ନିର୍ବାଚନରେ ରାଜ୍ୟଗୁଡ଼ିକର ମାଗଣା ବଣ୍ଟାକୁ ନେଇ ପ୍ରଧାନମନ୍ତ୍ରୀଙ୍କୁ ସତର୍କ କଲେ ବରିଷ୍ଠ ଅଧିକାରୀ । କହିଲେ ଆସିପାରେ ବିରାଟ ଅର୍ଥନୈତିକ ସଙ୍କଟ
କନକ ବ୍ୟୁରୋ: ଶ୍ରୀଲଙ୍କାରେ ଭୟଙ୍କର ଅର୍ଥନୈତିକ ସଙ୍କଟ ଦେଖା ଦେବା ପରେ ଭାରତରେ ଆରମ୍ଭ ହୋଇଯାଇଛି ଚର୍ଚ୍ଚା । ନିର୍ବାଚନରେ ଭୋଟ ପାଇଁ କିଛି ରାଜ୍ୟ ସରକାରଙ୍କ ମାଗଣା ବଣ୍ଟା ଯୋଜନା ସେହି ରାଜ୍ୟ ଗୁଡିକ ପାଇଁ ବଡ ଧରଣର ଆର୍ଥିକ ସଙ୍କଟ ସୃଷ୍ଟି କରିପାରେ ବୋଲି ଆଶଙ୍କା କରିଛନ୍ତି ଟପ ବ୍ୟୁରୋକ୍ରାଟ । ତେବେ ଏଥିପାଇଁ ସେମାନେ ପ୍ରଧାନମନ୍ତ୍ରୀଙ୍କୁ ଭେଟି ସତର୍କ ମଧ୍ୟ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଶ୍ରୀଲଙ୍କାରେ ଦେଖା ଦେଇଥିବା ଭୟଙ୍କର ଆର୍ଥିକ ସଙ୍କଟ ସାରା ବିଶ୍ୱରେ ଚର୍ଚ୍ଚାର ବିଷୟ ହୋଇଥିବାବେଳେ ଭାରତରେ ମଧ୍ୟ ସତର୍କ ଘଣ୍ଟି ବାଜିଛି । ନିର୍ବାଚନରେ ବିଜୟୀ ପାଇଁ ବିଭିନ୍ନ ରାଜନୈତିକ ଦଳ ଏକାଧିକ ମାଗଣା ବଣ୍ଟା ଯୋଜନାର ଘୋଷଣା କରୁଛନ୍ତି ଓ ସରକାରକୁ ଆସିବା ପରେ ତାହାକୁ କାର୍ଯ୍ୟକାରୀ କରୁଥିବାରୁ, ପ୍ରଧାନମନ୍ତ୍ରୀଙ୍କ ସହ ଆଲୋଚନା ବେଳେ ଉଦବେଗ ପ୍ରକାଶ କରିଛନ୍ତି ଦେଶର ଟପ୍ ବ୍ୟୁରୋକ୍ରାଟ୍ । ପଞ୍ଜାବ, ଦିଲ୍ଲୀ, ତେଲେଙ୍ଗାନା, ପଶ୍ଚିମବଙ୍ଗ ଓ ଆନ୍ଧ୍ର ପ୍ରଦେଶ, ୫ଟି ରାଜ୍ୟର ନାଁ ନେଇ ସତର୍କ କରିଛନ୍ତି । ଆଉ କହିଛନ୍ତି…
- କେତେକ ରାଜ୍ୟରେ ଅର୍ଥନୈତିକ ସଙ୍କଟ ଗମ୍ଭୀର ହେବାରେ ଲାଗିଛି
- ପଞ୍ଜାବ, ଦିଲ୍ଲୀ, ତେଲେଙ୍ଗାନା, ଆନ୍ଧ୍ର ଓ ପଶ୍ଚିମବଙ୍ଗ ଚଳାଇଛନ୍ତି ମାଗଣା ଯୋଜନା
- ମାଗଣା ବିଜୁଳି ବାଣ୍ଟିବା ଫଳରେ ରାଜ୍ୟ ରାଜକୋଷ ଉପରେ ପଡିପାରେ ଚାପ
- ମାଗଣା ବଣ୍ଟନ ଫଳରେ ଅନ୍ୟ ସାମାଜିକ ସୁରକ୍ଷା କ୍ଷେତ୍ରରେ କମୁଛି ଅନୁଦାନ
- ଶିକ୍ଷା ଓ ସ୍ୱାସ୍ଥ୍ୟ ଭଳି ମୌଳିକ ସେବାକୁ ବାଦଦେଇ ମାଗଣା ବଣ୍ଟାରେ ମାତିଛନ୍ତି
- ୟୁପି ଓ ଗୋଆରେ ମାଗଣା ରୋଷେଇ ଗ୍ୟାସ ବାଣ୍ଟିବାକୁ ଘୋଷଣା କରିଥିଲା ବିଜେପି
- ରାଜ୍ୟଗୁଡିକର ମାଗଣା ବଣ୍ଟା କେନ୍ଦ୍ର ସରକାରଙ୍କ ଉପରେ ମଧ୍ୟ ଚାପ ବଢାଇବ
- ଗ୍ରୀସ ଓ ଶ୍ରୀଲଙ୍କା ଭଳି ସ୍ଥିତି ଉପୁଜିପାରେ
ତେବେ ନଜର ପକାନ୍ତୁ ବିଭିନ୍ନ ରାଜ୍ୟ ସରକାରଗୁଡିକର ପ୍ରମୁଖ ମାଗଣା ବଣ୍ଟା ଯୋଜନା ଉପରେ..
