିଲା । କିନ୍ତୁ ସରକାରୀ ପ୍ରୋତ୍ସାହନ ଓ କଞ୍ଚାମାଲ ଅଭାବରୁ ବୁଣାକାରଙ୍କ ହାତ ବନ୍ଧା ହୋଇ ପଡ଼ିଛି । ଖୋର୍ଦ୍ଧା ଜିଲ୍ଲାର ପ୍ରଥମ ଜିଆଇ ଟ୍ୟାଗ୍ ମାନ୍ୟତା ମିଳିଥିବା ଏହି ପରଦା କଳା ଦିନେ ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲା । ଅନ୍ୟପଟେ ଏକଦା ପରଦା କଳାକୁ ନେଇ ସ୍ୱତନ୍ତ୍ର ପରିଚୟ ସୃଷ୍ଟି କରିଥିବା ଧଳାପଥର ଗ୍ରାମ ଏବେ ତା’ର ସେହି ପରିଚୟ ହଜାଇବାକୁ ବସିଲାଣି ।