ସୁରଙ୍କ ବଡ ପୁଅ ସିଦ୍ଧାର୍ଥଙ୍କ ବଡ ଘୋଷଣା । ଜଟଣୀ ଆସନରୁ ସ୍ୱାଧୀନ ପ୍ରାର୍ଥୀ ଭାବେ ଲଢିବେ ନିର୍ବାଚନ ।
କନକ ବ୍ୟୁରୋ: ସ୍ୱାଧୀନ ପ୍ରାର୍ଥୀ ଭାବେ ନିର୍ବାଚନ ଲଢିବେ ସୁରଙ୍କ ବଡ ପୁଅ ସିଦ୍ଧାର୍ଥ ରାଉତରାୟ । ନିମାପଡା ନୁହେଁ ବରଂ ଜଟଣୀରୁ ସେ ନିର୍ବାଚନ ଲଢିବାକୁ ଘୋଷଣା କରିଛନ୍ତି । ସାନ ଭାଇ ମନ୍ମଥ ରାଉତରାୟ ବିଜେଡିରେ ସାମିଲ ହେବା ପରେ, ମନ୍ମଥଙ୍କୁ ମିଳିଛି ଭୁବନେଶ୍ୱର ଲୋକସଭା ଟିକେଟ୍ । ଆଉ ଏହାପରେ ସିଦ୍ଧାର୍ଥ ଜଟଣୀ ଆସନରୁ ସ୍ୱାଧୀନ ପ୍ରାର୍ଥୀ ଭାବେ ଲଢିବାକୁ ଶନିବାର ଘୋଷଣା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସିଦ୍ଧାର୍ଥ କହିଛନ୍ତି, କଂଗ୍ରେସ ଟିକେଟରୁ ନିର୍ବାଚନ ଲଢିଲେ ଲୋକଙ୍କ ପାଖକୁ ଭିନ୍ନ ବାର୍ତ୍ତା ଯିବ । ବାପା ଯାହା ଭୁଲ କରିଛନ୍ତି, ତାକୁ ଠିକ୍ କରିବା ହେଉଛି ବଡପୁଅର ଦାୟିତ୍ୱ । ତେବେ କଂଗ୍ରେସ ପ୍ରତି ତାଙ୍କର ଯଥେଷ୍ଟ ସମ୍ମାନ ଓ ସମର୍ଥନ ରହିଛି । ପୂର୍ବ ଅପେକ୍ଷା କଂଗ୍ରେସ ଏବେ ଆହୁରି ଅଧିକ ସ୍ୱଚ୍ଛ ହେଇଛି । ହେଲେ ସେ ଯଦି କଂଗ୍ରେସ ଟିକେଟରୁ ନିର୍ବାଚନ ଲଢନ୍ତି, ତେବେ ଲୋକଙ୍କ ପାଖକୁ ଭୁଲ୍ ମେସେଜ୍ ଯିବ, ତେଣୁ ସେ ସ୍ୱାଧୀନ ଲଢିବାକୁ ଘୋଷଣା କରିଛନ୍ତି । ଅନ୍ୟପଟେ ଜଟଣୀଙ୍କୁ ମାଫିଆଙ୍କ ହାତରେ ଛାଡି ହେବ ନାହିଁ । ଜିତ୍ ଆଉ ହାର୍ ଯାହା ହେଉ ନା କାହିଁକି ସେ ନିର୍ବାଚନ ଲଢିବେ ବୋଲି ସିଦ୍ଧାର୍ଥ ରାଉତରାୟ କହିଛନ୍ତି ।
ସୂଚନାଯୋଗ୍ୟ ଯେ, ସୁରଙ୍କ ସାନପୁଅ ମନ୍ମଥ ରାଉତରାୟ ବିଜେଡିରେ ସାମିଲ ହେବା ପରେ ତାଙ୍କୁ ଭୁବନେଶ୍ୱର ଲୋକସଭା ଆସନ ପାଇଁ ପ୍ରାର୍ଥୀ କରିଛି ଦଳ । ହେଲେ ମନ୍ମଥଙ୍କ ପ୍ରାର୍ଥୀତ୍ୱକୁ ନେଇ ସୁରଙ୍କ ଘରେ କେହି ସନ୍ତୁଷ୍ଟ ନଥିବା କୁହାଯାଉଛି । ଏମିତି କି ବଡ ଭାଇ ସିଦ୍ଧାର୍ଥ ମଧ୍ୟ ମନ୍ମଥଙ୍କ ପାର୍ଥୀତ୍ୱକୁ ନେଇ ପ୍ରଶ୍ନ ଉଠାଇଛନ୍ତି । ଆଉ ଏପରି ସ୍ଥିତିରେ ସିଦ୍ଧାର୍ଥ ଜଟଣୀ ବିଧାନସଭା ଆସନରୁ ସ୍ୱାଧୀନ ପ୍ରାର୍ଥୀ ଭାବେ ଲଢିବେ ବୋଲି ଘୋଷଣା କରିଛନ୍ତି ।