- ପଞ୍ଜାବ ଓ ଦିଲ୍ଲୀରେ ଲୋକମାନଙ୍କୁ ୨ଶହ ୟୁନିଟ୍ ପର୍ଯ୍ୟନ୍ତ ମାଗଣା ବିଜୁଳି ଯୋଗାଇ ଦେଉଛି ଆପ୍ ସରକାର ।
- ତାମିଲନାଡୁରେ ଫ୍ରି-ଲାପଟପ୍, ବିବାହ, ଶୁଦ୍ଧିକ୍ରିୟା ପାଇଁ ଆର୍ଥିକ ସହାୟତା ଦିଆଯାଉଛି
- ବାର୍ଦ୍ଧକ୍ୟ ଭତ୍ତା ବାବଦକୁ ବୟସ୍କ ବ୍ୟକ୍ତିମାନଙ୍କୁ ମାସିକ ଅଢ଼େଇ ହଜାର ଟଙ୍କା ବାଣ୍ଟୁଛନ୍ତି ଆନ୍ଧ୍ର ସରକାର ।
- ଅଳ୍ପ ସଂଖ୍ୟକଙ୍କୁ ବୃତ୍ତି, ବିବାହ ପାଇଁ ସହାୟତା, ଜୟ ବାଙ୍ଗାଲ ନାଁରେ ସ୍ୱତନ୍ତ୍ର ଭତ୍ତା ଦେଉଛନ୍ତି ପଶ୍ଚିମବଙ୍ଗ ସରକାର
ସବୁଠୁ ବଡ କଥା ହେଉଛି, ଦିଲ୍ଲୀର ଆପ ସରକାର ବିଜୁଳି ବାହାରୁ କିଣି ଲୋକମାନଙ୍କୁ ମାଗଣାରେ ଦେଉଛନ୍ତି । ହେଲେ, ବାହାରୁ କିଣି ମାଗଣାରେ ବାଣ୍ଟିବା କେତେଦୂର ଠିକ୍ ତାକୁ ନେଇ ପ୍ରଶ୍ନ ଉଠୁଛି । ସୂଚନାଯୋଗ୍ୟ ଯେ, ଶ୍ରୀଲଙ୍କାରେ ରାଜପକ୍ଷେ କ୍ଷମତାକୁ ଆସିବା ପରେ ଟିକସର ପରିମାଣ କମାଇ ଦେଇଥିଲେ । ବିଭିନ୍ନ ମାଗଣା ବଣ୍ଟା ଯୋଜନା ବି ଚଳାଇଥିଲେ । ଯାହାର ସିଧାସଳଖ ପ୍ରଭାବ ଦେଶର ରାଜକୋଷ ଉପରେ ପଡିଥିଲା । ଆଉ ଏବେ ଭୟଙ୍କର ଆର୍ଥିକ ସଂକଟ ଦେଇ ଗତି କରୁଛି ଶ୍ରୀଲଙ୍କା । ପେଟ୍ରୋଲ ଓ ଡିଜେଲ ଦର ୩ରୁ ୪ ଗୁଣା ବୃଦ୍ଧି ପାଇଛି । ଚାଉଳ କିଲୋ ୫ ଶହ ଟଙ୍କାରେ ପହଞ୍ଚିଛି । ଚିନି କିଲୋ ୨୯୦ ଟଙ୍କା ହୋଇଛି । ଶହେ ଟଙ୍କା ଦେଲେ ମିଳୁଛି ଗୋଟେ କପ୍ ଚା’ । ଏଲ୍ପିଜି ସିଲିଣ୍ଡର ଦର ୪ ହଜାର ୧୧୯ ଟଙ୍କା ହୋଇଛି ।